EKIRAJAAYA 22
JAYEECHI 15 Kojuta wamüin niʼirumakai Jehová
¿Jamüsü kojutukaʼa nümüin Jesús tü nünüliakat Jehová?
«Teʼraajirüinnapa naya tü pünüliakat otta ayateeria teʼraajirüin shia» (JUAN 17:26).
TÜ WATÜJEETKAT
Tü naaʼinrakat Jesús süpüla niʼraajirüin nünülia Jehová, kojutuinjatüin nünülia Jehová nutuma jee wuleinjatüin shia.
1, 2. (1) ¿Kasa naaʼinraka Jesús wanee ai süpülapünaa outuin nia? (2) ¿Kasa wasouteetkalü eʼipajee sünain ekirajaayakat tüü?
SOʼU tü juyakat 33, naainjain Jesús tü ekawaa aipaʼajatkat namaa na nikirajüinkana, soʼujatü tia 14 Nisán. Nütüjaa aaʼu Jesús sülüʼülüin tü kaʼi eere saapünüinjatüin nikii nutuma Judas namüin na nüʼünüükana süpüla müliainjachin nia atumawaa jee nuʼutunuinjachin aaʼin. Süchikijee tü ekawaakat nüküjain Jesús namüin na nikirajüinkana waneirua pütchi atütüleʼeraka naaʼin. Noʼunapa napüshuaʼa süchikijee tü ekawaakat oʼuraajüshi Jesús nümüin Jehová, shia tü nüshajakat chi aluwataaushikai Juan suluʼu Juan kapiitulo 17.
2 Sünain ekirajaayakat tüü wekirajaajeerü anain tü watüjakat sünainjee tü nuchuntakat Jesús nümüin Jehová. ¿Kasa tü shapaakalü atuma naaʼin Jesús wanaa sümaa tia? ¿Kasa wayu tü kojutuleekat nümüin yaaiwaʼaya nia saaʼu tü mmakat?
«TEʼRAAJIRÜINNAPA NAYA TÜ PÜNÜLIAKAT»
3. ¿Kasa nüküjeeka Jesús wanaa sümaa nümüin «Teʼraajirüinnapa naya tü pünüliakat»? (Juan 17:6, 26).
3 Anuu nünüiki Jesús nuʼuraajapa nümüin Jehová: «Teʼraajirüinnapa naya tü pünüliakat». Jaʼyasü saaʼu nukuwaʼipa Jesús kojutuin maʼin tia süka nüküjain shia piantua (paashajeʼera Juan 17:6, 26). ¿Maluʼutche tia eiwaʼalii neʼraajüin na nikirajüinkana Jesús Jehováin nünülia Maleiwa? Nnojottaa. Natüjaatüjülia aaʼu na nikirajüinkana Jesús kasaichin nünülia Maleiwa, jama judíoin naya jee kojuyatua süshajünüin tü nünüliakat Maleiwa suluʼu tü pütchi ashajuushikat suluʼu hebreo. Tü nüküjeekalü achiki Jesús wanaa sümaa nümüin nümüin Jehová: «Teʼraajirüinnapa naya tü pünüliakat», shia nikirajüin na wayuukana süchiki tü nukuwaʼipakat Jehová, tü keeʼireekat naaʼin süpüleerua wayuu jee tü naaʼinreetkat mapeena. Niaʼala neʼe Jesús eʼraajakai maʼin nukuwaʼipa Jehová.
4, 5. (1) ¿Jamakuwaʼipalin süpüla kojutuin wamüin nünülia wanee wayuu? Püküja wanee sukuwaʼipa. (2) ¿Jamakuwaʼipalin süpüla kojutuin namüin na nikirajüinkana Jesús tü nünüliakat Jehová?
4 Jülüjataa paaʼin eein wanee wawala David nünülia, tottoolu chia wawalakai jee outkajaashi nia pümaa. Shiasaʼa peewaalaʼa pümaka soʼu wanee kaʼi jee puwateʼennaka suluʼumüin tü pitaat niʼyataaka aluʼu chi wawalakai jee nükaalinjain pia süpüla paawalaainjachin. Akooʼomüinraasü tü naalinkat chi wawalakai püpüla sutuma tü naaʼinrakat püpüleerua. Suchuntunapa nünülia chia wawalakai sotusü paaʼin tü naaʼinrakat püpüleerua. Kojutuleeichipa pümüin chia wawalakai sükajee katüin poʼu nutuma.
