¿Jamüsü kojutüinjatka pümüin Nuluwataaya Maleiwa?

Wainmashaata wayuu eʼitaaka saaʼin sünain tü naainjüinjatkat Maleiwa sükajee tü Nuluwataayakat. Naya wayuukana, ayatüsia naaʼinrüin tü nümakat Jesuu namüin na nikirajüinkana. Soʼu nümüin mayaa: «Püntira tü puluwataayakat, saainjünaiwa tü keeʼireekat paaʼin yaa mmapaʼa maʼaka saainjünüin chaa iipünaa» (Mateo 6:​10, La Biblia de Nuestro Pueblo).

Mayaapejeʼe wainmain wayuu kojutüka amüin tü Nuluwataayakat Maleiwa, nnojotsü maʼin kojutüin shia namüin na anoujakana suluʼu tü iküleesiakalüirua. Naashin H. G. Wells, wanee ashajüi süchiki kasa alatüirü, ponusü maʼin naaʼin nnojoluin shikirajünüin sünain tü Nuluwataayakat Maleiwa suluʼu tü iküleesiakalüirua, eerejeʼe shiain nikirajapuʼuin maʼin anain Jesuu tia Aluwataayakat.

Aluʼuinjaʼa na aküjüliikana pütchi nüchiki Jeʼwaa, nekirajüin na wayuukana sünain tü Nuluwataayakat Maleiwa. Jamüsüjaʼa tü rewiisüta weʼitajawaikat waneepia sümüin wayuu, tü paashajeʼerakat müinmaʼa yaa, eesü shia suluʼu 220 anüikii. Otta alüʼütsü süpüla süntüin sünainmüin 46 miyoone eʼinprimiijünaka aluʼu shia kashiwai. Rewiisütakat tüü, shia wainmaleekaʼaya sünain shiitajünüin suulia wanee yalejee. Eitajünüsü shia sainküin mmaka süpüshuaʼa. ¿Kasakaʼa maʼin ashajünüin achiki suluʼu tü rewiisütakat? Jülüja paaʼin tü sünüliakat tü rewiisütakat sünain sütaka: Aapiria Wayuu. Aküjüsü süchiki Nuluwataaya Jeʼwaa.a

¿Jamüshii waküjaka maʼin pütchi süchiki tü Nuluwataayakat Maleiwa? Shia süka saashajaain maʼin tü Wiwüliakat süchiki tia Aluwataayakat. Otta watüjaa aaʼu shiain neʼe ajaʼlajeʼereerüin tü kasa müliakalü atuma saaʼin wayuu.

Wayakana aküjüliikana pütchi nüchiki Jeʼwaa, palajanasü watuma tü Nuluwataayakat Maleiwa otta shia wekirajaka maʼin anain maʼaka naainjüin shia Jesuu. Shia neʼe washataka tü naainjakat Jesuu (Lucas 4:43). ¿Jamüsü shiaka palajanain nutuma Jesuu tü Nuluwataayakat Maleiwa? ¿Jamüsü aneetka pukuwaʼipa sutuma tü Nuluwataayakat Maleiwa? Wekirajaa sünain tü wanee ekirajaayakalüirua süpüla watüjaain saaʼu tü sümakat tü Wiwüliakat süchiki tia.