PÜTCHI SÜNAINKA SÜTA TÜ REWIISÜTAKAT
¿Paainjüinche tü nümakat Maleiwa pümüin?
«Eere wanee kasa choʼujaaka pümüin, puchunta neʼe shia tamüin.» Nnojorüleejaʼa süpüla müinjatüin pünüiki nümüin wanee wayuu eiwaʼaikai piʼraajüin. Aluʼusaʼa nialeje wanee paʼaleewain, eesüjaʼa süpüla müin pünüiki nümüin müleka pükaaliinjeere nia otta paainjeere tü nuchuntakat pümüin.
Saashin tü Wiwüliakat, wainma tü kasa naainjakat Jeʼwaa nayaaluʼu na aʼyataashiikana nümüin süpüla talatüin naaʼin. Müshinka David, wanee wayuu aleewapuʼuka maʼin nümaa Maleiwa: «Wainma tü kasa pukumajalakat piakai Tamaleiwasekai Jeʼwaa, wainma tü kasa paapakat wamüin [...], nnojoishi jaralin müin aka paaʼin» (Salmo 40:5, TNM). Naainjüinya Jeʼwaa kasa anasü napüleerua na wayuukana napüshuaʼa, jaʼitainna nnojoliin neʼraajüin nia. Saashin tü Wiwüliakat, niaʼaya Maleiwa aapaka namüin tü nekakat waneepia süpüla emirainjanain naya otta talatüinjatüin naaʼin (Aluwataaushikana 14:17).
Talatüsü waaʼin wanaa sümaa waainjüin kasa nayaaluʼu na aikana wapüla jee na kojutükana wamüin
Sükajee wainmain tü kasa naainjakat Jeʼwaa wayaaluʼu süpüla talatüinjatüin waaʼin, eeinjatü tü kasa waainjüinjatkat süpüla talatüinjachin nia watuma (Proverbios 27:11). ¿Kasaka waainjüinjatüin süpüla talatüinjachin Maleiwa watuma? Anuu tü sümakat tü Wiwüliakat: «Soto jaaʼin aaʼinraa kasa anasü sümüin wayuu sümaa jükaaliijiraain jüpüshua. Talateerü naaʼin chi Maleiwakai sütüma tia suulialeʼeya tü mürüt naapapüʼükat na judíokana paala» (Hebreokana 13:16). ¿Talateeiche neʼe Maleiwa watuma müleka waainjüle tü kasa anasükat sümüin wayuu otta wasülajüliire neʼe?
Nnojotsü shiainjatüin neʼe waainjüin tia. Saashin tü Wiwüliakat, «kamaneeshi chi Maleiwakai namüin na eekana [...] nanoujain nünain sünain niain Maleiwain» (Hebreokana 11:6). «Süka shiimüin sünain nünoujain Abraham [nünain Maleiwa] aleewashi» nia nümaa (Santiago 2:23). Naashin Jesuu, anakuwaʼipaleechi wanee wayuu nutuma Maleiwa müleka kanourale nia nünain (Juan 14:1). ¿Kasakaʼa joo paainjüinjatka süpüla kanoulainjachin pia nünain Maleiwa? Ekirajaainjachi pia sünain tü Wiwüliakat. Paainjüle tia, pütüjaweerü aaʼu tü nuchuntakat Maleiwa pümüin otta tü pütüjaweerü aaʼu tü paainjüinjatkat süpüla talatüinjachin nia putuma. Piʼraajüle maʼin chi Maleiwakai otta poonoole nümaa, miyoʼujeerü tü punoulakat nünain otta arütkaweechi maʼin nia pünainmüin (Colosas 1:9, 10).