¿Kasapülajana na aʼyataakana neʼipajee na laülaashiikana?

Aashajaasü tü Wiwüliakat nachiki na wayuu aʼyataakana maʼin suluʼu tü outkajaaleekat, naya na laülaashiikana otta na aʼyataakana neʼipajee (Filipos 1:1, TNM). Kojuyawaishii naya suluʼu tü outkajaaleekat. ¿Kasa naainjaka wapüleerua suluʼu tü outkajaaleekat?

Nakaaliinjüin na laülaashiikana. Na aʼyataakana neʼipajee na laülaashiikana, wayuu laülaa aaʼinchii sünain anoujaa jee tütüshii naya, eeshii eekai jimaʼaliin otta nataralüinnain. Nnojotsü shiain naʼyataain maʼin anain tü ekirajaakat, aʼyataashii naya sünain tü kasa eekat suluʼu tü outkajaaleekat. Makalaka shieerüin naaʼinmaain na laülaashiikana tü ekirajaakat na wawalayuukana otta natütüleʼerüin naaʼin.

Aʼyataashii maʼin. Eeshii neʼitaanüle na aʼyataakana neʼipajee na laülaashiikana süpüla nasaküin na antakana sünain tü outkajawaakat. Eeshii na jülüjakana aaʼin tü raawia suluʼukat tü outkajaaleekat, na eitajakana karaloukta, na akotchojokana tü nneerü asülajünakat jee na aküjakana jalainjanain naküjüin pütchi na wawalayuukana. Nepitajüin tü outkajaaleekat jee nakaaliinjüin na wawalayuu laülaayuukana sümaa ayatüin naainjüin tü namakat na laülaashiikana. Kojutshii naya atumawaa süka naainjüin süka süpüshuaʼa naaʼin tü aluwataanakalü anain naya (1 Timoteo 3:13).

Anasü maʼin sukuwaʼipa nanoula. Aneekünüshi wanee wayuu süpüla niʼyataain neʼipajee na laülaashiikana süka laülaain naaʼin sünain anoujaa. Katchinsü wanoula sutuma tü nekirajakalü anain waya suluʼu tü outkajaaleekat, talatsü waaʼin süka weʼrüin naya sünain aküjaa pütchi jee paaʼinwajiraashii waya süka tütüin maʼin naya (Éfeso 4:16). Laülaashii naya mapa suluʼu tü outkajaaleekat.

• ¿Jarat tü nakuwaʼipakat na aʼyataakana neʼipajee na laülaashiikana?

• ¿Kasa naainjaka na aʼyataakana neʼipajee na laülaashiikana süpüla anain sukuwaʼipa tü kasa aainjünakat suluʼu tü outkajaaleekat?