Aneetka atuma nepijia na tepichikana

«Wainmajüsü taaʼin naaʼu chi tachonkai. Taapawaire shiiʼira kemion, ‹niainjaʼa ee nia› müshi taya sünain tanalaain. Apünüintuairü nukua Jordan sümaa nnojolin nüntüin wanaapünaa sümaa tü oora wamakat nümüin. ‹¿Jalashiche eera nia? Maa müshi taya ¿Kasataaka alatüin nümüin? ¿Nnojotsüche nütüjaain aaʼu wasukaain nüpüla?›, maa müshi taya suluʼu taaʼin. Shiasaʼa nüntapa, jashichishaatashi taya nümüin.» (GEORGE)

«Ayoʼujaasü taaʼin wanaa sümaa taapüin shikiisa tü tachonkat. Eirakaasü taya sümüin, teʼraka sajapuluʼujüin tü shikiikat süka niʼyaatüin shia chi suwalakai.» (NICOLE)

«Mojusü maʼin waaʼin sutuma süküjüin saʼalain wamüin tü wachonkat, sümaa nnojoluin jeʼrain suuyase. Aipirua neʼe juya. Wasakirüin shia sünain jalajatüin süpüla tü süttiijakat ‹nnojotsü taʼluwajüin›, sümaka wamüin. Maaʼatsü shiimainkai saaʼin tü sümakat wamüin süka joʼuuyülüin shia.» (STEPHEN)

KACHONLE pia, eesüjaʼa süpüla sülatüirüin tia pümüin. Makalaka anain jülüjüle paaʼin pütchikalüirua tüü süpüla püchiaain püchonnii: ¿Jamüinjatche sukuwaʼipa tatuma tachiaapa na tepichikana?¿Nnojottaapa choʼujaain tachiaain naya? ¿Mojusüche tachiaale naya?

ACHIAJAAWAA

Nüchiaanüinjachire wanee jintüi, aküjünüinjatü nümüin tü anakat süpüla naaʼinrüin, ekirajünüinjachi nia otta anoukteʼennajatü tü nukuwaʼipakat saashin tü Wiwüliakat. Nnojoishi müliainjachin nia atumayaasan (Proverbios 4:1, 2).

Anainjatü nipijia wanee jintüi süpüla anainjatüin nukuwaʼipa watta kaʼi. Müsia aka saaʼin aaʼinmajaa wanee maata. Jamüsüjaʼa wanee maata, oʼyotunajatü wüin saaʼu, asujunajatü tü mojuuikat suulia, ejitünajatü kaaʼulachaʼa shikiiruʼu, eiyajünajatü suulia keʼeein otta ashoʼlojünajatü tü sütünakalüirua süpüla lotuinjatüin shia iipünaamüin. Tia, shia tü naainjakat wanee wayuu süpüla anainjatüin tü nümaatainkat, müsia nakuwaʼipa na tepichikana natuma na kachonshiikana. Nachajaainjatü sukuwaʼipa süpüla anainjatüin nakuwaʼipa na tepichikana. Süpülapünaa miyoʼuyuuin naya, anashii nachiaanüle süpüla lotuinjatüin nakuwaʼipa. Achiajaanüinjana naya süka anaka akuwaʼipa suulia mojujain naaʼin.

Na wayuu kachonshiikana, nashatüinjatü nukuwaʼipa Jeʼwaa süpüla anainjatüin natuma nepijia na tepichikana. Jamüshijaʼa Jeʼwaa, anasü maʼin sukuwaʼipa süchiaaya wayuu nutuma. Süka anain nakuwaʼipa sutuma nünüiki Maleiwa, kojutüsü shia namüin (Proverbios 12:1). Oonooshii naya waneepia sümaa nünüiki Maleiwa (Proverbios 4:13). Nüchiaain wayuu Jeʼwaa 1) süka anaka akuwaʼipa, 2) wanaapünaa sümaa tü naaʼinrakat chi wayuukai otta 3) wanaapünaa sümaa tü nümakat Jeʼwaa. Püshata nukuwaʼipa Jeʼwaa sünain achiawaa na püchonniikana. Müle shia putuma, oonoojeena naya pümaa otta aneerü nakuwaʼipa.

SÜKA ANAKA AKUWAʼIPA

Nüchiaapa Maleiwa wanee wayuu, nüchiaain nia süka alin nia nüpüla jee süka anaka akuwaʼipa. Saashin tü Wiwüliakat, nüchiaain wanee wayuu Jeʼwaa süka alin nia nüpüla maʼaka saaʼin nutuma chi wayuu aikai apüla nüchonnii (Proverbios 3:12). Nnojoishi mojulaain Jeʼwaa, amüliajüi nia, anashi maʼin, kamaʼashi süpüla jashichijawaa (Éxodo 34:6). Nnojotsü nimeeʼerainpalain wayuu Jeʼwaa, nnojotsü niyoujüin shia jee nnojotsü airuʼuluin nünüiki sümüin (Proverbios 12:18).

