Asoʼiraajeerü Naaʼin na Wayuu Ouktüinnakana

¿Punouja anainrü nasoʼiraajeenain aaʼin na wayuu ouktakana? Anashantasü maʼin weʼrüle nachikuaʼa na wapüshi anaajaakana. ¿Shiimainchejeʼeya nasoʼiraajeenain aaʼin na wayuu ouktakana? Süpüla watüjaainjatüin saaʼu tia, anashii wekirajaale sünain tü alatakat namüin na aluwataaushiikana nutuma Jesuu.

Nanouja anainrü na aluwataaushiikana süsoʼiraainjatüin naaʼin na wayuu ouktakana. Eesü piamasü kasa nanoujaka anainjee sünain tia. Tü palajatkat shia süka neʼrüin Jesuu süchikijee süsoʼireʼennüin naaʼin nutuma Maleiwa. Eeʼiyataashi nia namüin nayakana otta «namüin maa aka 500 wawalayuu» (1 Corinto 15:⁠6). Eesü karaloukta aashajaaka süchiki nüsoʼiraain aaʼin Jesuu otta wainma na wayuu anoujakana sünain tia maʼaka süküjünüin suluʼu tü nüshajakat Mateo, Marcos, Lucas otta Juan (Mateo 27:62–28:20; Marcos 16:​1-8; Lucas 24:​1-53; Juan 20:1–21:25).

Tü wanee kasa nanoujakalü anainjee na aluwataaushiikana shia neʼrüin Jesuu sünain asoʼireʼeraa saaʼin apünüinsü wayuu. Naainjüin tia chayaa Naín, Capernaum otta Betania (Lucas 7:​11-17; 8:49-56; Juan 11:​1-44). Wanee wayuu nüsoʼireʼerakai aaʼin Jesuu, nia nawala piamashii jieyuu aikana maʼin nüpüla. Anashii wekirajaale motsoʼo sünain tia.

«TAYA ATÜJAKA OSOʼIREʼERAA SAAʼIN WAYUU»

«Osoʼiraweechi aaʼin chi puwalakai», müshi Jesuu sümüin Marta. Alatüirü pienchi kaʼi süchiiruajee niʼitaanüin. Nnojotsü shiyaawatüin aaʼu Marta tü nüküjakalü achiki Jesuu sümüin. Maaʼatsü neʼe shia nümüin: «Aa, tatüjaa aaʼuchi sümaa nüsoʼiraweechin aaʼin sümaa wayuu süpüshua soʼuweena tü kaʼi sajaʼlajaainjatkat oʼu kasa süpüshua». Nümakalaka Jesuu sümüin: «Taya atüjaka osoʼireʼeraa saaʼin wayuu». ¿Jamüsüche saaʼin Marta sutuma tü nümakat Jesuu? (Juan 11:​23-25, NM.)

¿Jalajachi Lázaro suʼunnaa tü pienchisü kaʼi ouktakalü oʼu nia? Nnojotsü nüküjüin achiki chajachin nia suluʼu wanee mma. Nnojotsü ayuʼlaain nuulia wanee kasa süpüla chainjatüin shia iipünaa nümaa Maleiwa. Nnojoishi nia nüsaajaain Jesuu chejee iipünaajee süpüla yaainjachin nia mmapaʼa nüchikuaʼa. ¿Jalajaika nia? Yalajachi nia suluʼu tü woowirakat, müshi nutunkakai aaʼin (Eclesiastés 9:​5, 10).

Naashin Jesuu, müsü aka saaʼin atunkaa tü ouktaakat. Müshi nüchijinnakai aaʼin wanee wayuu nüsoʼireʼennapa aaʼin. Müsü Juan 11:​11-14: «‹Chi watünajutkai Lázaro, atunküshi nia. Chainjachikaʼa joo taya sünain achijiraa nia› nümakalaka namüin. Namakalaka na nikirajüinkana nümüin: ‹Senyotkalee, müleka nutunküle, analeerü naaʼin›. Tü nümakat Jesús, shia nüchiki Lázaro sünain ouktüin nia. Otta saaʼin namüin na nikirajüinkana, atunkayaajaʼa neʼe naaʼinruʼu. Lotokalaka joo nünüiki Jesús namüin: ‹Ouktüichipa Lázaro›». Asoʼiraasü naaʼin Lázaro nutuma Jesuu otta naapüin nia sümüin nüpüshi. Anashaatasü maʼin tü naainjakat Jesuu sümüin nüpüshi Lázaro.

Süka nüsoʼireʼerüin saaʼin wayuu Jesuu, watüjaa aaʼu naainjeerüin tia soʼu palitchon kaʼi Nuluwataapa suluʼu Nuluwataaya Maleiwaa. Nuluwataapa yaa saaʼu mmaka, asoʼiraajeerü saaʼin tü wayuu ouktüsükalüirua. Müshijeseʼe nümüin Jesuu: «Taya atüjaka osoʼireʼeraa saaʼin wayuu». Jülüjataa paaʼin talateerüin maʼin naaʼin wainma wayuu neʼrapa süsoʼiraain naaʼin na napüshikana otta talateenain maʼin na wayuu asoʼiraajeenakana aaʼin (Lucas 8:56).

MÜICHIA NNOJOLIN OUKTÜIN PIA MÜLEKA KANOURALE PIA

Müshi Jesuu sümüin Marta: «Taya atüjaka osoʼireʼeraa saaʼin wayuu. Chi eekai nünoujüin tanain, jaʼitaichi ouktüin, kateerü noʼu nüchikuaʼa tatuma. Chi eekai katüin noʼu nüchikuaʼa sümaa kanoulain nia tanain, müichia nnojolin ouktüin» (Juan 11:​25, 26, NM). Na nüsoʼireʼerüinjanakana aaʼin Jesuu suʼunnaa tü miitkat juya, müinnia nnojoliin ouktüin müleka kanourale naya nünain.

Süchikijee nüküjüin Jesuu tia sümüin Marta, nümakalaka sümüin: «¿Kapülasü paaʼin tü tamakat pümüin?». Susouktaka niʼipajee: «Aa, tanoujain sünain piain Cristoin chi Nüneekajalakai Maleiwa» (Juan 11:​26, 27). ¿Meesia punoula maʼaka saaʼin sunoula Marta? Mülejeʼeya shia, acheküshi pikirajaain sünain tü nüchekakat Jeʼwaa süpüleerua tü wayuukalüirua (Juan 17:​3, NM; 1 Timoteo 2:⁠4). Paainjüle tia, kanouleechi pia. Püma namüin na aküjüliikana pütchi nüchiki Jeʼwaa neeʼiyatai pümüin tü sümakat tü Wiwüliakat süchiki nasoʼiraainjanain aaʼin na wayuu ouktakana. Paainjüle tia, naküjeerü pümüin tü shikirajakalü anain tü Wiwüliakat.