Asoʼireʼennüsü naaʼin Lázaro nutuma Jesús

Eejana apünüinshii naʼaleewainyuu Jesús kepiakana chaa Betania. Lázaro, María otta Marta nanülia. Pawalaawashii naya. Soʼu wanee kaʼi, chajachi Jesús waneemüin saʼata tü süchikat Jordán. Shiasaʼa María sümaa Marta naluwataaka wanee pütchi nümüin Jesús: «Mayeinshi maʼin Lázaro. Anashi püntamaatüle». Nnojoika nuʼunamaatüin Jesús, naʼatapajüin sülatüin piama kaʼi. «Anakajaʼa waleʼejüle wachikuaʼa Betaniamüin. Chi watünajutkai Lázaro, atunkushi nia. Chainjachikaʼa joo taya sünain achijiraa nia», nümakalaka mapa namüin na nikirajüinkana. Nasoutakalaka nümüin Jesús na aluwataaushikana: «Müleka nutunkule Lázaro, analeerü naaʼin». Lotoka joo nünüiki Jesús namüin: «Outuichipa Lázaro».

Nüntapa Jesús Betaniamüin, eeirü maʼaka pienchi kaʼi süchikijee niʼitaanüin Lázaro. Antüsü wainma wayuu shipialuʼumüin Marta jee María sünain alapajaa naaʼu. Saapaiwaʼaya Marta nüchiki Jesús sünain nüntüin, süpanapajaka nia. «Señotkalee, müleka yaajachireje pia, nnojoishije outuin chi tawalakai», sümaka nümüin Jesús. Nümaka Jesús sümüin: «Osoʼiraweechi aaʼin chi puwalakai. ¿Aashin punoujain anain tü tamakat pümüin?». «Aa, tatüjaa aaʼuchi sümaa nüsoʼiraweechin aaʼin soʼu tü kaʼi süsoʼiraainjatkalü oʼu tü wayuukalüirua», sümakalaka Marta nümüin. «Tayakai, taya atüjaka osoʼireʼeraa saaʼin wayuu süpüla katüinjatüin soʼu waneepia», nümakalaka Jesús sümüin.

Suʼunaka Marta eemüin María jee sümaka sümüin: «Isaa antüin Jesús». Suwataaka María eemüin Jesús jee sukoʼulaka wayuu süchiirua. Süntapa María eemüin Jesús, süsapainkasü shia nümülatuʼu sümaa shiʼyalajüin maʼin. «Señotkalee, müinka yaajachireje pia, nnojoishije outuin chi tawalakai», sümaka María nümüin Jesús. Niʼrapa Jesús María sünain aʼyalajaa maʼin, niʼyalajaka. «Aireekaijaʼa maʼin nia nüpüla», namaka na wayuukana sutuma neʼrüin Jesús sünain aʼyalajaa. «¿Jamüshi nnojoikaʼa niiyajüin paala chi wayuukai suulia outaa?», eeshii joo na makana. ¿Kasakaʼa naaʼinrüin Jesús?

Nüntaka Jesús amuuyuupaʼamüin. Eejachire niʼitaanüin müliashii, müsü aka saaʼin wanee paü keʼipolosü wanee ipa miyoʼu. «Jüsünneʼera türa shirousekat», nümaka Jesús. «Señotkalee, keejuuichin, pienchitchi kaʼi süchiiruajee niʼitaanüin», sümaka Marta nümüin. Süsünneʼennaka tü shirousekat. Nuʼuraajaka Jesús sünain müin nünüiki: «Taataa, taapüin pümüin analuʼut maaʼulu yaa süka paapüin tanüiki. Tamüsü tüü süpüla naapüinjatüin na wayuu yaakana yaa süpüla nanoujain sünain püjünalain taya». Nümaka Jesús sümaa emetuluin nünüiki: «Lázaro, pujuʼitaa». Nujuʼitaaka chi outushikai sünain katüin noʼu, koʼoyoosü süka kuluulu najapü, nuuʼui ooʼulaka nuʼupünaa. «Juwasta nuulia türa koʼoyookat akan nia. Juuʼulaapa nuʼunaiwa nümüiwaʼa», nümaka Jesús.

Wainma na wayuu anoujakana nünain Jesús sutuma neʼrüin tü kasa pülasü naaʼinrakat. Otta waneinnua, oʼunushii nanainmüin na fariseokana sünain aküjaa namüin süchiki tü naaʼinrakat Jesús. Soʼujeʼereeya kaʼikat tia, nachajaain sukuwaʼipa na fariseokana süpüla noʼutuin naaʼin Lázaro nümaa Jesús. Niasaʼa chi Judas Iscariote münakai, wanee napüshi na aluwataaushikana, oʼunushi nia ojuunaa sünain maa namüin na fariseokana: «¿Jeʼreerü juwalaajüin tamüin müleka taapüle nikii Jesús jümüin?». Naküjaka süchiki nawalaajüinjachin nia süka 30 nneerü pülaata. Anaka tia nümüin Judas jee nüchajaaka sukuwaʼipa süpüla naapüin nikii Jesús namüin.