5 Kojutuleesia maʼin nünülia Jehová namüin na nikirajüinkana Jesús süka nikirajüin naya Jesús süchiki tü nukuwaʼipakat Jehová. ¿Jamüsü sukuwaʼipa nutuma Jesús süpüla nikirajüin naya? Shia süka müin nukuwaʼipa Jesús maʼaka naaʼin chi nüshikai. Jaʼyasü tia sünain tü kasa naaʼinrakat jee tü nümakat. müsüjeseʼe neʼraajüin maʼin na nikirajüinkana Jesús tü nukuwaʼipakat Jehová naapajapa tü nikirajakalü anain naya Jesús otta neʼrapa alin wayuu nüpüla (Juan 14:9; 17:3).
«SAAʼUJEE TÜ PÜNÜLIAKAT, TÜ ANÜLIEE PIʼITAAKAT TANAIN»
6. ¿Kasa nüküjeeka Jesús wanaa sümaa nümüin «Tü anüliee piʼitaakat tanain»? (Juan 17:11, 12).
6 Achuntushi Jesús napüleerua na nikirajüinkana wanaa sümaa nuʼuraajüin nümüin Jehová, müshi nia: «Paaʼinmaja naya saaʼujee tü pünüliakat. Tü anüliee piʼitaakat tanain» (paashajeʼera Juan 17:11, 12). Nnojotsü maluʼuluin tia Jehováinjatüin nünülia Jesús. «Tü pünüliakat» müshi Jesús nümüin Jehová süka nnojolin wanaawain nanülia. ¿Kasakaʼa nüküjeein achiki Jesús wanaa sümaa nümüin «Tü anüliee piʼitaakat tanain»? Shia nüjütüin nia Jehová süpüla nünüliamaainjachin nia. Antüshi nia nünülialuʼu chi nüshikai otta aainjashi nia kasa pülasü sükajee tü nünüliakat Jehová (Juan 5:43; 10:25). «Nia Jehová chi oʼtteʼerakai wayuu», maluʼulu tü nünüliakat Jesús. Maʼaka wekirajaaitpain tü nünüliakat Jesús sünainpünaasü tü nünüliakat Jehová.
7. ¿Jamüsü watüjaakaʼa saaʼu eein süpüla naashajaain Jesús nünülialuʼu Jehová? Püküja wanee sukuwaʼipa.
7 Anuu wanee sukuwaʼipa süpüla wayaawatüinjatüin saaʼu tia. Jamüshijaʼa wanee aluwataai eeshi süpüla naapüin laülawaa nümüin wanee wayuu jee nüjütüin nia suluʼumüin wanee mma süpüla naashajaainjachin nünülialuʼu. Maʼaka kaawain nünüiki chi wayuu aluwataaikai meeria neʼe nünüiki chi wayuu nüneekakai. Müsia neʼe nukuwaʼipa Jesús nüjünala nia Jehová yaa saaʼu tü mmakat jee naapüin laülawaa nümüin süpüla naashajaainjachin nünülialuʼu (Mat. 21:9; Luc. 13:35).
8. ¿Jamaluʼulu nünüliamaain Jesús Jehová? (Éxodo 23:20, 21).
8 Saashin tü Bibliakat niain Jesús «chi kanüliakai Pütchi», süka jamüin niain Jesús eʼikajüikai tü nünüikikat Maleiwa namüin na aapieekana jee namüin na wayuukana (Juan 1:1-3). Eeshijaʼa niale Jesús chi aapiee nüjünalakai Jehová süpüla nuʼunirüin jee naaʼinmajüin na israelitakana wanaa sümaa chajanain naya isashiipaʼa. ¿Jamüshii noonooinjanakaʼa na israelitakana sümaa tü nümakat chia aapieekai? Shia süka nünüliamaain nia Jehová (paashajeʼera Éxodo 23:20, 21).a Nünüliamaain Jesús Jehová sükain niain Jesús chi nüjünalakai Jehová jee niain chi kojutuinjachikai atuma tü nünüliakat.
«TAATA, KASATAALEJESEʼE SHIʼRAAJÜIN WAYUU PÜNÜLIA OTTA KOJUTUIN PIA SUTUMA»
9. ¿Jamüsü watüjaakaʼa saaʼu kojutuin maʼin tü nünüliakat Jehová nümüin Jesús?