Saapajüin wanee wayuu sünüiki süchon[Epiikürape suluʼu süpanaka 30] — PAAPAJA NANÜIKI

Shiimain sünain iseerüin nüchiki wanee wayuu nüshatüin süpüshuaʼa nukuwaʼipa Jeʼwaa. Süka jamüin, eein süpüla naashichijaamaatüin wanee wayuu. Ayaawajaainjachi pia paaʼin müleka jashichire pia. Nnojotsüleʼe anain sukuwaʼipa püchiaale wanee püchon suʼunnaa jashiee. Süka jamüin, nnojoleerüin naapaain sümaa tü pümakat nümüin, eʼrüijeechi neʼe wayumüin pümüin.

Aluʼuinjaʼa püchiaale nia süka anaka akuwaʼipa, aneerü nipijia. Anuu sukuwaʼipa nutuma George otta Nicole.

Oʼuraajüshi wanee wayuu nümaa nüchon[Epiikürape suluʼu süpanaka 30] — PUʼURAAJA NAMAA

«Jashichishii maʼin waya nümüin Jordan süka nnojoluin nüntüin soʼu tü oora wamakat nümüin. Nüküjüinjaʼa wamüin tü alatakat nümüin süpüla müinjachin nia. Motsomüin neʼe wamaʼa sünain yootoo nümaa, ‹shia anaka aluʼu waashajaale wattaʼa› wamaka nümüin. Woʼuraajaka süpüla weisalaain süka kaʼlein maʼin aikat. Waneemüin kaʼi, yootushii waya nümaa chi wachonkai süka anaka akuwaʼipa, nnojoishii waya aashichijaain nümüin. Nüküjüinjaʼa wamüin mojuin tia naainjakat. Sünainjee müitpain nukuwaʼipa, waküjakaʼa nümüin tü naainjüinjatkat, oonooshijaʼa nia sümaa tü wamakat nümüin. Nnojotsü anain müleka wachiaale wanee wachon suʼunnaa jashichin waya; nnojoleerü anain nukuwaʼipa, eʼrüijeechi wayumüin. Shia anaka aluʼu jülüjüle waaʼin palajana tü nümakat wamüin.» (George.)

Yootusü wanee wayuu sümaa süchon[Epiikürape suluʼu süpanaka 30] — YOOTOO PIA NAMAA

«Jashichisü maʼin taya nümüin chi tachonkai süka niʼyaatüin tü nuwalachonkat. Tachecherüin maʼin taaʼin suulia jamajüin neʼe nia tatuma, ‹puʼuna chaa suluʼumüin pükuatse› tamaka nümüin. Sülatapa toulia tü jashieekat, taküjüin nümüin müliain maʼin saaʼin tü nuwalachonkat nutuma otta nnojoluin anain aʼyaataa wayuu. Sutuma taküjüin nümüin nnojoluin anain tü naainjakat, nüküjüin sümüin tü nuwalakat nnojoluin naaʼinjeein tia, nujuupajiraaka sümaa.» (Nicole.)

Anashi püchiaale püchon süka anaka akuwaʼipa süpüla anainjatüin nipijia.

WANAAPÜNAA SÜMAA TÜ NAAʼINRAKAT CHI WAYUUKAI

Nüchiaain waya Jeʼwaa wanaapünaa sümaa tü waaʼinrakat (Jeremías 30:11; 46:28). Jülüjüsü naaʼin jamüin waainjaka shia. ¿Kasa naainjüinjatka na kachonshiikana süpüla nashatüin nukuwaʼipa Jeʼwaa? Müshi Stephen: «Mayaainjeʼe mojuin maʼin waaʼin sutuma tü saainjakat tü wachonkat otta nnojoluin wayaawatüin saaʼu jamüin saainjaka tia, jülüjüsü waaʼin sünain nnojoluin laülaain saaʼin Natalie otta nnojoluin wayuuin miyoʼuin shia».

Robert chi suʼwayuusekai Nicole, jülüjüsü naaʼin palajana jamüin naainjaka kasa mojusü na nüchonniikana. Nüsakireʼerüinjeseʼe naaʼin sünain pütchikat tüü: «¿Naainjüinche tü kasa mojusükat süka kiʼrain naya sünain? ¿Mapüsataapa neʼe naya? ¿Mojusüche naaʼin sutuma tia? ¿Naainjataapa neʼe tia sutuma sülatüin wanee kasa mojusü namüin?».

