PIKIRAJA WAYUU
EKIRAJAAYA 11
Mapülee putuma pikirajia
Pütchi shiyuʼluushika anainjee: Jujuʼitira wanee pütchi eekai mapüleein (1 Cor. 14:9).
Tü sukuwaʼipakat nutuma Jesús
1. Pünaja tü VIDEOKOT jee shiale paashajeʼerüin Mateo 6:25-27. Süchikijee tia püsakira sünain pütchikat tüü:
1. ¿Kasa niyaawajeʼerakaʼa amaa Jesús tü naaʼinrakat Jehová süpüla naaʼinmajüin waya?
2. Mayaainjeʼe wattain saalii kasa nütüjaaka aaʼu Jesús süchiki wüchii ¿kasa tü nütütüleʼeraka aka saaʼin wayuu? ¿Jamüsü anakaʼa maʼin tü naaʼinrakat süpüla nikirajüin wayuu sükajee?
Tü watüjakat nünainjee Jesús
2. Mapüleere watuma sukuwaʼipa wekirajia, soteerü saaʼin wayuu tü wekirajakalü anain jee sütanaleerü saaʼin tü pütchikat.
Waaʼinra tü naaʼinrakat Jesús
3. Nnojo paashajaain maʼin. Nnojo püküjain süpüshuaʼa tü pütüjaakalü aaʼu süchiki wanee kasa, shia jülüja maʼin paaʼin tü saashajaakalü achiki tü karaloʼuta pikirajakalü aka. Nnojo püshapajaajaain süpüla nusoutuinjachin chi pikirajüinkai shiʼipajee tü püsakirakalü anain. Nnojorüle nütüjaain saaʼu susoutia tü pütchikat jee nüküjale neʼe wanee kasa naata suulia tü shikirajakat tü Bibliakat, püchajaa sukuwaʼipa süpüla püsakirüin nia sünain wanee kasa niyaawateetka atuma tü pütchi ekirajünakalü anain. Niyaawatapa saaʼu chi pikirajüinkai tü ekirajüneekalü anain, ayataʼaya pikirajüin nia sooʼomüin tü pütchikat.
4. Püküja nümüin chi pikirajüinkai jamüin pansaaka tü pikirajakalü anain nia sümaa tü nütüjaaitpakalü aaʼu süchiki tü Bibliakat. Jamüsüjaʼa süpülapünaa pikirajüin süchiki nasoʼiraainjanain aaʼin na wayuu outushiikana, püsakira nia sotule naaʼin kasain alatüin nümüin wanee wayuu outapa nia.
5. Pikirajüinjachire sükajee sukuwaʼipa wanee kasa, piyaawata saaʼu anale shia. Süpülapünaa pikirajüin sükajee sukuwaʼipa wanee kasa püsakira paaʼin sünain tüü:
1. «¿Mapüleesatche tü tayaawajeʼerüinjatkalü amaa tü pütchikat?».
2. «¿Niyaawatamaateetche aaʼu chi tekirajüinkai tü tekirajeekalü anain nia?».
3. «¿Soteetche naaʼin tü tekirajakalü anain nia, shiataajeetpa neʼe sotuin naaʼin tü sukuwaʼipakat tatuma?».