¿Jamüsü kojutuinjatkaʼa wamüin nünülia Jehová?

1, 2. ¿Jamüsü watüjaakaʼa saaʼu kojutuin maʼin nümüin Jesús nünülia Jehová?

NNOJOTSÜ eein wanee kasa kojutuleeka maʼin nümüin Jesús suulialeʼeya tü nünüliakat Jehová. Nnojoishi eein wanee wayuu eʼraajaka maʼin nukuwaʼipa Jehová jee aküjakai shia sümüin wayuu maʼaka naaʼinrüin shia Jesús. Maʼaka wekirajaainnapain sünain ekirajaaya 22 naapajiraain nikii Jesús süpüla sütüjaainjatüin saaʼu wayuu lotuin nukuwaʼipa Jehová jee wulein nukuwaʼipa (Mar. 14:36; Heb. 10:7-9). Kettaapa tü miitkat juya nuluwataainjatkalü oʼu Jesús naapeerü süchikuaʼa laülawaa nümüin Jehová süpüla kojutuinjachin nia atumawaa (1 Cor. 15:26-28). Watüjaa aaʼulu alin maʼin Jehová nüpüla Jesús saaʼujee tü kasa naaʼinrakat nüpüleerua jee tü naaʼinrüinjatkat mapeena.

² Ajütünüshi Jesús yaa mmapaʼamüin nutuma chi Nüshikai (Juan 5:43; 12:13). Niʼraajirüin Jesús nünülia chi Nüshikai namüin na nikirajüinkana (Juan 17:6, 26). Wanaa sümaa nikirajüin Jesús na wayuukana jee naaʼinrüin kasa pülasü nüküjain naaʼinrüin süpüshuaʼa tia saaʼu nünülia chi Nüshikai (Juan 10:25). Achuntushi Jesús naaʼu na nikirajüinkana nümüin Jehová, müsü nünüiki: «Paaʼinmaja naya saaʼujee tü pünüliakat» (Juan 17:11). Wayaawata aaʼulu kojutuin maʼin nünülia Jehová nümüin Jesús suulialeʼeya wane kasa. ¿Eeshiche süpüla nuushikajaain wanee wayuu süchiirua nukuwaʼipa Jesús nnojoire niʼraajüin nünülia Maleiwa jee nnojoire nuchuntuin shia?

3. ¿Kasa wekirajaainjatka anain sünain ekirajaayakat tüü?

³ Wayakana na anoujashii shiimainshiikana wachajaain maʼin sukuwaʼipa süpüla washatüin nukuwaʼipa Jesús, müsüjeseʼe kojutuin maʼin wamüin nünülia chi Nüshikai (1 Ped. 2:21). Sünain ekirajaayakat tüü wekirajaajeerü anain süchiki neʼraajünüin sükajee nünülia Jehová na anoujashii aküjakana tü pütchi anakat maʼin süchiki nuluwataainjachin Maleiwa (Mat. 24:14). Otta wekirajaajeerü anain jamüin kojutuinjatka wamüin nünülia Jehová.

NÜNEEKÜIN WAYUU SÜPÜLA NÜNÜLIAMAAIN NAYA

4. (1) ¿Kasa nüküjaka Jesús namüin na nikirajüinkana süpülapünaa nuʼunuin iipünaamüin? (2) ¿Kasa eeka süpüla wasakirüin anain waaʼin sünainjee tü nümakat Jesús?

⁴ Anuu nünüiki Jesús namüin na nikirajüinkana süpülapünaa nuʼunuin iipünaamüin: «Katchinjeetpejeʼe jaaʼin süntapa jaaʼumüin tü nüpülainkat Maleiwa, jüküjeenakalaka pütchi tachiki sainküinpünaa Jerusalén, Judeapünaa, Samariapünaa otta sainküinpünaa mmakat» (Aluw. 1:8). Nnojotsü neʼe naküjainjatüin pütchi na nikirajüinkana Jesús sainküinpünaa Israel, naküjainjatü shia sainküinpünaa mmakat süpüshuaʼa süpüla suushikajaain wayuu süchiirua nukuwaʼipa Jesús (Mat. 28:19, 20). ¿Kasa nüküjeeka Jesús wanaa sümaa nümüin: «Jüküjeenakalaka pütchi tachiki»? ¿Maluʼutche tia nnojoluin choʼujaain naküjain pütchi na nikirajüinkana Jesús nüchiki Jehová? Watüjaajeerü aaʼu tia sünainjee tü sümakat Aluwataaushikana kapiitulo 15.