Na wayuu kachonniikana jülüjüinjatü naaʼin tepichiyüliin na nachonniikana. Müshi Pablo: «Maa aka jintüliiwaʼaya taya, joʼuweesü taaʼin süka tanüiki je süka tü jülüjapüʼükat taaʼin» (1 Corinto 13:11). Müshi Robert: «Tü nnojotkat taashichijaamaatüin atuma namüin tachonnii, shia süka jülüjüin taaʼin mapuʼuin neʼe taya jintüliiwaʼaya taya».

Jülüjüinjatü paaʼin nnojoluin süpüla anain maʼin süpüshuaʼa tü kasa naainjakat chi püchonkai, akatsaʼa nnojoluin anain müleka «ketshiya, kasaka nütüjaaka aaʼu, tepichiyüiya nia» pümüle wanaa sümaa naainjüin kasa mojusü. Püchiaa chi püchonkai wanaapünaa sümaa tü naaʼinrakat otta jülüja paaʼin waneeirua kasa sünainpünaaka nukuwaʼipa.

WANAAPÜNAA SÜMAA TÜ NÜMAKAT JEʼWAA

Malaquías 3:6, müsü mayaa: «Shiimain tayain Jeʼwaa; matüjüinsat aʼwanajawaa tü takuwaʼipakat». Na aʼyataashiikana nümüin Maleiwa, nanoujashaatain maʼin sünain shiimain tia pütchikat. Anasü naaʼin na tepichikana namaa nashi jee nei süka nachiaain naya wanaapünaa sümaa tü namakat. Ayatüinjatia jaaʼinrüin tü jümakat namüin na jüchonniikana müleka nnojoliire jaa namüin jümüin. Nnojotsü neʼe jaaʼinrüinjatüin wanee kasa nnojotka jüküjüin paala namüin. Jaaʼinrüinjatü tia suulia naponojooin na tepichikana sümaa tü paainjapuʼukat namüin.

Soto paaʼin tü nümakat Jesuu, müshi nia: «Müleka paaʼinrüinjatüle wane kasa, ‹Aa› meeshi neʼe pia. Je müleka nnojolüinjatüle paaʼinrüin shia, ‹Nnojo› meeshi neʼe pia». Jülüjeesü jaaʼin pütchikat tüü süpüla anainjatüin jutuma nepijia na tepichikana (Mateo 5:37). Nnojo püküjüin nümüin wanee pütchi nnojotka süpüla pikeraajüin. «Meetsü pukuwaʼipa tatuma müleka nnojoire jaa müin pia tamüin» pümüle nümüin chi püchonkai, ayatüinjatia paainjüin tia.

Na wayuu kachonshiikana paaʼinwainjana sünain wanee kasa naneekaka süpüla anainjatüin natuma nepijia nachonnii. Müshi Robert: «Aluʼuinjaʼa na tachonniikana, eeshii nantüle tanainmüin sünain ‹papaa ojuʼiteeshii waya sünain tü makat mayaa› namüin tamüin,‹anakajaʼa, juʼuna jümaala› tamüshiijaʼa joo naya. Tayaichipajaʼa nawataaka anainmüin süka neʼrüitpain sünain saʼalijirüin naya tü neikat. Nounjulajüin tia toulia. Shiasaʼa tatüjaapa saaʼu tia, nnojoishii tajütüin». Nnojorüle paaʼinwain na kachonshiikana sünain naaʼinrüinjatüin wanee kasa, yooteeshii naya süchiki sünain jamüinjatüin sukuwaʼipa natuma, nnojotsü naainjüinjatüin tia noʼupala na tepichikana.

CHOʼUJAASÜ MAʼIN NACHIAANÜIN

Püchiaale püchon süka anaka akuwaʼipa, wanaapünaa sümaa tü naaʼinrakat otta wanaapünaa sümaa tü pümakat, aneerü nukuwaʼipa. Müle shia putuma, püshateerü nukuwaʼipa Jeʼwaa. Pükaaliinjüle nia maiwaʼaya nia, laülaajeerü naaʼin miyoʼupa, ayateerü naaʼinrüin tü nümakat otta atüjeechi maʼin nia süpüleerua tü nukuwaʼipainjatkat. Müsü tü Wiwüliakat: «Pikiraja püchon wanaajiraa sümaa tü wopu kaluʼuinjachikalü nia; laülaapa nia nnojoleechi ojunujaain suulia» (Proverbios 22:6, NM).