SUSOUKTAKA EʼIPAJEE TÜ WIWÜLIAKAT
¿Asoʼiraajeetche naaʼin nachikuaʼa na ouktüshiikana?
Shiimain nüsoʼireʼerüinjatüin saaʼin maleiwa tü ouktüsükalüirua
Nia Jeʼwaa «chi shikiishikai tü kataakat oʼuu» (Salmo 36:9, TNM). Makalaka niainjachin asoʼireʼerüin saaʼin tü wayuu ouktüsükalüirua. Naainjeerü tia soʼu palit kaʼi saashin tü Wiwüliakat. (Paashajeʼera Aluwataaushikana 24:15.) ¿Jamüsü keeʼireeka naaʼin Maleiwa nüsoʼireʼerüin saaʼin tü ouktüsükalüirua?
Chi Kakumajalakai waya, nüchekatüjülia katüinjatüin woʼu süpüla kaʼikat süpüshuaʼa (Génesis 1:31; 2:15-17). Nnojotsü aʼwanajaain tü keeʼireekat naaʼin wapüleerua. Aisü nümüin Maleiwa sümüliala wayuu jee nnojoluin wainmain juya katüin soʼu. (Paashajeʼera Job 14:1, 14, 15.)
¿Jaleena kepiain na asoʼiraainjanakana aaʼin?
¿Nukumajüinche Maleiwa chi wayuukai süpüla kepiainjachin nia chaa iipünaa? Nnojottaa. Shia nukumajaka Maleiwa tü aapieekalüirua süpüla chainjatüin iipünaa, jee müshiʼiya wayakana, nukumajüin waya süpüla yaainjanain kepiain saaʼu tü Mmakat (Génesis 1:28; Job 38:4, 7). Na wayuu nüsoʼireʼerakana aaʼin Jesuu, nnojoishii jalakualiin naya, yaajanaʼaya naya yaa Mmapaʼa. Süsoʼireʼennapa saaʼin tü ouktüsükalüirua, yaajeena kepiain saaʼu tü Mmakat. (Paashajeʼera Juan 5:28, 29, TNM; 11:44.)
Eepejeʼe waneeinnua anoujashii yaawaka nutuma Maleiwa süpüla chainjanain chaa iipünaa (Lucas 12:32, TNM; 1 Corinto 15:48-50). Naya anoujashiikana, aluwataainjana nümaa Jesuu saaʼu tü Mmakat. (Paashajeʼera Alateetkat Mapeena [Apocalipsis] 5:9, 10.)