5. ¿Kasa naküjaka na aluwataaushikana jee na laülaashiikana namüin na anoujashiikana saaʼujee kojutuin namüin nünülia Maleiwa? (Piirakaa sümüin tü ayaakuaakat).

⁵ Soʼu tü juyakat 49 soʼu wakalia outkajaashii na aluwataaushikana otta na laülaashii chajanakana Jerusalén süpüla naashajaain süchiki tü naaʼinrajatkat na nnojoliikana judíoin süpüla noushikajaainjanain süchiirua nukuwaʼipa Cristo. Anuu nünüiki Santiago namüin sujutaapa tü outkajawaakat: «Nüküjaitpa Symeón [Pedro] wamüin anashiin nümüin Maleiwa nanoujain na nnojoliikana judíoin. Eekalaka süpüla nüneeküin wayuu naʼakajee na nnojoliikana judíoin süpüla nünüliamaain naya». Nüküjain mapa Santiago wanee pütchi nüshajalakat Amós chi nünüikimaajachikai Maleiwa, müshi nia: «Süpüla nüchajaanajachin maʼin achiki Jehová natuma na wayuu apütaakana namaa na wayuu sainküinjeejanakana mma, na wayuu eʼraajünakana suluʼu tanüliamaain naya. Shia nüküjaka Jehová tia» (Aluw. 15:14-18). Sükajee tü nümakat Santiago wayaawata aaʼulu naküjeerüin pütchi na nikirajüinkana Jesús süchiki nukuwaʼipa Jehová jee eʼraajüneena naya sükajee nünülia Maleiwa.

6, 7. (1) ¿Jamüshi nüntakaʼa Jesús yaa saaʼu tü mmakat? (2) ¿Jarat tü wanee kasa nüntakaʼaya apüla Jesús yaa saaʼu tü mmakat?

⁶ «Nia Jehová chi oʼtteʼerakai wayuu», maluʼulu nünülia Jesús. Shiaʼaya naaʼinraka tia Jehová, nüjütüin chi Nüchonkai yaa mmapaʼamüin süpüla naapüinjatüin nikii saaʼu wayuu jee süpüla suʼttaainjatüin wayuu kanoulakana nünain jee nünain chi Nüshikai (Mat. 20:28). Saaʼujee naapaajiraain nikii Jesús eeitpa süpüla motuin naaʼin Jehová waainjala jee eeshii süpüla katüin woʼu süpüla kaʼikat süpüshuaʼa (Juan 3:16).

⁷ ¿Jamüsü naapajiraainjatkaʼa nikii Jesús saaʼu wayuu? Shia sünainjee tü alatakat suluʼu tü apainkat Edén. Maʼaka wekirajaainnapain anain suluʼu ekirajaaya 22 eʼrüijaashi wayumüin Adán sümaa Eva nümüin Jehová. Sünainjee tia nnojoluitpa süpüla katüin noʼu waneepia (Gén. 3:6, 24). Nnojoishi antüin neʼe Jesús yaa mmapaʼamüin süpüla suʼttaainjatüin wayuu nutuma. Antüshiaʼaya nia süpüla sütüjaanüin aaʼu alawaain tü nümakat Satanás nüchiki Jehová (Gén. 3:4, 5). Sütüjaainjatüin saaʼu wayuu lotuin nukuwaʼipa Jehová jee aipüralin nia wayuu. Shiyaawata aaʼu tia wayuu süka wanaawain nukuwaʼipa Jesús nümaa chi Nüshikai jee noonooin sümaa nünüiki.

8. ¿Kasa naaʼinrajatka na nikirajüinkana Jesús süpüla noʼttaainjanain?

