PÜTCHI SÜNAINKA SÜTA TÜ REWIISÜTAKAT
Eetaayaai eein wanee kasa eekai müin aka saaʼin tia
¿Kasa paainjüinjatka süpüla naʼaleewainjachin maʼin pia Maleiwa? Wekirajaaitpa anain tü waainjüinjatkat süpüla naʼaleewainjanain waya Maleiwa. Anuu shia:
Watüjaainjatü aaʼu kasaichin nünülia Maleiwa sümaa wachuntajatüin shia.
Oʼuraajüinjana waya süpüla yootuin waya nümaa Maleiwa otta waashajeʼerüinjatü tü Wiwüliakat süpüla waapüin tü nümakat.
Waainjüinjatü waneepia tü nümakat Maleiwa wamüin.
Süpüla naʼaleewainjanain waya Maleiwa, wachuntajatü nünülia, oʼuraajüinjana waya, waashajeʼerüinjatü tü Wiwüliakat otta waainjüinjatü tü nümakat wamüin
¿Paainjüinche tia süpüla pürütkaain nünainmüin Maleiwa? ¿Eetaapa tü nnojoyütkalia paainjüin? Püchajaweein sukuwaʼipa süpüla paainjüin tia. Wainmeerü tü kasa anasü piʼreetkat sünainjee.
Müsü Jennifer, wanee wayuu chejeʼewat Estados Unidos: «Nnojoleerü amülain neʼe tü waainjakat süpüla waʼaleewainjachin Maleiwa. Wainmeerü tü kasa anasü weʼreetkat sutuma naʼaleewain waya Maleiwa. Weʼitaajeerü waaʼin nünain, weʼraajeechi maʼin nia otta miyoʼujeerü naalii wapüla. Eetaayaai eein wanee kasa eekai müin aka saaʼin tia.»
¿Aleeweeshi pia nümaa Maleiwa? Nakaaliinjeechi pia na aküjüliikana pütchi nüchiki Jeʼwaa süpüla naʼaleewainjachin pia Maleiwa. Nekirajeechi pia sünain tü Wiwüliakat masaloui. Jee müsia eeshi süpüla puutkajaain namaa suluʼu tü Piichi eere noutkajaain. Yala, kottiraajeechi pia namaa na wayuu naʼaleewainkana Maleiwa otta na kojutükana amüin nia.a Mapa, meerü paaʼin maʼaka naaʼin wanee salmista makai anüiki: «Kamalainsü tamüin arütkawaa nünainmüin Maleiwa» (Salmo 73:28, TNM).
a Pikirajaweere sünain tü Wiwüliakat jee pütüjaweere saaʼu jalain wanee Piichi Outkajaalee, püsakira chi wayuu aapakai pümüin rewiisütakat tüü jee piʼrajaale suluʼu www.jw.org/guc. Piʼitaa clic sünain PÜCHUNTA EKIRAJAWAA SÜNAIN TÜ WIWÜLIAKAT.