SUSOUKTAKA EʼIPAJEE TÜ WIWÜLIAKAT
¿Jamüsü sotuinjatka waaʼin ouktüin Jesuu waaʼu?
¿Kaseerü weʼraka sünainjee ouktüin Jesuu waaʼu?—Isaías 25:8; 33:24
Aapajiraashi nikii Jesuu saaʼu wayuu süpüshuaʼa, nnojotsü wanee kasa anaʼleekalia suulia tia. Eesü süpüla katüin soʼu wayuu süpüla kaʼikat süpüshuaʼa. Meerü nakuwaʼipa maʼaka naaʼin na palajannuukana wayuu nukumajaka Maleiwa. Jamüshiijaʼa naya wayuukana, anashaatasü nakuwaʼipa nutuma Maleiwa, nnojoishii mojulaajüin naya, nnojoishii ayuulin jee nnojoliinjanayaa paala naya ouktüin (Génesis 1:31). Ouktüsü wayuu ütamüinreʼeya süka kaainjalain Adán. Katapajaʼa soʼu wayuu süpüshuaʼa nükajee Jesuu. (Paashajeʼera Mateo 20:28 otta Roma 6:23, TNM.)
Aishaatasü wayuu süpüshuaʼa nüpüla Jeʼwaa, müshijeseʼe nuluwataain chi Nüchon waneeshikai süpüla ouktüin nia waaʼu wapüshuaʼa (1 Juan 4:9, 10). «Tü waaʼinrakat jooluʼu, süpülajatü jaaʼinrüin waneepia süpüla sotüinjachin jaaʼin taya», müshi Jesuu namüin na nikirajüinkana. Nnojotsü wainmainjatüin maʼin kasa aainjünaka sünain tia outkajawaakat, shia neʼe choʼujaaka pan sümaa wiino. Chale waya sünain tü outkajawaakat, weeʼiyatüin sünain waapüin analuʼut nümüin Jeʼwaa nümaa Jesuu saaʼu tü naaʼinrakat wapüleerua. (Paashajeʼera Lucas 22:19, 20.)
¿Jaralii eküinjanaka tü pankat jee asüinjanaka tü wiinokot?
Nüpansaajirain Jesuu wanee pütchi namaa na nikirajüinkana (Mateo 26:26-28). Tia pütchi nüpansaajiraakat shia naluwataainjanain na nikirajüinkana wanaa nümaa chaa iipünaa. Na eküinjanakana pan jee na asüinjanakana wiino nayainjana na aluwataainjanakana chaa iipünaa. (Paashajeʼera Alateetkat Mapeena 5:10.)
Kakaliaichi oʼttüin Maleiwa sünain aneekaa na chainjanakana aluwataain chaa iipünaa, eetaairü maʼaka 2.000 juya alataka (Lucas 12:32, TNM). Paliʼirü naya noulia na yaainjanakana kepiain yaa Mmapaʼa. (Paashajeʼera Alateetkat Mapeena 7:4, 9, 17.)