SUSOUKTAKA EʼIPAJEE TÜ WIWÜLIAKAT
¿Shiimainchejeʼe nümaʼanajeejatüin Maleiwa tü Wiwüliakat?
Wanee karaloukta eeka nümaʼanajeejatüin Maleiwa, naatainjatü sümüin suulia tü wanee karalouktakalüirua. Müsia neʼe tü Wiwüliakat, naata suulia tü wanee karalouktakalüirua. Watta maʼin saalii Wiwülia eʼinpürimiijünaka suluʼu wainma anüikii. Anouktaasü sukuwaʼipa wayuu sutuma tü pütchi suluʼukat. ( Paashajeʼera 1 Tesalónica 2:13 otta 2 Timoteo 3:16.)
Eeshii süpüla weʼitaain waaʼin sünain nümaʼanajeejatüin Maleiwa tü Wiwüliakat. Süka jamüin, pansaain maʼin tü sümakat süchiki tü alatajatkat mapeena. Tia, shia wanee kasa isaka süchiki wayuu. Jamüsüjaʼa tü rooyo sümaajatkat nünüiki Isaías antünakalü anain süʼütpaʼa tü palaa kanüliakat Mar Muerto, ashajünüsü maʼaka sien juya süpülapünaa joʼuuin Jesuu. Sünain tia rooyokot, aküjünüsü nnojoluinjatüin kepiain wayuu suluʼu tü pueulokot Babilonia. Ekeraajüsü tia wainma juya süchikijee ouktüin Jesuu. (Paashajeʼera Isaías 13:19, 20 otta 2 Pedro 1:20, 21.)
¿Jamakuwaʼipat süpüla süshajünüin tü Wiwüliakat?
Soʼutpünaa miit seisiento juya, ashajünüsü tü Wiwüliakat natuma pienchi shikii tooloyuu. Pansaasü tü naashajaakalü achiki. ¿Jamüsü pansaaka maʼin shia? Sutuma niain Maleiwa aküjüin namüin tü nashajüinjatkat. (Paashajeʼera 2 Samuel 23:2.)
Wainmatua naashajaain Maleiwa namaa na ashajakana tü Wiwüliakat nakajee na aapieekana, lapü jee sükajee tü kasa neʼrakat. Mayaapejeʼe niʼitaʼawalin Jeʼwaa suluʼu nekii naya wayuukana tü pütchi nashajüinjatkat, naneeküin tü sukuwaʼipainjatkat süküjia tü pütchikat. (Paashajeʼera Alateetkat Mapeena [Apocalipsis] 1:1; 21:3-5.)