Pansaa wakuwaʼipa sümaa tü nuchuntakat Jesuu

1, 2. ¿Kasa naainjaka Jesuu süchikijee nikeraajüin tü Pascuakat soʼu juyaka 33?

AIPOʼUUPA soʼu 14 nisán, juyaka 33, eejachi Jesuu namaa na nikirajüinkana sünain ekeraajaa tü Pascuakat. Eere sotuin naaʼin tü kaʼi taashikalü oʼu na israeliitakana suluʼujee tü mmakat Egipto. Akatsaʼa eein tü kasa taashinjatkalü oulia na nikirajüinkana süpüla kaʼikat süpüshuaʼa. Waneemüin kaʼi süchikijee tia, (soʼu kaʼika 14 nisán namüin na judíokana) oʼutünajachi aaʼin Jesuu natuma na nüʼünüükana. Sünainjee ouktüin nia, taashinjana napüshuaʼa na wayuukana suulia naainjala otta suulia ouktaa (Heb. 9:12-14).

² Süpüla nnojoluinjatüin motuin waaʼin tü naainjakat Jesuu wapüleerua, nüikkaleʼerüin wanee kasa aainjünajatkat süchikumüin tü Pascuakat. Nüshaletüin wanee pan maʼakasat soolojia jee naapaka shia namüin na polookana waneemüin nikirajüin, nümakalaka: «Maa aka taapüin jooluʼu jümüin tü pankat, meechia taya sünain aapajiraain tekii jaaʼu jiakana. Tü waaʼinrakat jooluʼu, süpülajatü jaaʼinrüin waneepia süpüla sotüinjachin jaaʼin taya». Naapakalaka joo namüin tü iita kaluʼukat wiino, nümakalaka: «Asüüshikat tüü, anuu jüsüitpain jooluʼu, müsü aka sukuaippa tü tasha amülainjatkat süpüla nikeraajüinjatüin chi Maleiwakai tü pütchi jeket pansaatüjütkalia nütüma je süpüla sülatinnajatüin saainjala wayuu süpüshua» (Luc. 22:19, 20).

3. (1) ¿Kasa pütchi aikkaleʼennaka süchikijee ouktüin Jesuu? (2) ¿Jarat tü pütchi wasouktüinjatkalü eʼipajee?

³ Alüʼütsü süpüla nüikkaleʼerüin Jeʼwaa wanee pütchi jeketü namaa na nikirajüinkana Jesuu. Pütchikat tia, süchikumüinjatü tü pütchi aapünakat namüin na israeliitakana. Nnojotsü keeʼireein naaʼin Jesuu müinjatüin nakuwaʼipa na nikirajüinkana maʼaka saaʼin nakuwaʼipa na israeliitakana. Nnojoishii paaʼinwain na israeliitakana sünain aʼwaajaa Jeʼwaa. Makalaka mojutüin natuma tü nünüliakat (Juan 7:45-49; Aluw. 23:6-9). Keeʼireesü naaʼin Jesuu paaʼinwainjanain na nikirajüinkana süpüla kojutüinjatüin sümüin wayuu tü nünüliakat Maleiwa. Makalaka nuchuntüin nümüin Maleiwa (Juan 17:1-26; piirakaa sümüin tü ayaakuaa suluʼukat süpana 24). Sümaʼinruʼu wekirajaain sünain tü nünüikikat Jesuu, wasoukta shiʼipajee pütchikalüirua tüü: «¿Asouktüshiche Maleiwa shiʼipajee tü nuchuntakat Jesuu? ¿Pansaasüche takuwaʼipa sümaa tü nuchuntakat Jesuu?».

TÜ KOJUTÜKAT MAʼIN NÜMÜIN JESUU

4, 5. (1) ¿Kasa shikirajaka anain waya tü nuchuntakat Jesuu palajana? (2) ¿Kasa naapaka Jeʼwaa nümüin Jesuu?

