Katchinshi Sansón nutuma Jehová

Watta naalii na israelita oʼttakana nachikuaʼa sünain aʼwaajaa tü maleiwayaasükalüirua. Niyüülajaka Jehová tü mmakat Israel najapuluʼu na filisteokana. Eejanapajaʼa israelita aika apüla Jehová, maʼaka naaʼin Manóah. Machonsat nuʼwayuuse Manóah nümüin. Soʼu wanee kaʼi, nuluwataain Jehová wanee aapiee süpüla nümüin sümüin tü nuʼwayuusekat Manóah: «Kachoinjatü pia. Chi püchonkai nia chi oʼtteʼerüinjachikai na israelitakana noulia na filisteokana otta nazareoinjachi nia». ¿Pütüjaa aaʼu jaraliin na wayuu nazareokana? Naya na wayuu nüneekakana Jehová süpüla wanee aʼyatawaa otta nnojoishii süpüla noʼyoteʼerüin naʼwala.

Jemeyutka mapa nuʼwayuuse Manóah, niʼitaaka nünülia chi joʼuukai Sansón. Miyoʼupa Sansón, katchinshi maʼin nia nutuma Jehová. ¡Eeshi süpüla nuʼutuin naaʼin wanee wasashi süka najapü! Soʼu wanee kaʼi nuʼuta aaʼinchii 30 filisteo nümüiwaʼa. Üttüsü naaʼin na filisteokana nünain Sansón otta nachajaain sukuwaʼipa süpüla noʼutuin naaʼin. Soʼu wanee ai, chajachi Sansón atunkuin suluʼu tü mmakat Gaza, oʼunushii na nüʼünüükana sünain aʼatapajaa nia soʼuluʼu tü pueulokot süpüla noʼutuin naaʼin. Nütamaaka Sansón süseʼeruʼupünaa aikat, naapaain supuettoʼuse tü pueulokot jee nülüʼüjaka shia nunuloʼu saaʼumüin wanee uuchi pejesü sünain Hebrón.

Noʼunaka na filisteokana mapa süpüla naashajaain sümaa Dalila, tü nümüraajüinkat Sansón. «Waapeerü pümüin watta saalii nneerü pülaata, püküjale wamüin kasain katchin maʼin atuma Sansón», namaka sümüin. Anasü sümüin Dalila tü namakat na filisteokana sümüin süka keeʼireein saaʼin tü nneetkat. Nnojotsü nüküjeein Sansón sümüin Dalila jamüin katchinka maʼin nia. Ayatüsü Dalila sümaa süsakiijakuʼu sümüin Sansón. «Nnojotyülia oʼyotoonuin taʼwala, süka nazareoin taya, müleka shiʼyotoonüle taʼwala, nnojoleechi katchin taya», nümakalaka sümüin. Mojusü tü naaʼinrakat Sansón süka nüküjain sümüin Dalila tü katchinkalü atuma nia. ¿Jamüsüjaʼa saaʼin pümüin?

Awataamaatüsü Dalila eemüin na filisteokana. «Tatüjaaitpa aaʼu kasain wayu katchinka atuma Sansón», sümaka namüin. Sutunkiraka Dalila Sansón otta shikerotiraka wanee wayuu süpüla niʼyotooin tü nuʼwalakat. «¡Sansón, antüshii na filisteokana!», sümaka nümüin. Nüchijiraapa Sansón, matchinsai nia. Nütaʼünnaka natuma na filisteokana, nayuʼluin tü noʼukot jee püreesaka nia natuma.

Soʼu wanee kaʼi, jutkatüshii na filisteokana eere naʼwaajüin Dagón, chi namaleiwasekai. «Nia chi wamaleiwasekai aapakai Sansón wajapuluʼu, jüsaaja nia süpüla wemeeʼerainpalain nia», müshii naya sünain naʼwaatüin. Yalajachi Sansón sünain suuʼui tü miichikat, nemeeʼerainpalaka nia na filisteokana. Emiyoʼulaasü süchikuaʼa tü nuʼwalakat. Nuʼwaataka Sansón: «Jehovákalee, katchin taya tachikuaʼa putuma». Nujutaka süchiki süsaʼa tü miichikat. Nujuttiraka tü miichikat, outaleeka napüshuaʼa na yalajanakana suluʼu. Müshia Sansón outushi nia soʼu tia.