⁸ Nayaawatüinjatü aaʼu napüshuaʼa na nikirajüinkana Jesús niain Jehová chi oʼtteʼerüinjachikai naya (Juan 17:3). Eʼraajünüinjana na nikirajüinkana Jesús sükajee nünülia Maleiwa jee kojutuinjatüin namüin tü nünüliakat süpüla noʼttaainjanain (Aluw. 2:21, 22). Choʼujaasü nekirajaain anain na anoujashiikana süchiki nukuwaʼipa Jehová otta süchiki nukuwaʼipa Jesús, müsüjeseʼe müin nünüiki Jesús sajaʼttiamüin Juan 17, tü makat mayaa: «Teʼraajirüinnapa naya tü pünüliakat otta ayateeria teʼraajirüin shia süpüla alinjatüin wayuu napüla maʼaka alin taya püpüla. Ayateechikalaka paaʼinwain taya namaa» (Juan 17:26).

«AKÜJALII JIA PÜTCHI TACHIKI»

9. ¿Kasa waaʼinrajatkat kojutule wamüin nünülia Jehová?

⁹ Wekirajaaitpa anain choʼujaain weʼraajirüinjatüin nünülia Jehová jee kojutuinjatüin shia wamüin (Mat. 6:9, 10). Kojutuinjatü wamüin tü nünüliakat Jehová jee jaʼyainjatü shia saaʼu tü kasa waaʼinrakat. ¿Kasa waaʼinrajatkat süpüla kojutuin wamüin nünülia Jehová jee sütüjaainjatüin aaʼu wayuu alawaain tü nüküjakat Satanás nüchiki Jehová?

10. ¿Kasa nüsakitka anain Jehová na wayuu nnojoliikana aʼwaajüin nia suluʼu Isaías kapiitulo 42 sünainmüin 44? (Isaías 43:9; 44:7-9; piirakaa sümüin tü ayaakuaakat).

¹⁰ Aküjünüsü suluʼu Isaías kapiitulo 42 sünainmüin 44 tü waaʼinrajatkat süpüla kojutuin wamüin nünülia Jehová. Suluʼu tia kapiitulokot nüsakirüin Jehová na wayuu nnojoliikana aʼwaajüin nia süpüla naküjain nümüin shiimainrejeʼe eein namaleiwase. Nüküjainña Jehová anain najütüle wayuu aashajaainjanakana nooʼopünaa süpüla sütüjaanüin saaʼu shiimainrejeʼe tü namakat namaleiwase. Isapejeʼe nachiki nasoutuin nümüin (paashajeʼera Isaías 43:9; 44:7-9).

11. Saashin Isaías 43:10, 12, ¿kasa nüküjaka Jehová namüin na aʼyataashiikana nümüin?

¹¹ (Paashajeʼera Isaías 43:10-12). Anuu nünüiki Jehová namüin na aʼyataashiikana nümüin: «Aküjalii jia pütchi tachiki, [...] taya chi Maleiwakai». Mapa nüsakirüin naya sünain tüü: «¿Eeshiche wanee Maleiwa maʼaka taaʼin?» (Is. 44:8). Atüjaaneerü aaʼu niain Jehová chi Maleiwa shiimainshikai sükajee wakuwaʼipa otta nnojoluin eein wanee Maleiwa makai aka naaʼin. Sükajee tü wamakat atüjaaneerü aaʼu alin Jehová wapüla jee waneepiain waya nümaa. Mayaainjeʼe nüchajaain sukuwaʼipa Satanás süpüla nükayaleʼerüin waya nuulia Jehová, anale tü wakuwaʼipakat kojuteerü wamüin tü nünüliakat Jehová.

12. ¿Jamüsü sukuwaʼipa süpüla shikeraajüin tü sümakat Isaías 40:3, 5?

