SUSOUKTAKA EʼIPAJEE TÜ WIWÜLIAKAT
¿Kasache akumajünaka apüla tü Mmakat?
Akumajuushi tü Mmakat süpüla anainjatüin sukuwaʼipa wayuu suluʼu
Anasü maʼin sukuwaʼipa tü Mmakat süpüla kepiainjatüin wayuu suluʼu. Miyoʼu wüin suluʼu süpüla nnojoluinjatüin ouktüin wayuu otta mürüt sutuma wüinyaasü. Pooitüsü tü Mmakat sümaa leeyatachoin shia süpüla nnojoluinjatüin yeelojooin otta itüin tü palaakat. Akaʼaya chaa iipünaa eesü wanee kasa aaʼinmajaka sukuwaʼipa tü Mmakat süpüla nnojoluinjatüin jotuin shia. Wainma wunuʼu otta wainma mürüʼlü yaa mmapaʼa. Sutuma müin sukuwaʼipa, eesü tü kasa akumajünakalü apüla shia naashin na wayuukana. ( Paashajeʼera Isaías 45:18.)
Akatsaʼa jouluin kasa mojusü otta müliaa sainküin tü Mmakat. «¿Alejatche tia nutuma Maleiwa?», eeshii eekai namüin. ( Paashajeʼera Deuteronomio 32:4, 5.)
¿Ekeraajeetche tü akumajünakalü apüla tü Mmakat?
Akumajünüsü tü Mmakat süpüla anainjatüin sukuwaʼipa wayuu suluʼu, kojutüjiraainjanain naya otta alinjachin napüla Maleiwa. Akaʼaya wayakana, eesü tü kasa akumajünakalü apüla waya, müsüjeseʼe waneejatüin wakuwaʼipa suulia tü mürütkalüirua otta tü wunuʼuliakalüirua. Wayaawatapejeʼe aaʼu nukumajalain waya Maleiwa, müshiijeseʼe aipüraliin waya otta waaʼinrüin kasa anasü maʼaka naaʼin niakai. ( Paashajeʼera Eclesiastés 12:13 otta Miqueas 6:8.)
Nikeraajeerü chi Maleiwakai süpüshuaʼa tü naainjüinjatkat naajüin. Makalaka anain maʼin weʼitaale waaʼin sünain najaʼttireerüin Jeʼwaa tü kasa mojusükat otta tü müliaakat. Aneerü wakuwaʼipa nutuma watta kaʼi yaa saaʼu tü Mmakat. ( Paashajeʼera Salmo 37:11, 29 otta Isaías 55:11.)