⁴ Kaʼlesü aika naaʼu Jesuu sünain yootoo namaa na nikirajüinkana. Nikirajüin naya nüchiki Maleiwa. Nümakalaka Jesuu nümüin Maleiwa: «Taata, kettaaitpa takalia; kojutü putuma chi püchonkai süpüla kojutüinjachin pia nutuma. Laülaaichipa taya putuma saaʼu wayuu süpüshuaʼa. Katüinjatü noʼu waneepia tatuma na wayuu paapakana tamüin. [...] Kojutüshi pia tatuma yaa saaʼu tü mmakat otta tekeraajüin tü aʼyatawaa püjütakalü apüla taya. Taata, anashi kojutüle taya putuma maʼakaapuʼu kojutüin taya nnojoluiwaʼaya sukumajünüin tü kasakalüirua» (Juan 17:1-5, NM).

⁵ ¿Kasa kojutüka maʼin nümüin Jesuu nuchuntapa nümüin Maleiwa? Keeʼireesü maʼin naaʼin kojutüinjachin chi Nüshikai atumawaa. Tia nümakat, meematsü aka saaʼin tü makat maaʼaya: «Taata, kasataalejeseʼe wulein atumawaa tü pünüliakat» (Luc. 11:2, NM). Süchikijee tia, achuntüshi Jesuu napüleerua na nikirajüinkana. Keeʼireesü naaʼin katüinjatüin noʼu waneepia nutuma. Nuchuntüin tü keeʼireekat naaʼin sajaʼttiamüin nünüiki. Nuchuntüin nümüin chi Nüshikai kojutüinjachin nia nutuma maʼakaapuʼu kojutüin nia nnojoluiwaʼaya sukumajünüin tü kasakalüirua. ¿Kasa naapaka Jeʼwaa nümüin Jesuu? «Kojutuleeshia maʼi nia noulia na aapiee nümaʼanajeejanakana Maleiwa.» (Heb. 1:4.)

WEʼRAAJA «CHI MALEIWA SHIIMAINSHIKAI»

6. ¿Kasa naainjüinjatka na nikirajüinkana Jesuu süpüla katüinjatüin noʼu waneepia? ¿Jamüsü watüjaaka saaʼu nountüin tia?

⁶ Sünain tü nuchuntakat Jesuu nümüin Maleiwa, nüküjaleein tü kasa waaʼinrajatkat süpüla katüinjatüin woʼu waneepia (paashajeʼera Juan 17:3a). Nüküjüin ayatüinjanain wekirajaain nüchiki Maleiwa otta Jesuu. Weʼitaainjatü suluʼu wakuwaʼipa tü wekirajaakalü anain. Naainjüin tia na nikirajüinkana Jesuu, müshijeseʼe müin nia nümüin chi Nüshikai: «Tü pütchikat püküjapüʼükat tamüin, taküjain shia namüin je kapülasü naaʼin tanüiki» (Juan 17:8). Müleka keeʼireere naaʼin katüin noʼu waneepia na nikirajüinkana Jesuu, jülüjüinjatü naaʼin tü sümakat tü Nünüikikat Maleiwa otta neʼitaainjatü shia suluʼu nakuwaʼipa suʼunnaa yaain naya saaʼu tü Mmakat. ¿Nountüinche naaʼinrüin tia? Aa. ¿Jamüsü watüjaaka saaʼu? Süka süshajünüin nanülia sünain tü polookat piamamüin ipa süchechejiaka tü jeketkat Jerusalén (Alat. Map. 21:14).

7. ¿Kasa sünainpünaaka eʼraajaa Maleiwa? ¿Jamüsü choʼujaaka maʼin tia?

⁷ Kateere woʼu waneepia ayatüinjana waya ekirajaain nüchiki Maleiwa. Tü pütchi ashajünakat süka griego, tü makat: «na ayatakana ekirajaain», eesü süpüla süshajünüin mayaa: «ayatüinjachi weʼraajüin». Ayatüle wekirajaain nüchiki Maleiwa, ayatüinjachi weʼraajüin nia. ¿Kasa sünainpünaaka eʼraajaa Maleiwa? Nnojotsü shiainjatüin neʼe wekirajaain anain tü keeʼireekat naaʼin otta tü nukuwaʼipakat. Weʼraajüinjachi nia süpüla aleewainjanain waya nümaa otta namaa na wawalayuukana. Waaʼinrajatü tia süka alin naya wapüla. Shiajaʼa sümaka tü Wiwüliakat: «Müleka maalinre nüpüla wayuu, nnojoishija niʼraajüin chi Maleiwakai» (1 Juan 4:8). Weʼraajüle Maleiwa oonooinjana waya nümaa (paashajeʼera 1 Juan 2:3-5). ¡Anataʼaleeshiijaʼa maʼin na aleewakana nümaa Jeʼwaa! Eepajaʼa süpüla sumojujaain wakuwaʼipa nümaa Maleiwa maʼaka sumojujaain nukuwaʼipa Judas Iscariote. Makalaka ayatüinjanain aleewain waya nümaa Maleiwa süpüla katüinjatüin woʼu waneepia (Mat. 24:13).