¹² Washatüle nukuwaʼipa Jesús kojuteerü wamüin tü nünüliakat Jehová. Nüküjatüjülia Isaías yapainjatüin atumawaa nüpüna Jehová (Is. 40:3). Ekeraajüsü tia mapa nükajee Juan chi awoutisaajüikai. Müsü neerutkai saaʼin wopu nüpüleerua Jesús, chi nüjünalakai Jehová otta eʼraajirakai nünülia Jehová (Mat. 3:3; Mar. 1:2-4; Luc. 3:3-6). Anuu wanee kasa nüküjatüjütkalia Isaías: «Sütüjaajeerü aaʼu wayuu süpüshuaʼa pülashin Jehová» (Is. 40:5). ¿Jamüsü sukuwaʼipa süpüla shikeraajüin tia pütchikat? Wanaa sümaa nüntüin Jesús yaa mmapaʼamüin eʼraajünüsü maʼin nukuwaʼipa Jehová sükajee nüshatüin Jesús nukuwaʼipa chi Nüshikai (Juan 12:45).

13. ¿Kasa waaʼinrajatka süpüla washatüin nukuwaʼipa Jesús?

¹³ Aküjalii waya pütchi nüchiki Jehová maʼaka naaʼin Jesús. Eʼraajünüshii waya sükajee tü nünüliakat Jehová otta waküjain sümüin wayuu süchiki tü nukumalakat. Anasüjeseʼe waküjale sümüin wayuu süchiki tü naaʼinrüitpakat Jesús otta süchiki tü naaʼinreetkat mapeena süpüla kojutuinjatüin nünülia Maleiwa nutuma (Aluw. 1:8). Nnojoishi eeichin wanee wayuu aküjakai pütchi nüchiki Jehová maʼaka naaʼinrüin shia Jesús müsüjeseʼe washatüin nukuwaʼipa (Apoc. 1:5). ¿Jamüsü kojutuinjatkaʼa wamüin waneʼewai wakua tü nünüliakat Jehová?

¿KASA WAAʼINRAJATKA KOJUTULE WAMÜIN NÜNÜLIA JEHOVÁ?

14. ¿Kasa waaʼinrajatkat saashin Salmo 105:3?

¹⁴ Waküja süka süpüshuaʼa waaʼin süchiki tü nünüliakat Jehová (paashajeʼera Salmo 105:3). Talatashaatasü naaʼin Jehová namaa na wayuu aküjakana süchiki tü nünüliakat (Jer. 9:23, 24; 1 Cor. 1:31; 2 Cor. 10:17). Talatüsü maʼin waaʼin süka eein süpüla waküjain sümüin wayuu lotuin jee wulein maʼin nukuwaʼipa Jehová. Nnojoishii japülinjanain waya waküjapa sümüin wayuu waküjaliin pütchi nüchiki Jehová waʼyataaleruʼu, suluʼu koleejia, eere kepiain waya jee eepünaale waya. Niyouta achiki Satanás weʼraajirüinjatüin nünülia Jehová (Jer. 11:21; Apoc. 12:17). Nimeejüin wayuu chi Yolujaakai nakajee na nünüikimaajanakana shiiʼiree nnojoluin shiʼraajüin wayuu nünülia Jehová (Jer. 23:26, 27). Saaʼujee alin wapüla Jehová waʼwaajeein nia waneepia (Sal. 5:11; 89:16).

15. ¿Wachuntuinjatche neʼe nünülia Jehová?

¹⁵ Wachuntuinjatüin nünülia Jehová (Joel 2:32; Roma 10:13, 14). Nnojotsü neʼe weʼraajüinjatüin jee wachuntuinjatüin nünülia Jehová. Weʼraajüinjatü nukuwaʼipa, kanoulainjana waya nünain, wachuntajatü nümüin nükaalinjain jee nuʼunirüin wakuwaʼipa (Sal. 20:7; 99:6; 116:4; 145:18). Waküjainjatü sümüin wayuu kasaichin nünülia Maleiwa otta süchiki tü nukuwaʼipakat. Wakaalinjainjana naya süpüla nayaawajaainjanain suulia naainjala jee nanouteʼerüinjatüin nakuwaʼipa süpüla anainjatüin shia noʼuluʼu Jehová (Is. 12:4; Aluw. 2:21, 38).

