¿Jamüshi ayatüinjaika pikirajaain sünain tü Wiwüliakat?

1. ¿Jameerü pukuwaʼipa ayatüle pikirajaain sünain tü Wiwüliakat?

Aishi maʼin Jeʼwaa püpüla sutuma tü kasa pütüjaaitpakalü aaʼu suluʼujee tü Wiwüliakat. Ayata pikirajaain süpüla ayatüin alin nia püpüla (1 Pedro 2:2). Kateerü poʼu waneepia ayatüle pikirajaain sünain tü Wiwüliakat. Püleeja Juan 17:3, TNM otta Judas 21, TNM.

Kooʼomüinjeerü punoula otta talateerü naaʼin Maleiwa putuma ayatüle pikirajaain nüchiki (Hebreokana 11:1, 6, TNM). Sutuma tia, puuʼulaajeerü tü kasa mojusükat otta pünoukteerü pukuwaʼipa. Püleeja Aluwataaushikana 3:19.

2. ¿Kasa paaʼinrajatka süpüla pükaaliinjüin wayuu?

Eesü püküjeere namüin na waneeinnua süchiki tü pütüjaakalü aaʼu. Anasü tia süka anain wamüin aküjaa süchiki kasa anasü. Ayatüle pikirajaain, pütüjeerü apüleerua tü Wiwüliakat süpüla püküjüin pütchi nüchiki Jeʼwaa otta süchiki tü pütchi anasü sütüjaainjatkalü aaʼu wayuu. Püleeja Roma 10:13-15, TNM.

Eesü süpüla püküjüin pütchi sümüin püpüshi otta paʼaleewainyuu. Kamanee pia otta kojutü naya pümüin püküjapa pütchi namüin. Püküja namüin süchiki tü kasa naaʼinrajatkat Maleiwa. Nnojo püküjüin namüin mojuin tü nanoujakalü anain. Soto paaʼin shiain jülüjüin naaʼin na wayuukana tü wakuwaʼipakat suulia tü wamakat namüin. Püleeja 2 Timoteo 2:24, 25.

3. ¿Eeshi süpüla paʼaleewain Maleiwa?

Kooʼomüinjeerü punoula otta paʼaleewainjeechi Jeʼwaa pikirajaale sünain tü Wiwüliakat otta naʼakeechi pia na nüpüshikana. Püleeja 2 Corinto 6:17, 18.

4. ¿Kasa paaʼinrajatka süpüla kooʼomüin punoula?

Ayata pikirajaain sünain tü Wiwüliakat (Hebreokana 5:13, 14). Paashajaa nümaa wanee aküjüi pütchi süpüla nikirajüin pia süka tü karalouktakat ¿Kasa shikirajaka maʼin tü Wiwüliakat? Talateerü maʼin paaʼin ayatüle pikirajaain. Püleeja Salmo 1:1-3 otta 73:27, 28.

Tü pütchi anasükat, nümaʼanajeejatü Jeʼwaa, chi Maleiwa talatakai aaʼin. Paʼaleewainjeechi Jeʼwaa puutkajaale namaa na nupueulosekana (Hebreokana 10:24, 25). Kateerü poʼu waneepia ayatüle paainjüin tü nüchekakat. ¡Aleewa pia nümaa Jeʼwaa! Püleeja 1 Timoteo 1:11, TNM otta 6:19, TNM.