Ojutajaasü tü palaakat

Wanaa sümaa naapüin faraón noʼunuin na israelitakana Egiptojee, isasü naaʼin süchiirua nüjütüin naya. «Jüsaaja tü weʼejena watkaayakat, woʼunaiwa nachiirua. Mojusü tü waaʼinrakat süka wooʼulaain noʼunuin», nümaka namüin na nusurulaatsekana. Nuʼunaka Faraón otta na nusurulaatsekana nachiirua na israelitakana.

Nuʼunirüin Jehová tü nupueulosekat. Eesü nutuma wanee siruma soʼukai jee chuwatüsü nutuma wanee siki iipünaa saʼwai. Nüntirüin naya sotpaʼamüin tü palaa Ishosükat jee nuutkajeʼerüin naya yala.

Mapa, neʼrüin na israelitakana sein faraón nachiirua namaa na nusurulaatsekana. Nnojoishii jalapünaainjanain naya. Namaka na israelitakana sümaa emetuluin nanüiki nümüin Moisés: «Püntirüin waya yaamüin süpüla woʼutunuinjanain aaʼin. ¿Jamüshii pujuʼitiraka waya Egiptojee?». Nusoutaka Moisés namüin: «Nnojo mmoluin jia, jiʼitaa jaaʼin nünain Jehová, jiʼraiwa tü naaʼinrajatkat süpüla nuʼtteʼerüin jia». Niʼitaain maʼin naaʼin Moisés nünain Jehová ¿aashimüin?

Nümakalaka Jehová namüin na israelitakana noʼunuinjanain yalejee. Soʼu aikat tia, niʼitaain Jehová tü sirumakat nachiiruajee. Piyuushisü napüleerua na egipciokana otta eejanale na israelitakana warattuuisü.

«Paapaa puwaraaratse, piyalera shia sünainmüin tü palaakat», nümaka Jehová nümüin Moisés. Süchikijee tia, katsüinjaaka wanee joutai nutuma Jehová. Sujutajaaka tü palaakat. Nalataka na israelitakana pasanainpünaa sünain tü palaakat sümaa josoin napüleerua.

Oʼunushii na nusurulaatsekana faraón nachiirua na israelitakana suluʼupünaa tia wopukot. Nnojoishii nuuʼulaain Jehová na egipciokana nalatüin süka anakalü akuwaʼipa, aakajüsü suuʼui neʼejena. Namaka na surulaatkana sümaa emetuluin nanüiki: «¡Outeena waya! Waleʼejaa wachikuaʼa, nia Jehová atkaakai süpüleerua nupueulose».

«Piyalera pajapü sünainmüin tü palaakat», nümaka Jehová nümüin Moisés. Naaʼinrapa tia, sujutaaka tü palaakat nooʼomüin na surulaatkana, wüinsitshi faraón otta na nusurulaatsekana. Outushii naya napüshuaʼa.

Wanee saʼata tü palaakat, naʼwaajüin Maleiwa na israelitakana sümaa neeʼirajüin jayeechikat tüü: «Jiiʼiraja nümüin Jehová süka niain Miyoʼushin saaʼu kasakat süpüshuaʼa. Wüinsitshi nutuma chi amakai jee chi naajuchikai». Eeʼirajüshii naya napüshuaʼa otta ayonnajüsü maʼin tü jieyuukalüirua sümaa natalejüin pandereta. Talatüshii maʼin napüshuaʼa süka nnojoliinnapain achepchieein naya.