16. ¿Kasa waaʼinrajatkat süpüla sütüjaanüin aaʼu alawaain tü nüküjakat Satanás wachiki?

¹⁶ Wachecherüinjatü waaʼin soʼunnaa müliaa (Sant. 5:10, 11). Wachecherüle waaʼin soʼunnaa müliaa atüjaaneerü aaʼu alawaain tü nüküjakat Satanás wachiki. Müsü nünüiki Satanás nachiki na aʼyataashiikana nümüin Jehová: «Naapeerü chi wayuukai süpüshuaʼa tü kasa nümaʼanakat süpüla katüin noʼu» (Job 2:4). Naashin chi Yolujaakai aʼyataashii na wayuukana nümüin Jehová sutuma anain nakuwaʼipa, shiasaʼa sülatapa kasa mojusü namüin ooʼulaajeena naya suulia aʼyatawaa nümüin Jehová. Saaʼujee waneepiain Job nümaa Jehová shiyaawata aaʼu wayuu alawaain tü nümakat Satanás. Akaʼaya neʼe wayakana eeshii süpüla washatüin nukuwaʼipa Job, waneepiainjanain waya nümaa Jehová mayaainjeʼe nuuʼulaküin waaʼin Satanás. Watüjaa aaʼu naaʼinmajeenain waya Jehová waneepia saaʼujee tü nünüliakat (Juan 17:11).

17. Saashin 1 Pedro 2:12, ¿kasa waaʼinrajatkat süpüla nuʼwaajünüinjachin Jehová sutuma wayuu?

¹⁷ Waʼwaajüinjachi maʼin Jehová (Prov. 30:9; Jer. 7:8-11). Saaʼujee nünülialuʼuin waya Jehová anainjatüin maʼin tü wakuwaʼipakat suʼupala wayuu süpüshuaʼa. Waaʼinrüle tia aʼwaajüneechi Jehová (paashajeʼera 1 Pedro 2:12). Aneerü sünüiki wayuu nüchiki Jehová jee naʼwaajeechi nia anale sukuwaʼipa wanüiki jee tü waaʼinrakat. Mayaainjeʼe waleʼeruʼuin süchiki kaainjalaa eesü süpüla suʼwaajüin wayuu Jehová saaʼujee wakuwaʼipa.

18. ¿Kasa amaa waaʼinrajatkat süpüla kojutuin wamüin Jehová? (Paashajeʼera tü nootakat).

¹⁸ Kojutuinjachin wamüin Jehová suulialeʼeya tü sümakat wayuu wachiki (Sal. 138:2). Mayaainjeʼe waaʼinrüin tü kasa nüchekakat Jehová eejeerü wayuu mojuteenakana amüin tia jee meeʼerapaleena waya natuma.a Oʼutuna aaʼinchi Jesús maʼaka naaʼin wanee wayuu mojulaashi otta mojutusai nia atumawaa. Naaʼinrapejeʼe tia Jesús süpüla kojutuinjachin Jehová nutuma. Saashin Hebreokana 12:2-4 nnojotsü jamajatüin nümüin niʼrüin japülii. Tü kojutuleekat maʼin nümüin Jesús shia noonooin sümaa nünüiki Maleiwa jaʼitasü jamüin maʼin sünüiki wayuu nüchiki (Mat. 26:39).

19. ¿Jamüsü waaʼin sutuma waʼyataain nümüin Jehová?

¹⁹ Kojutusü wamüin waʼyataain nümüin Jehová jee talatüsü maʼin waaʼin saaʼujee weʼnnaajünüin sutuma wayuu süka waküjaliin pütchi nüchiki Jehová. Müsüjeseʼe nnojoluin jülüjain waaʼin tü sümakat wayuu wachiki, shia kojutuleeka maʼin wamüin tü nünüliakat Jehová. Ayateechia waʼwaajüin Jehová jaʼitairü nüchajaain Satanás sukuwaʼipa süpüla nükayaleʼerüin waya nuulia. Waaʼinrüle tia washateerü nukuwaʼipa Jesús, jaʼyeerü waaʼu kojutuin Jehová wamüin suulialeʼeya kasa süpüshuaʼa.