«SAAʼUJEE TÜ PÜNÜLIAKAT»

8, 9. ¿Kasa nüntaka maʼin apüla Jesuu yaa saaʼu tü Mmakat? ¿Kasa tü nnojotkalü anain nümüin Jesuu?

⁸ Waashajeʼerüle tü nünüikikat Jesuu suluʼu Juan kapiitulo 17, watüjaa aaʼu nnojoliin nayain neʼe alin nüpüla na nikirajüinkana, aishii waya nüpüla (Juan 17:20). Nnojoishi antüshin neʼe nia süpüla nuʼtteʼerüinjanain waya. Shia nüntaka maʼin apüla wuleinjatüin otta kojutüinjatüin nünülia Maleiwa nutuma. Jamüshijaʼa wanaa sümaa chajachin nia suluʼu tü ekirajüleekat, naashajeʼerüin tü pütchi nüshajakat Isaías, tü makat: «Antüshi chi Naaʼinkai [Jeʼwaa] taaʼu, süka taneekünüin nütüma süpüla taküjainjatüin süchiki anaa sümüin wayuu eekai müliain». Wanaa sümaa naashajeʼerüin Jesuu tia pütchikat, nuchuntüin nünülia chi Nüshikai (Luc. 4:16-21; Is. 61:1).

⁹ Süpülapünaa nüntüin Jesuu yaa saaʼu tü Mmakat, napülajüin na judíokana suchuntünajatüin nünülia chi Maleiwakai. Nnojotsü anain nümüin Jesuu tia. Müshi nia namüin: «Sünain tayain nüjünalain chi Tashikai [nünülialuʼu, NM] süpüla laülawaa, nnojoishi kasajachin taya jümüin. Aluʼujasa müleka nüntüle joo jaʼakamüin wane wayuu eekai nüküjiraain neʼe nüchiki, kamaneejeena jia nümüin» (Juan 5:43). Sülüʼütpa nükalia Jesuu süpüla nuʼutünüin aaʼin, müshi nia nümüin chi Nüshikai: «Kojutü putuma tü pünüliakat» (Juan 12:28, NM). Sünain tü nünüiki Jesuu wekirajaakalü anain, niiʼiyatüin kojutüin nümüin nünülia chi Nüshikai.

10, 11. (1) ¿Kasa naainjaka Jesuu süpüla nüküjüinjatüin nünülia chi Nüshikai namüin na nikirajüinkana? (2) ¿Kasapülajatü waküjüinjatüin nünülia Maleiwa maaʼulu yaa?

¹⁰ Müshi Jesuu: «Taataa, na tekirajüinkana, na aneekuushikana pütüma saʼakajee wayuu, teeʼiyatüin pukuaippa [tü pünüliakat, NM] namüin sünain anashaatain maʼi pia. Saaʼu püpüshin naya, piʼitaain naya süpüla nayainjanain na tekirajüinkana. Je noonooitpain sümaa pünüiki». Nümaka süchikijee: «Nnojoleechi makatüin taya yaaya saʼaka wayuu, süka toʼunajachin pünainmüin. Otta müshiʼiya na tekirajüinkana, makateena naya yaaya saʼaka tü wayuu manoujainsatkalüirua. Taataa, pia aʼwaajünakai, tachuntüin pümüin [saaʼujee tü pünüliakat, NM] sünain paaʼinmajüinjanain na tekirajüinkana süpüla wanaawajiraain naaʼin maa aka wayakana sünain wanaawajiraain waaʼin» (Juan 17:6, 11).

