EKIRAJAAYA 14

Püküja pütchi anakat maʼin

Hebreokana 8:1

PÜTÜJAINJATKA APÜLEERUA: Pükaalinja na wayuukana süpüla jülüjain naaʼin tü pünüikikat. Püküja namüin jamüin pansaaka tü pütchi paashajaakat maʼin achiki sümaa tü pütchi anakat maʼin.

SUKUWAʼIPAINJATKA

Jülüja paaʼin kasapülajatüin pikirajaka wanee pütchi. Jülüja paaʼin püküjainjachire wanee kasa natüjaainjatka aaʼu na wayuukana, piiʼiyatüinjatüle namüin shiimain wanee kasa otta pütütüleʼerüinjatüle naaʼin. Pikiraja naya sünainpünaa tia.

Püsakira paaʼin: «¿Kaseetche nasakiraka anain na wayuukana? ¿Jama naküjale nnojoluin shiimain wanee kasa? ¿Kaseetche nasakiraka anain palajana?». Süchikijee tia, pukumaja sukuwaʼipa tü pünüikinjatkat wanaapünaa sümaa tü nasakirüinjatkalü anain palajana, nayaawateetka saaʼu otta anashiijeerü namüin.
Püküja kasain paashajaain maʼin achiki. Sümaʼainruʼu pikirajüin tü pütchikat, püküjainjatü kasain saashajaain maʼin achiki, eesü süpüla paaʼinrüin shia sükajee waneirua pütchi meemataka saaʼin tü püküjakat paala.
Mapüleeinjatü tü pütchi anakat maʼin otta pansaainjatü shia. Shiainjatü püneekaka tü pütchi sünainpünaakat tü paashajaakalü achiki otta keraaka sümaa tü minuuto eʼitaanakat püpüleerua. Nnojo püküjain süpüshuaʼa tü pütchi anakat maʼin, püneeka tü choʼujaakat maʼin otta ashaʼwalaain müinjatü pünüiki süpülapünaa püküjain jaralüin tü wane pütchi anakat maʼin.

Eesü süpüla püküjain suʼttaiwaʼaya pünüiki jaralüin tü pütchi anakat maʼin, nayaawateetka shia na wayuukana. Eesüjaʼa süpüla püküjain shia süchikuaʼa sajaʼlajaayamüin pünüiki, soteetka shia naaʼin na wayuukana.