9 Maʼaka wekirajaaitpain kojutatüjülia nünülia Jehová nümüin Jesús süpülapünaa nüntüin yaa saaʼu tü mmakat. Yaaiwaʼaya Jesús yaa saaʼu tü mmakat jaʼyasü saaʼu nukuwaʼipa shiain kojutuleein maʼin tü nünüliakat Jehová nümüin. Anuu nünüiki Jesús sülüʼülapa nükalia süpüla nuʼutunajachin aaʼin: «Taata, kasataalejeseʼe shiʼraajüin wayuu pünülia otta kojutuin pia sutuma». Nusoutamaataka chi nüshikai sünain maa: «Teʼraajirüitpa tanülia jee teʼraajireerü shia süchikuaʼa» (Juan 12:28).
10, 11. (1) ¿Kasa naaʼinraka Jesús süpüla kojutuin nutuma nünülia Jehová? (Piirakaa sümüin tü ayaakuaakat). (2) ¿Jamüsü kojutuinjatkaʼa jee wuleinjatka watuma nünülia Jehová?
10 Wane kasa naaʼinraka Jesús süpüla shiʼraajüin wayuu nünülia Maleiwa otta kojutuin nia sümüin shia nüküjain namüin na waneinnua süchiki tü nukuwaʼipakat Jehová jee süchiki tü kasa naaʼinrakat. Eesü waneʼeya kasa naaʼinraka Jesús süpüla kojutuinjatüin nünülia Maleiwa jee wuleinjatüin shia nutuma. Nikirajüin na nikirajüinkana sünain achuntaa tia noʼuraajapa nümüin Jehová, anuujeseʼe nünüiki: «Washikai iipünaajachikai kasataalejeseʼe shiʼraajüin wayuu pünülia otta kojutuin pia sümüin» (Mat. 6:9).
11 ¿Jamüsü kojutuinjatkaʼa jee wuleinjatka watuma tü nünüliakat Jehová? Shia sutuma nüküjain Satanás naʼalain nüchiki Jehová suluʼu tü apainkat Edén. Naashin niakai nüpülajüin Jehová kasa anasü nuulia Adán sümaa Eva (Gén. 3:1-5). Nnojotsü lotuin sukuwaʼipa tü kasa naaʼinrakat Jehová naashin Satanás. Mojusü pütchi nüchiki Jehová sutuma tü alawaa nüküjakat Satanás nüchiki. Soʼu nükalia Job nüküjain Satanás naʼyataain neʼe na wayuukana nümüin Jehová saaʼujee tü kasa anasü naapakat namüin jee ooʼulaajeena naya suulia aʼyatawaa nümüin Jehová neʼrüle müliaa, jama nnojoluin muloʼuin maʼin tü naalinkat napüla (Job 1:9-11; 2:4). Alatüinjatü wainma juya süpüla sütüjaanüin aaʼu shiimainre tü nümakat Satanás.
Nüküjain Jesús namüin na nikirajüinkana kojutuinjatüin natuma nünülia Jehová. (Paashajeʼera tü pütchikat 10).
«AAPAJIRAASHI TAYA TEKII»
12. ¿Kasa naaʼinraka Jesús saaʼujee alin maʼin Jehová nüpüla?
12 Sutuma alin maʼin Jehová nüpüla Jesús wainma kasa naaʼinraka süpüla kojutuinjachin jee wuleinjatüin nünülia Jehová. Aapajiraashi nikii Jesús saaʼu wayuu süpüla wuleinjatüin nünülia Jehová jee sütüjaainjatüin aaʼu wayuu lotuin nukuwaʼipa Jehová (Juan 10:17, 18).b Eʼrüijaashi wayumüin Adán sümaa Eva nümüin Jehová jee naneeküin niain aluwataain Satanás naaʼu. Naatapejeʼe nukuwaʼipa Jesús noulia, antüshi nia mmapaʼamüin saaʼujee alin Jehová nüpüla jee oonooshi nia waneepia nümüin (Heb. 4:15; 5:7-10). Waneepiashi Jesús nümaa Jehová mayaainjeʼe niʼrüin maʼin müliaa süpülapünaa outuin nia (Heb. 12:2). Sutuma tü naaʼinrakat Jesús atüjaana aaʼu alin maʼin Jehová nüpüla.
