SUSOUKTAKA EʼIPAJEE TÜ WIWÜLIAKAT
¿Jamüsü anaka wakuwaʼipa sutuma naapajiraain nikii Jesuu waaʼu?
Wanaa sümaa nukumajüin Maleiwa na wayuukana, nukumajüin naya süpüla katüinjatüin noʼu waneepia yaa saaʼu Mmaka. Nnojoliinjana ayuulin otta nnojoliinjana ouktüin. Niasaʼa müin Adán, eʼrüijaashi wayumüin nümüin Maleiwa, makalaka ouktüin nia. Süka nüchoin waya, niʼipünaain wapüla tü ouktaakat (Roma 5:8, 12; 6:23, NM). Nuluwataaka Jeʼwaa chi nüchonkai yaa mmapaʼamüin süpüla naapajiraainjachin nikii saaʼu tü wayuukalüirua. Otta anainjatüin wakuwaʼipa maʼaka anapuʼuin nukuwaʼipa Adán. (Paashajeʼera Juan 3:16, NM.)
Naapajiraain nikii Jesuu süpüla katüinjatüin woʼu waneepia yaa saaʼu Mmaka. ¿Jameetche paashin sukuwaʼipa wayuu katapa soʼu waneepia?
Süka ouktüichipain Jesuu, eesü süpüla motuin naaʼin Jeʼwaa tü waainjalakat otta eeshii süpüla kepiain waya waneepia yaa saaʼu Mmaka. Süküjüin wamüin tü Wiwüliakat aneerüin nakuwaʼipa na wayuukana nnojotpa laülawaa, ayuulii otta ouktaa. (Paashajeʼera Isaías 25:8; 33:24 otta Alateetkat Mapeena [Apocalipsis] 21:4, 5.)
¿Kasa waaʼinrajatka süpüla sotuin waaʼin ouktüin Jesuu?
Wanee ai süpülapünaa ouktüin Jesuu, nüküjüin namüin na nikirajüinkana noutkajaʼawaliinjanain süpüla sotuin naaʼin ouktüin nia. Süka woutkajaain juyawai süpüla sotuinjachin waaʼin ouktüin Jesuu, sotusü waaʼin alin waya nüpüla niakai otta nüpüla Jeʼwaa. (Paashajeʼera Lucas 22:19, 20 otta 1 Juan 4:9, 10, NM.)
Soʼu juyakat tüü, eejeerü tia outkajawaakat luuneoʼu, poloo pienchimüin sükalia kashika aaʼuriiroʼu. Eeshi süpüla chain pia sünain, aainjüneerü shia nikerotapa chi Kaʼikai. Naküjeerü pümüin sooʼomüin tü pütchikat na aküjüliikana pütchi kepiakana püʼütpünaa. (Paashajeʼera Roma 1:11, 12.)