SUSOUKTAKA EʼIPAJEE TÜ WIWÜLIAKAT
¿Asoʼiraajeetche naaʼin na ouktüshiikana?
Müshii natunkakai aaʼin na ouktüshiikana süka nnojoluin kasain natüjaain aaʼu otta nnojoluin süpüla naainjüin wanee kasa. Eepejeʼe süpüla nasoʼireʼennüin aaʼin nutuma Jeʼwaa. ¿Jamüsü watüjaaka saaʼu tia? Süka nasoʼireʼennüin aaʼin waneeinnua wayuu nutuma Jesuu sükajee nüpülain Jeʼwaa. (Paashajeʼera Eclesiastés 9:5; Juan 11:11, 43, 44.)
¿Jamaluʼulu müin natunkakai aaʼin na ouktüshiikana?
Nüküjüin Maleiwa kateerüin noʼu nachikuaʼa na wayuu nüchekakana süpüla nasoʼiraain aaʼin. Asoʼiraajeerü naaʼin suluʼu tü mma jeketkat. Keeʼireesü maʼin naaʼin Maleiwa nüsoʼireʼerüinjatüin saaʼin tü wayuu ouktüsükalüirua. (Paashajeʼera Job 14:14, 15.)
¿Jameerü sukuwaʼipa süpüla süsoʼiraainjatüin saaʼin tü ouktüsükalüirua?
Na asoʼiraainjanakana aaʼin, nnojoleerü naponojüin tü wayuu napüshikalüirua otta tü natünajutkalüirua. Jaʼitainna jiipüin naya, keʼirukeena nachikuaʼa nutuma Maleiwa. Wayuujeena nachikuaʼa maʼakaapuʼu namaiwa. (Paashajeʼera 1 Corinto 15:35, 38.)
Nnojoishii wainmain na asoʼiraainjanakana aaʼin süpüla kepiaa chaa sirumatuʼu (Alateetkat Mapeena20:6, NM). Naya wainmaka maʼin na asoʼiraainjanakana aaʼin süpüla kepiaa saaʼu tü Mmakat. Jeketeerü tü nakuwaʼipakat otta nnojoleena ouktüin piantua. (Paashajeʼera Salmo 37:29 otta Aluwataaushikana 24:15.)