13. ¿Jamüsü nütüjaakaʼa saaʼu Jesús alawaain tü nümakat Satanás nüchiki Jehová? (Piirakaa sümüin tü ayaakuaakat).
13 Saaʼujee süpüshuaʼa tü kasa naaʼinrakat Jesús yaaiwaʼaya nia saaʼu tü mmakat atüjaana aaʼu alawaain tü nümakat Satanás nüchiki Jehová (Juan 8:44). Niaʼala neʼe Jesús eʼraajaka maʼin nukuwaʼipa Jehová. Shiimainrejeʼe tü nüküjakat Satanás nüchiki Jehová nütüjaainje saaʼu tia Jesús. Nüküjain Jesús tü shiimainkat nüchiki Jehová waneepia, oonooshi nia waneepia sümaa nünüiki Jehová jaʼitakajeʼe wanaa sümaa nüsütüin Jehová tü nüpülainkat nuulia (Mat. 27:46).c
Atüjaana aaʼu sükajee tü naaʼinrakat Jesús alawaain tü nümakat Satanás nüchiki Jehová. (Paashajeʼera tü pütchikat 13).
«TEKERAAJÜIN SÜPÜSHUAʼA TÜ KASA PULUWATAAKALÜ ANAIN TAYA»
14. ¿Kasa naaʼinraka Jehová nüpüleerua Jesús sutuma waneepiain nia nümaa?
14 Wanee ai süpülapünaa outuin Jesús oʼuraajüshi nia nümüin Jehová. Anuu nünüiki: «Tekeraajüin süpüshuaʼa tü kasa puluwataakalü anain taya» (Juan 17:4, 5). Nunouja anainrü Jesús niʼreerüin kasa anasü nutuma Maleiwa sutuma waneepiain nia nümaa, müsüjeseʼe nüsoʼireʼennüin aaʼin nutuma Jehová süchikijee outaa (Aluw. 2:23, 24). Saapünaka laülawaa nümüin chaa iipünaa nutuma Jehová (Filip. 2:8, 9). Wainma juya süchikijee tia oʼttushi Jesús sünain aluwatawaa chaa iipünaa nutuma Jehová. Anuu wanee kasa nuchuntaka Jesús wanaa sümaa nuʼuraajüin: «Wachuntuin pümüin puluwataainjachin saaʼu tü mmakat. Kasataalejeseʼe saainjünüin tü keeʼireekat paaʼin yaa mmapaʼa maʼaka sukuwaʼipa putuma chaa iipünaa» (Mat. 6:10). Sutuma tü nuchuntakat Jesús wayaawata aaʼulu tü naaʼinrüinjatkat Maleiwa nuluwataapeena.
15. ¿Kasa eejeetka nutuma Jesús nuluwataapeena?
15 Soʼu palitchon kaʼi najaʼttireena Jesús na nüʼünüükana Maleiwa jee na mojulaashiikana soʼunnaa tü kanüliakat Armagedón (Apoc. 16:14, 16; 19:11-16). Süchikijee tia ojutuneechi Satanás nutuma Jesús suluʼu «tü ishi oʼutakat maʼin», sutuma müin süttakai naaʼin iseerüin nüchiki naaʼinrüin wanee kasa (Apoc. 20:1-3). Nuluwataajeechikalaka Jesús soʼu miit juya. Anajiraajeena na wayuukana jee loteerü nakuwaʼipa nutuma. Nüsoʼireʼereena aaʼin na outushiikana jee paʼaraiiseerü tü mmakat nutuma. Aainjüneerü tü keeʼireekat naaʼin Jehová yaa mmapaʼa (Apoc. 21:1-4).
16. ¿Jameerü sukuwaʼipa wayuu sajaʼttapa tü miitkat juya?
16 ¿Jameerü sukuwaʼipa wayuu sajaʼttapa tü miitkat juya? Nnojoleena kaainjalain na wayuukana süka loteerüin nakuwaʼipa. Nnojoleerü choʼujaain wamüin wachuntuin nümüin Jehová nülatirüin waainjala saaʼu nünülia Jesús. Nnojoleerü choʼujaain sacerdoteinjachin Jesús namaa na 144.000 süpüla aleewainjanain waya nümaa Jehová. Ajaʼttinneerü tü outaakat, tü makalü aka saaʼin tü chiiruaajatkat waʼünüü. Asoʼiraajeerü naaʼin napüshuaʼa na outushiikana jee loteerü nakuwaʼipa napüshuaʼa na wayuukana (1 Cor. 15:25, 26).
