Aashajaashi Jehová nümaa Samuel

Eejana piamashii nüchonnii Elí. Hofní nünülia wanee otta chi wane Finehás nünülia. Sacerdote naya suluʼu tü aʼwaajüleekat Maleiwa. Nnojoishii naya oonooin sümaa tü nuluwataakalü anain Jehová, eʼrülii naya wayumüin. Wanaa sümaa neʼikajaain na israelitakana tü nasülajüinkat nümüin Maleiwa, naapaain saʼanasia tü asalaakat. Nütüjaa aaʼu Elí tü kasa mojusü naaʼinrakat na nüchonniikana, nnojotpajaʼa kasain naaʼinrüin otta nnojoishii nüchiaain naya. ¿Kaseetche naaʼinraka Jehová?

Mayaapejeʼe joʼuuin Samuel noulia na nüchonniikana Elí, nnojoishi nia aainjain kasa mojusü maʼaka naaʼin nayakana. Müshijeseʼe talatüin maʼin Jehová nümaa. Soʼu wanee ai wanaa sümaa nutunkuin Samuel, ounejünüshi nia. Nütamaaka Samuel sümaa nuwataain eemüin Elí, nümaka nümüin: «Anii taya». «Nnojoishi tounejüin pia. Puʼuna putunkai püchikuaʼa», nümakalaka Elí nümüin. Ounejünüshi Samuel piantua, nuʼunaka nüchikuaʼa eemüin Elí. Shiasaʼa apünüintuapa nuunejünüin Samuel, niyaawata aaʼu Elí niain Jehová ounejaka Samuel. «Puunejünapa püchikuaʼa, meechi pia: ‹Paashajaa Jehová, naapüin pünüiki chi püchepchiakai›», nümakalaka Elí nümüin Samuel.

Niisalaaka Samuel nüchikuaʼa. Shiasaʼa naapapa nünüiki Jehová, nusoutaka: «Paashajaa Jehová, naapüin pünüiki chi püchepchiakai». Nusoutaka Jehová nümüin: «Püma nümüin Elí kasalajaneerüin tatuma naainjala otta naainjala na nüpüshikana, nütüjaa aaʼu naainjain kasa mojusü na nüchonniikana otta nnojoishii nüchiaain naya». Waneemüin kaʼi, nujutalüin Samuel soʼu tü aʼwaajüleekat maʼakaapuʼu shia nutuma. Mmotshi nia seema nüküjain nümüin Elí tü nümakat Jehová. Nüsakitka nia Elí: «Tachonchee, ¿jamüsü nünüiki Jehová pümüin?». Nüküjaka shia nümüin Elí.

Ajaʼpülaashi Samuel, ayatüshi aleewain maʼin nia nümaa Jehová. Natüjaa aaʼu napüshuaʼa na israelitakana nüneeküin nia Jehová süpüla nünüikimaainjachin nia otta süpüla nekiipüʼüin nia na israelitakana.