Naainjüin waneepia Samuel tü kasa anasükat

Joʼuuiwaʼaya Samuel, aʼyataashi otta kepiashi nia suluʼu tü aʼwaajüleekat Maleiwa. ¿Jamakuwaʼipai süpüla chainjachin Samuel suluʼu tü aʼwaajüleekat Maleiwa? Jooʼu wekirajaai palajana süchiki tü saaʼinrakat Ana, tü niikat.

Kachonweesü maʼin Ana, akatsaʼa maralüin shia. Suʼuraajaka nümüin Jeʼwaa süpüla kachoinjatüin shia. Müsü nümüin Jeʼwaa: «Kachonle taya putuma, taapeechi nia pümüin süpüla niʼyataainjachin suluʼu tü aʼwaajüleekat». Anasü noʼuluʼu Jeʼwaa tü suchuntakat Ana. Makalaka kachoin shia nutuma Jeʼwaa. Samuel nünülia chi joʼuukai. Sotusü saaʼin Ana tü sünüikikat nümüin Maleiwa makalaka saapüin chi joʼuukai süpüla niʼyataainjachin waneepia suluʼu tü aʼwaajüleekat Maleiwa. Saapüin chi joʼuukai apünüinpa nuuyase jee shiale pienchipa nuuyase.

Suluʼu tü aʼwaajüleekat Maleiwa, eejachi wanee sacerdoote kanüliakai Elí. Aʼyataashi nia chayaa otta müshiʼiya piamashii nüchonnii. Nnojotsü süpüla saainjünüin kasa mojusü suluʼu tü aʼwaajüleekat Maleiwa. ¿Kasa naainjaka na nüchonniikana Elí suluʼu tü aʼwaajüleekat Maleiwa? Aainjüshii maʼin kasa mojusü. Niʼrüin naya Samuel sünain aainjaa kasa mojusü. ¿Naaʼinrüinche Samuel tü kasa mojusü naaʼinrakat na nüchonniikana Elí?... Nnojo, shia naainjaka waneepia tü kasa anasükat. Shia naainjaka Samuel tü ekirajünakalü anain nia nutuma nüshi otta nii.

¿Kasache naainjüinjatka Elí naka na piamashiikana nüchonnii?... Nüchiaainjana naya. Nnojoliinjana nuuʼulaain naya sünain aʼyatawaa suluʼu tü aʼwaajüleekat Maleiwa. Nnojotsü naainjüin tia Elí. Mojusü maʼin tia nümüin Jeʼwaa makalaka naashichijaain nooʼomüin Elí otta na nüchonniikana. Süsalainjana naainjala nutuma Maleiwa.

Shiasaʼa saʼwai, wanaa sümaa nutunküin Samuel, ounejünüshi nia. Nuwataaka eemüin Elí sünain nümüin nümüin: «Anii taya, ¿kasa puunejaka apüla taya?». Nümaka Elí nümüin Samuel: «Nnojoishi tounejüin pia». Ounejünüshi nia piantua. Apünüintuapa nuunejünüin Samuel, nümaka Elí nümüin: «Puunejünüle püchikuaʼa, müinjachi pia: ‹Anii taya Jeʼwaa, ¿kasa püküjeeka tamüin?›». Nuʼunaka Samuel sünain eisalawaa. Nümaka Jeʼwaa nümüin Samuel: «Püma nümüin Elí süsalainjatüin tatuma saainjala tü nüchonniikalüirua. Mojusü maʼin tü kasa naainjakat». ¿Kapüleesüche nümüin Samuel aainjaa tü aluwataanakalü anain nia?... Aa, kapüleesü maʼin nümüin. Akaisaʼa meimmoluin Samuel, shia naainjaka tü nuluwataakalü anain nia Jeʼwaa. Nnojotsü alawaain tü nümakat Jeʼwaa. Ouktüshii atumawaa na piamashiikana nüchonnii Elí. Akaʼaya Elí, ouktüshi nia.

Anasü maʼin süpüla washatüin nukuwaʼipa Samuel. Aainjüshi nia kasa anasü mayaainjeʼe kottüin nia sümaa wayuu aainjaka kasa mojusü. ¿Jama piakai? ¿Paainjeerü tü kasa anasükat maʼaka naainjüin shia Samuel? Paainjüle tia, talateerü naaʼin Jeʼwaa putuma otta talateerü naaʼin püshi sümaa püi.