17, 18. (1) ¿Kaseerü alataka sajaʼttapa tü miitkat juya nuluwataainjatkalü oʼu Jesús? (2) ¿Kaseerü naaʼinraka Jesús kettaapa tü miitkat juya nuluwataainjatkalü oʼu? (1 Corinto 15:24, 28; piirakaa sümüin tü ayaakuaakat).
17 ¿Kasa sütüjaajeetka aaʼu wayuu sajaʼttapa tü miitkat juya nuluwataainjatkalü oʼu Jesús? Sütüjaajeerü aaʼu wayuu niain Jehová wanee Maleiwa wulekai akuwaʼipa jee lotokai akuwaʼipa. Maʼaka wekirajaainnapain nüküjain Satanás alawaa nüchiki Jehová. Maalinsalii nüpüla na wayuu nuluwataakana aaʼu naashin. Wainma kasa naaʼinraka na aʼyataashiikana nümüin Jehová süpüla neʼraajirüin sümüin wayuu tü nünüliakat Maleiwa jee kojutuin shia natuma. Sajaʼttapa tü miitkat juya wuleerü nünülia Maleiwa otta atüjaaneerü aaʼu alin waya nüpüla Jehová.
18 Sajaʼttapa tü miitkat juya sütüjaajeerü aaʼu wayuu alawaain tü nümakat Satanás nüchiki Jehová. ¿Kaseerü naaʼinraka Jesús kettaapa tü miitkat juya nuluwataainjatkalü oʼu? ¿Eʼrüijaajeeiche nia wayumüin nümüin Jehová maʼaka naaʼinrüin shia Satanás? Nnojottaa (paashajeʼera 1 Corinto 15:24, 28). Nülatireetka Jesús laülawaa nümüin chi nüshikai jee jüüjüüweechi nia nümüin. Naaʼinreerü tia Jesús saaʼujee alin nüpüla Jehová.
Kettaapa tü miitkat juya nuluwataainjatkalü oʼu Jesús nülatireerü süchikuaʼa laülawaa nümüin Jehová. (Paashajeʼera tü pütchikat 18).
19. Maʼaka wekirajaainnapain sünain ekirajaayakat tüü, ¿kasa watüjaka sünainjee nukuwaʼipa Jesús?
19 Sutuma niʼraajüin maʼin Jehová nukuwaʼipa chi nüchonkai nüjütüin nia yaa mmapaʼamüin. Anasü maʼin nutuma Jesús tü aʼyatawaa aapünakat nümüin. Nnojotsü eein wanee kasa kojutuleeka maʼin nümüin Jesús suulialeʼeya tü nünüliakat Jehová. Müshijeseʼe naapajiraain nikii süpüla kojutuinjachin Jehová atumawaa jee nülatireetka süchikuaʼa laülawaa nümüin chi nüshikai sajaʼttapa tü miitkat juya nuluwataainjatkalü oʼu. ¿Kasa waaʼinrajatka süpüla washatüin nukuwaʼipa Jesús? Wekirajaajeerü anain tia sünain tü wane ekirajaayakat.
JAYEECHI 16 Waʼwaaja Jehová naaʼujee chi Nüchon nüneekalakai
a Eeshii waneinnua aapiee nüjütaka Jehová süpüla naashajaainjanain namaa na wayuukana. Wanaa sümaa sümüin tü Bibliakat: «Anuu nünüiki Jehová», naya na aapiee aashajaakana nünülialuʼu Jehová (Gén. 18:1-33). Ashajünüsü suluʼu tü Bibliakat niain Jehová aküjakai tü pütchi aapünakat nümüin Moisés, aküjünapejeʼe suluʼu waneirua wetsiikulo naaʼinrüin tia Jehová nakajee na aapieekana (Aluw. 7:38, 53; Gal. 3:19; Heb. 2:2-4).
b Saaʼujee outuin Jesús eeshii süpüla katüin woʼu süpüla kaʼikat süpüshuaʼa.
c Paashajeʼera tü pütchikat «Süsakiraka anain wayuu», ojuʼitaka suluʼu Aapiria Wayuu aaʼuriiroʼu soʼu 2021, süpana 30, 31.