¹¹ Nnojotsü nüküjüin neʼe Jesuu nünülia chi Nüshikai namüin na nikirajüinkana. Nükaaliinjüin naya süpüla nayaawatüinjatüin saaʼu tü nukuwaʼipakat otta tü nukuwaʼipakat wamüin (Éx. 34:5-7). Nükaaliinjüin waya Jesuu süpüla waküjüinjatüin nünülia Jeʼwaa sainküin tü Mmakat. ¿Kasa apüla? Süpüla wainmainjatüin wayuu anoujaka süpülapünaa sajaʼttinnüin tü kasa mojusükat. Kettaapa tia, yaleteerü maʼin nutuma Jeʼwaa tü nünüliakat otta taasheena nutuma na Anoujüshii waneepiakana nümaa (Ezeq. 36:23).

«SÜPÜLA SHIYAAWATÜINJATÜIN AAʼU WAYUU SÜPÜSHUA»

12. ¿Jarat tü apünüinsükat kasa akaaliinjeenaka waya süpüla wekeraajüin tü aʼyatawaa niʼitaakalü ekii Jesuu?

¹² Nikirajüin Jesuu na nikirajüinkana süpüla eejiraainjanain naya sümaa tü kasa jookalü apüla naya. Choʼujaashaatasü maʼin tia namüin süpüla nekeraajüinjatüin tü aʼyatawaa niʼitaakalü ekii Jesuu. Müshi Jesuu nümüin chi Nüshikai: «Maa aka püjütüin taya saʼakamüin wayuu, tajütüin na tekirajüinkanaya saʼakamüin». Nuchuntüin apünüinsü kasa choʼujaaka maʼin süpüla nekeraajüinjatüin tia aʼyatawaakat. Tü nuchuntakat palajana shia nnojoliinjanain na nikirajüinkana sünainpünaain tü kasa naaʼinrakat na manoujüinsaliikana. Tü wanee nuchuntakat shia noonooinjanain na nikirajüinkana sümaa nünüiki Maleiwa otta süpüla wuleinjatüin nakuwaʼipa. Süchikijee, nuchuntüin maʼin kojuyatua paaʼinwajiraainjanain na nikirajüinkana otta aijiraainjanain naya maʼaka aijiraain maʼin nia nümaa chi Nüshikai. Sünainjee tia, jülüjeesü waaʼin pütchikat tüü: «¿Pansaasüche takuwaʼipa sümaa tü apünüinsükat kasa nuchuntaka Jesuu?». Nütüjaa aaʼu Jesuu sunoujüneerüin nanüiki na nikirajüinkana müleka naainjüle tia apünüinsükat kasa (paashajeʼera Juan 17:15-21).

13. ¿Jamüsü watüjaaka saaʼu nusouktüin Jeʼwaa shiʼipajee tü nuchuntakat Jesuu?

¹³ ¿Asouktüshiche Maleiwa shiʼipajee tü nuchuntakat Jesuu? Aa. Süküjüin tü karalouktakat Aluwataaushikana. Eeshiijaʼa süpüla nnojoliin paaʼinwajiraain na anoujüshii eejanakana nakalioʼu na nikirajüinjanaka Jesuu. Süka jamüin, eeshii eekai judíoin, nnojoluin judíoin, eekai washinnuuin, mojuin, laamain otta eekai achepchieein. Akanasaʼa paaʼinwajiraain naya maʼaka nüküjüin shia Pablo (Éf. 4:15, 16). Mayaainjeʼe niain Satanaa aluwataaka saʼaka wayuu manoujüinsat, paaʼinwajiraashii na anoujüshiikana nutuma chi naaʼinkai Jeʼwaa (1 Cor. 3:5-7).

14. ¿Jamüsü watüjaaka saaʼu nusouktüin Jeʼwaa maaʼulu shiʼipajee tü nuchuntakat Jesuu?

