PÜTCHI SÜNAINKA SÜTA TÜ REWIISÜTAKAT | ¿JÜLÜJÜSHICHE PIA NAAʼIN MALEIWA?
Naaʼinmajüin pia Maleiwa
«Niʼrüin Jeʼwaa jamüin nukuwaʼipa wanee wayuu otta niʼrüin tü naainjakat.» (JOB 34:21, NM)
Aaʼinmajüneeshi maʼin wanee jintüi joʼuuyüire nia
TÜ MANOULAKALÜ ATUMA WAYUU: Naashin na ekirajaashiikana watta maʼin saalii tü planeta münakat, eetaasüjaʼa maʼaka sien miit miyoone. Süka wainmain maʼin tü kasa anapüikat chaa aituʼupünaa. «¿Eeshiiche waya jülüjüin naaʼin Maleiwa saaʼu wayuuin neʼe waya?», eeshii eeka mataalain naaʼin.
TÜ SHIKIRAJAKAT TÜ WIWÜLIAKAT: Nnojotsü amülain niʼyataain Jeʼwaa saaʼu naapüin wamüin tü Wiwüliakat. Anuu nünüiki wamüin: «Tachiajaajeechi pia sümaa jülüjüin pia taaʼin» (Salmo 32:8, NM).
Jamüsüjaʼa Agar, wanee wayuu egiptojeʼewat soʼujatü tü juyakalüirua süchikijeekat 1900 süpülapünaa wakalia. Shipiuunase shia Sarai. Soʼu wanee kaʼi, mojutsat Sarai sümüin Agar. Nnojotpejeʼe motuin shia naaʼin Maleiwa saaʼujee müin saainjala, anuu tü alatakat saashin tü Wiwüliakat: «Nüntakalaka wane aapiee sünainmüin» otta nümaka sümüin: «Naapüin Jehová tü pünüikikat sünain achuntaa nümüin kaaliwaa suʼutpünaa tü pümülialakat». Sümakalaka Agar niʼipajee: «Pia Maleiwa eʼrakai taya» (Génesis 16:4-13).
Müshia piakai, niʼrüin pia Maleiwa. ¿Jamaluʼulu tia? Jülüjataa paaʼin wanee wayuu aaʼinmajaka süchooin süka alin naya süpüla, nayapejeʼe saaʼinmaain maʼin na joʼuuyuukana süka wainmain tü jookalü apüla naya otta nnojoyülüin natüjüin maʼin. Akaʼaya neʼe Jeʼwaa, jülüjüshii waya naaʼin matchinre waaʼin otta joole waya apülaa. Müsü nünüiki Jeʼwaa wamüin: «Eeshi taya [...] nümaa chi yüülakai aaʼin otta chi mojukai aaʼin süpüla tatütüleʼerüin naaʼin» (Isaías 57:15, NM).
Eeshijaʼa süpüla pümüin «¿Jamüshiche taya noʼuluʼu Maleiwa? ¿Shiache neʼe niʼraka tü taainjakat? ¿Shiataapa tü kasa suluʼukat taaʼin?¿Niyaawatüinche saaʼu takuwaʼipa?».