¿Eeshi mmoluwaire pia?

¿Piʼrüin chi jintüichon suluʼukai tü ayaakuaakat? Mojusü naaʼin otta mmotshi maʼin. ¿Alatüirü pümüin tü alatakat nümüin chi jintüikai?... Eeshii mmoluwaire waya otta mojuwaire waaʼin. Aashajaasü tü Wiwüliakat nachiki waneeinnua wayuu mojukana aaʼin sümaa mmoluin naya. Alatüsü tia nümüin Elías. Jooʼu wekirajaai nüchiki.

Chapuʼushi kepiain Elías suluʼu tü mmakat Israel, nnojoliiwaʼaya joʼuuin Jesuu. Nia sülaülaka Israel Acab, nnojoishi nuʼwaajüin Jeʼwaa. Jezabel sünülia nuʼwayuuse Acab. Nia naʼwaajaka Baal, wanee maleiwayaashi. Makalaka noʼttüin na wayuu chajanakana Israel sünain aʼwaajaa Baal. Mojulaasü maʼin Jezabel otta suʼutee aaʼinchii na wayuu aʼwaajakana Jeʼwaa. ¡Ouktüinjachi Elías sutuma Jezabel! ¿Kasache naainjaka Elías?...

Apantajaashi wattamüin, eemüinre anoulin tü mmakat otta nuunjulaaka suluʼu wanee koʼushii chayaa. ¿Jamüshi nüpantajaaka Elías?... Süka shiyoʼujaain naaʼin. Motusü naaʼin Elías pülain maʼin Jeʼwaa. Süpülapünaachon müin nukuwaʼipa Elías, achuntüshi nia kaaliinwaa nümüin Jeʼwaa, sujuʼitaaka iipünaajee wanee kasa müsü aka saaʼin suwarala siki. Niʼrüin Elías nükaaliinjünüin nutuma Jeʼwaa. ¿Jama jooluʼu? ¿Akaaliinjüneeiche nüchikuaʼa nutuma Jeʼwaa?

Shiasaʼa müin chapa Elías suluʼu koʼushiika, müshi Jeʼwaa nümüin: «¿Jamüshikai yaaka pia?». Nümaka Elías nümüin Jeʼwaa: «Waneeshichon taya sünain aʼwaajaa pia. Ayoʼujaasü taaʼin seema toʼutünüin aaʼin, nnojoishi oukteein taya». Ouktayaashii naaʼinruʼu Elías napüshuaʼa na wayuu aʼwaajakana Jeʼwaa. Nümaka Jeʼwaa nümüin Elías: «Nnojoishi pümüiwaʼain pia. Eeshii siete miit wayuu aʼwaajakana taya. ¡Toolo paaʼin! Eesü wanee aʼyatawaa taapüinjatka pümüin». ¿Talatüsüche naaʼin Elías sutuma nünüiki Jeʼwaa?...

¿Kasa shikirajaka anain pia tü naainjakat Jeʼwaa nükajee Elías?... Nnojo mojuin paaʼin, nnojoishi pümüiwaʼain pia. Eeshii pümaa wayuu aikana apüla Jeʼwaa otta aishi pia napüla. Pülashi maʼin Jeʼwaa otta nükaaliinjeechi pia waneepia. ¿Talatüsü paaʼin sutuma tia?...