Pürütkaa nünainmüin Maleiwa
Pütchi namüinjatü na mojukana aaʼin
«JAMATAʼALEESÜJAʼA süpüla alin taya nüpüla Jeʼwaa.» Müsü sünüiki wanee wawala kakaliaitka sünain mojuin saaʼin. Jülüjüsü saaʼin tia waneepia makalaka süntüin suluʼumüin saaʼin wattaluʼuin Maleiwa suulia. ¿Shiimain saaʼin pümüin wattaluʼuin Maleiwa noulia na anoujüshii mojukana aaʼin? Süpüla watüjaain saaʼu tia, wekirajaa sünain tü nümakat David suluʼu Salmo 34:18.
Süka niʼrüin müliaa David, nütüjaa aaʼu tü eekat süpüla sülatüin nümüin wanee aʼyataai nümüin Maleiwa shapaale maʼin naaʼin. Ounjulaakuʼu mapuʼushi David süka nuʼutüneein aaʼin nutuma Saúl, naainjeein tia süka nuchunjüin naaʼu David. Nuunjulaaka David suluʼu tü mma kanüliakat Gat, chaa Filistea. Oʼunüshi nia chamüin süka nnojoleechin nüchajaanüin achiki chayaa nutuma Saúl naashin; suumain nüʼünüü tia mmakat. Shiasaʼa müin niyaawatünaka David, oʼutünataaichijeʼe aaʼin, akaijasaʼaya mamainnayaain nia müichika nüjütünüin. Nuʼwaajüin David Maleiwa süka nükaaliinjünüin nutuma. Nüshajakalaka tü pütchi suluʼukat Salmo 34.
¿Jülüjüsüche naaʼin David wattaluʼuin Maleiwa noulia na mojukana aaʼin suʼunnaa tü müliaa neʼrakat? ¿Wattaluʼushiche Maleiwa noulia na wayuu jülüjakana aaʼin maalin naya nüpüla Maleiwa? Müshi David suluʼu Salmo 34:18, NM: «Nnojoishi wattaluʼuin Jeʼwaa noulia na mojukana aaʼin otta nükaaliinjüin na wayuu yüülakana aaʼin». Wekirajaa sünain jamüin sütütüleʼeraka waaʼin pütchikat tüü sümaa kaʼatapalain waya sutuma.
«Nnojoishi wattaluʼuin Jeʼwaa.» Tü aküjüneekalü achiki sükajee tia saashin wanee karaloukta «shia eejüin naaʼin chi Senyotkai [Jeʼwaa] süpüla nükaaliinjamaatüin tü nupueulosekat». Talatsü maʼin waaʼin süka watüjaain saaʼu eejüin naaʼin Jeʼwaa sünain tü alatakat wamüin maaʼutpünaa otta nütüjaain saaʼu tü suluʼukat waaʼin (2 Timoteo 3:1; Aluwataaushikana 17:27).
«Na mojukana aaʼin.» Tü nüküjeekalü achiki David naashin wanee wayuu karalouktamaajachi shia mojuin maʼin naaʼin wanee wayuu. Eesü süpüla mojuin maʼin naaʼin na wayuu aʼyataakana nümüin Maleiwa sutuma sülatüin kasa mojusü namüin.
«Na wayuu yüülakana aaʼin.» Antawaisü suluʼumüin nekii na wayuu mojukana aaʼin mojutüin naya atumawaa makalaka nnojoluin kasain naʼatapüin. Saashin wanee karaloukta namüinjatü na alatirüliikana Wiwülia suluʼumüin wanee anüikii naata, eesü süpüla sülatinnüin tia pütchikat mayaa: «Na nnojoliikana aʼatapüin kasa anasü».
¿Kasa naainjaka Jeʼwaa süpüla nükaaliinjüin «na mojukana aaʼin» otta «na yüülakana aaʼin»? ¿Wattaluʼushi nia noulia süka maalin naya nüpüla otta süka nnojoluin naaʼinmajüin naya? ¡Nnojorüleejaʼa! Nnojoishi wattaluʼuin Jeʼwaa noulia na wayuu achuntakana kaaliinwaa nümüin; müshi aka naaʼin wanee wayuu aikai apüla nüchon, nukoʼojoo anainchi otta nütütüleʼerüin naaʼin. Keeʼireesü naaʼin Jeʼwaa nütütüleʼerüin naaʼin na mojukana aaʼin otta na yüülakana aaʼin. Kekiijeena naya nutuma Maleiwa süpüla eejiraain sümaa tü kasa mojusü alatakat namüin (2 Corinto 4:7; Santiago 1:5).
Pikirajaa sünain tü paaʼinrajatkat süpüla pürütkaain nünainmüin Jeʼwaa. Müshi nia: «Eeshi taya [...] nümaa chi yüülakai aaʼin otta chi mojukai aaʼin süpüla tatütüleʼerüin naaʼin» (Isaías 57:15, NM).