¹⁴ Süchikijee ouktüin na nikirajüinkana Jesuu, nnojoliinnapa paaʼinwajiraain na anoujüshiikana. Nayainnapa eeka na ekirajüliikana alawaa (Aluw. 20:29, 30). Soʼu juyaka 1919 taashishii nutuma Jesuu na nikirajüinkana noulia na ekirajüliikana alawaa otta nukotchirüin naya süpüla paaʼinwajiraainjanain naya waneepia sünain anoujaa (Col. 3:14). Sutuma naküjüin pütchi, nakotchirüin maʼaka siete miyoone wayuu «saʼakajee shiʼirukukat tü wayuukalüirua süpüshua, sainküinjee mmakat süpüshua» süpüla paaʼinwainjanain naya sünain aʼwaajaa Jeʼwaa (Juan 10:16; Alat. Map. 7:9). Asouktüshi Jeʼwaa shiʼipajee tü nuchuntakat Jesuu, tü makat mayaa: «Tachuntüin süpüla wanaawajiraainjatüin maʼi naaʼin waneepia. Je müleka wanaawajiraale naaʼin sütüjaajeerü aaʼu wayuu süpüshua sünain ajütüüshin taya pütüma je sünain alin naya püpüla maa aka alin püpüla tayakaʼiya» (Juan 17:23).

SAJAʼTTIAMÜIN NÜNÜIKI JESUU

15. ¿Kasa nuchuntaka Jesuu napüleerua na chainjanakana aluwataain nümaa?

¹⁵ Soʼu aika 14 nisán, nnojoluiwaʼaya nuʼuraajüin Jesuu, niiʼiyatüin kojutüin nümüin na nikirajüinkana. Nüküjüin namüin naluwataainjanain nümaa suluʼu Nuluwataaya Maleiwa (Luc. 22:28-30; Juan 17:22). Müshi nia napüleerua: «Taataa, na wayuu eʼitaanakana pütüma tajapuluʼu, tacheküin napüleerua tamaainjanain naya chaa eere taya, süpüla neʼrüinjachin taya sünain anashaatain maʼi. Shiimüin sünain kojutüin maʼi taya pütüma süka alin taya püpüla sümaiwa paala nnojolüiwaʼaya sükumajünüin tü kasakat süpüshua» (Juan 17:24). Nnojotpejeʼe achunjüin naaʼin na anoujüshii yaainjanakana kepiain saaʼu tü mmakat. Talatüsü naaʼin sutuma tü nüküjakat Jesuu namüin na chainjanakana iipünaa. Tüü, shiiʼiyatüin paaʼinwajiraain maaʼulu na anoujüshii shiimainshiikana.

16, 17. (1) ¿Kasa tü ayatüinjatkat naaʼinrüin Jesuu? (2) ¿Kasa tü woonooinjatkalü ama?

¹⁶ Sutuma tü shikirajakalü anain tü iküleesia nnojotkat shiimain, wainma wayuu nnojotka kasajatüin amüin paaʼinwajiraain tü nupueulosekat Jeʼwaa otta niʼraajünüin sutuma. Tia alatüsü soʼu nakalia na nikirajüinkana Jesuu, müshijeseʼe müin nia sajaʼttiamüin nünüiki: «Taataa, [...], mayaainje nnojolin shiʼraajüin pia wayuu eekai manoujain, teʼraajüin pia tayakai. Je na anoujashiikana, natüjaa aaʼulu sümaa püjünalain taya, sükajee teeʼiyatüitpain pukuaippa [pünülia, NM] namüin. Je ayateechi taya sünain teeʼiyatüin shia namüin süpüla aijiraainjanain naya napüla maa aka alin taya püpüla, je süpüla saʼaniraainjatüin takuaippa namaa» (Juan 17:25, 26).

¹⁷ Nüküjüin Jesuu nünülia chi nüshikai namüin na wayuukana. Nekiipüʼü nia na anoujüshiikana. Nükaaliinjüin waya süpüla waküjüinjatüin sümüin wayuu nünülia chi Nüshikai otta waküjüin pütchi süchiki tü keeʼireekat naaʼin. Woonoo sümaa tü nümakat Jesuu. Waküja pütchi namüin na wayuukana otta wekiraja naya sünain tü Wiwüliakat (Mat. 28:19, 20; Aluw. 10:42, NM). Ayata paaʼinwajiraain waya waneepia. Müle shia watuma, pansaajeerü maʼin wakuwaʼipa sümaa tü nuchuntakat Jesuu, kojuteerü maʼin watuma nünülia Maleiwa otta talateena waya süpüla kaʼikat süpüshuaʼa.