Waneepiashi Jonatán sümaa yalayalain naaʼin

Jonatán nünülia chi palajachikai nüchon Saúl, surulaat yalayalaa aaʼinchi nia. Nüküjain David kawatirain maʼin nia nuulia wanee warulapai otta katchinreeshia nia nuulia wanee león. Soʼu wanee kaʼi, niʼrüin Jonatán waneinnua surulaat filisteo saaʼu wanee uuchi. «Ashuteena waya naaʼu müleka niiʼiyatüle wamüin Jehová wanee shiyaawase», nümaka nümüin chi surulaat nümaakai. «¡Jalainna jütkaai wamaa!», namaka na filisteokana. Noʼunaka saaʼu tü uuchikat piamaleʼe otta najaʼttiraka 20 surulaat filisteo.

Süka niain Jonatán chi palajachikai nüchon Saúl, niainjachi aluwataaka saaʼu Israel outapa chi nüshikai. Nütüjaapejeʼe saaʼu Jonatán niain David chi nüneekakai Maleiwa süpüla aluwatawaa saaʼu Israel otta nnojoishi nia achunjuin saaʼu tia. Aleewashi maʼin Jonatán nümaa David. Pansaasü nanüiki sünain nakaalinjiraainjanain waneepia. Sutuma aleewain maʼin Jonatán nümaa David, naapüin nümüin tü nüsheʼinkat, nüchajaruutse, wanee uraichi sümaa jatü otta wanee siʼira aainjuushi süka paaʼata.

Wanaa sümaa nuunjulaain David nuulia Saúl, chejeeshi Jonatán anaʼlaain nümüin. «Meimmoluinjachi pia otta yalayalainjatü paaʼin, nüneeküin pia Jehová süpüla puluwataain saaʼu Israel. Jaʼitakajeʼe chi tashikai, nütüjaa aaʼu tia», nümaka nümüin David. ¿Pücheküin müinjachin wanee paʼaleewain maʼaka naaʼin Jonatán?

Kojuyatua nükaalinjain Jonatán chi naʼaleewainkai, mayaapejeʼe eein süpüla nuʼutunuin aaʼin. Nütüjaa aaʼu Jonatán nuʼutuneein aaʼin David nutuma Saúl. «Kaainjaleechi pia müleka puʼutule naaʼin David. Nnojotsü kasain naainjalain David», nümaka Jonatán nümüin chi nüshikai. Jashichishaatashi Saúl nümüin Jonatán. Maʼaka jeʼra juya mapa, oʼutuna aaʼinchi Saúl nümaʼaleeya Jonatán sünain wanee atkawaa.

Outapa Jonatán, nüchajaain David wanee nüchon kanüliakai Mefibóset. «Takaalinjeechi pia waneepia süka taʼaleewainpuʼuin maʼin chi püshikai. Kepieechi pia eere taluwataain otta joyoteechi pia tamaa sünain ekawaa», nümaka nümüin. Nnojoishi motuin naaʼin David chi naʼaleewainkai.