Nikeraajüin Jefté nünüiki

Motushi Jehová naaʼin na israelitakana nachikuaʼa, noʼttaka sünain aʼwaajaa tü maleiwayaasükalüirua. Wanaa sümaa nashutuin naaʼu na wayuu chajanakana Ammón, nnojoishii akaalinjünüin sutuma tü maleiwayaasükalüirua. Müliashii maʼin naya atumawaa soʼu wainma juya. «Moto paaʼin waainjala Jehová. Jalia maa waya noulia na waʼünüükana», namakalaka mapa nümüin Jehová. Najaʼttiraka tü maleiwayaasükalüirua otta naʼwaajaka Jehová nachikuaʼa. Amülialaasü naaʼin Jehová naalin.

Naneekaka na israelitakana Jefté, wanee wayuu yalayala aaʼinchi sünain atkawaa. Niainjachi Jefté nekiipüʼüka sünain atkawaa namaa na ammonitakana. Anuu nünüiki Jefté nümüin Jehová: «Müleka wakanajüle na waʼünüükana, taapeerü pümüin tü palajatkat wayuu apanapajakai taya tantapa tepialuʼumüin shiʼyataaiwa pümüin suluʼu tü miichi aʼwaajüleekat». Naapüin Jehová nünüiki Jefté otta nakanajuuka na naʼünüükana.

Nüleʼejapa Jefté nipialuʼumüin, shia apanapajaka nia tü waneesüchonkat nüchon, ayonnajüsü shia otta atalejüsü pandereta nüpanapa. ¿Kaseetche naaʼinraka Jefté? Sotojaasü naaʼin tü nümakat Jehová nümüin. «Tachonchee, mojushaatasü taaʼin paaʼujee, taapüin tanüiki nümüin Jehová. Süpüla tekeraajüin tü tanüikikat, taluwataainjatü pia süpüla piʼyataainjatüin nümüin Jehová chaa Siló suluʼu tü aʼwaajüleekat», nümakalaka sümüin tü nüchonkot. Susoutaka tü nüchonkot: «Müleka paapüitpale pünüiki nümüin Jehová, pikeraaja shia. Shiajaʼa neʼe tachuntuin pümüin puuʼulaaiwa toʼunuin palajana sümaa taʼaleewainyuu saaʼumüin tü uuchikat soʼu piama kashi. Oʼuneerü taya mapa eere tü aʼwaajüleekat Maleiwa». Waneepiasü tü nüchonkot Jefté nümaa Jehová, aʼyataasü shia suluʼu tü aʼwaajüleekat süpüla kaʼikat süpüshuaʼa. Oʼunawaishii juyawai na saʼaleewainkana sünain anaʼlawaa sümüin.