Moisés: Wanee wayuu kanoulakai maʼin
¿KASA SÜNAINPÜNAAKA TÜ KANOULAAKAT?
«Süka tü wanoulakat, atüjaashii waya naaʼu chi Maleiwakai sünain naaʼinrüinjatüin tü kasa anasü nüküjakat achiki wamüin. Wayaawatüin sütüma sünain shiimüin tü kasa meʼrujukat» (Hebreokana 11:1).
¿KASA NIIʼIYATAKA AKA MOISÉS KANOULAIN NIA?
Sükajee tü kasa nüneekakat Moisés, niiʼiyatüin nunoujüin sünain tü kasa naapüinjatkat Maleiwa (Génesis 22:15-18). Mayaapejeʼe eein süpüla talatüin nia chaa Egipto süka nnojoluin kasain choʼujaain nümüin, «anasü saaʼin nümüin müliajiraain [sümaa nupueulose] Maleiwa suulialeʼeya talataa aaʼin palit juya saʼaka kaainjalaa» (Hebreokana 11:25). ¿Nüneeküin neʼe tia süpaʼa mmaka? ¿Mojusü naaʼin saalii nüneeküin tia? Nnojorüleejaʼa, müsü tü Wiwüliakat nüchiki: ‹Ayatshia nia sünain müin niʼrakai naaʼin chi Meʼrujusaikai› (Hebreokana 11:27). Nnojotsü mojuin naaʼin saalii tü nüneekakat.
Nüchajaain sukuwaʼipa Moisés süpüla nüchecherüin nanoula na waneeinnua. Naainjüin tia napüleerua na israeliitakana süka neimmolojooin sutuma pejein maʼin na egipciokana nachiirua otta yaain tü palaa ishosükat napüleerua. Nachuntaka kaaliinwaa nümüin Jeʼwaa otta Moisés sümaa nayoʼujaain maʼin aaʼin. ¿Kasa naainjaka Moisés?
Eetaayaai antapünaain suluʼu nikii Moisés sukumajaainjatüin wanee wopu pasanainpünaa sünain tü palaa Ishosükat süpüla nalatüinjanain na israeliitakana. Shiaʼala neʼe nütüjaaka aaʼu nakaaliinjüneenain nutuma Maleiwa otta keeʼireesü naaʼin jülüjüinjatüin naaʼin tia na israeliitakana. Müsü Éxodo 14:13, NM: «Müshi Moisés sümüin tü pueulokot [Israel]: ‹Nnojo mmoluin jia. Eeja jaaʼin; jiʼrajaʼalaataajeerü juʼtteʼennüin soʼukai nutuma Jeʼwaa›». ¿Nüchecherüin Moisés nanoula na israeliitakana? ¡Jamüsüsaʼa! Müsü tü Wiwüliakat: «Süka shiimüin nanoula nünain Maleiwa, nountüin nalatüin pasanainpünaa sünain tü palaakat maa aka sooʼopünaa mma jososü» (Hebreokana 11:29). Anasü maʼin nukuwaʼipa Moisés sutuma kanoulain nia otta kanoulashii na waneeinnua sutuma neʼrüin tü nunoulakat.
¿KASA SHIKIRAJAKA ANAIN WAYA NUKUWAʼIPA MOISÉS?
Wanoujüinjatü anain tü naainjüinjatkat Maleiwa otta weeʼiyatüinjatü sükajee tü kasa waneekakat. Naashin Maleiwa naapeerü tü kasa choʼujaakat wamüin shiale palajanain watuma tü Nuluwataayakat (Mateo 6:33, NM). Eeshii woʼuneere süchiirua kamaʼanaa wainma kasa, akatsaʼa nnojoleerüin kasain choʼujaain wamüin talatüle waaʼin sümaa tü kasa wamaʼanakat otta jülüjüle waaʼin aʼyatawaa nümüin Jeʼwaa. Müshi nia wamüin: «Nnojoleechi taya oʼunüin jümaʼanajee. Nnojoleena tapütüin jia jümüiwa» (Hebreokana 13:5).
Wachecherüinjatü nanoula na waneeinnua. Na wayuu kachonniikana nekirajüinjana nachonnii sünain kanoulaa nünain Maleiwa. Ekirajünüinjana joʼuuiwaʼaya naya sünain eein chi Maleiwakai, natüjaainjatü aaʼu kasain niyouktüin otta kasain nücheküin. Nayaawatüinjatü aaʼu aneerüin nakuwaʼipa noonoole sümaa tü nümakat Jeʼwaa (Isaías 48:17, 18). ¡Anashaateerü maʼin nakuwaʼipa na tepichikana nakaaliinjünüle süpüla nanoujüinjanain sünain eein chi Maleiwakai otta naapüin kasa anasü namüin na achajaakana maʼin nüchiki! (Hebreokana 11:6, NM.)