PÜTCHI SÜNAINKA SÜTA TÜ REWIISÜTAKAT | TÜ PAAʼINRAJATKAT SÜPÜLA NNOJOLUIN SHAPAAIN PAAʼIN
Shapaasü saaʼin wayuu süpüshuaʼa
«Ayaʼlajüinjachiaa taya eküülü, shiaka neʼe eejatüin tapüla kayeeta sümaa kojutüshaatain maʼin shia. Waneemüin kaʼi, maluʼusat tapüla tü tientakalüirua.» (Paul, Zimbabue)
«‹Ooʼulaainjachi taya puulia›, müshi chi taʼwayuusekai tamüin. Müsü jalapaʼakai taaʼin sutuma tü nümakat. ‹¿Jameetka nakuwaʼipa na tepichikana?›, maa müsü taaʼin taleʼeruʼu.» (Janet, Estados Unidos)
«Taapaiwaʼaya neʼe tü shiʼirakat sirena, ounjulaamaatüsü taya otta apalasiraasü taya mmoluʼu sümaʼinruʼu süsotooin tü wonpa ojutünakat suluʼujee katünasü. Süchikijee sülatüin tia, ayatüsia kutkuttüin neʼe taya sutuma mmoluukat.» (Alona, Israel)
Shapaasü maʼin saaʼin wayuu. Süküjatüjülia tü Wiwüliakat sünain «müliainjatüin maʼi wayuu süpüshua» maaʼulu yaa (2 Timoteo 3:1). Watta naalii na shapaakana aaʼin sutuma maliain tü nneetkat sümaa kojutüin maʼin tü eküütkat. Eeshii na shapaakana aaʼin sutuma jouluin kasachiki, jouluin ayuulii jee sutuma sülatalaʼa sümüin wanee kasa mojusü namüin. Akaʼaya naya, shapaasü naaʼin saaʼu jameerüin nakuwaʼipa watta kaʼi. Mmotshii naya seema kanserüin naya jee eesü shapaale naaʼin sutuma nnojoluin natüjaain saaʼu jameerüin maʼin nakuwaʼipa nachonnii ooʼulaka naikeyuu watta kaʼi.
Shapaasü saaʼin wayuu süpüshuaʼa sutuma tia. Jaʼitakajeʼe neʼe naainjüinjachire examen wanee wayuu, shapaasü naaʼin. Akaʼaya naashajaainjachire suʼupala wainma wayuu jee nuunejinnüle süpüla wanee aʼyatawaa, shapaasü naaʼin. Anapejeʼe tia süka wayaawajaain waaʼin sutuma. Shia mojuka kakaliale wayuu sünain shapaain naaʼin. Ekirajaana achiiruat tia otta alatüshii suulia 68.000 wayuu sünainpünaaka tia. Nnojoishi eʼrüin wayuu miyoʼuwaa shapaale naaʼin waneepia. Shiimainya maʼin tü nümakat Jesuu wanaa sümaa nümüin: «Tü shapawaakat aaʼin, nnojoleerü kasain saapüin jümüin süpüla epijawaa». Mamaʼasat wayuu shapaale saaʼin waneepia. «Nnojo jüshapataain aaʼin», müshi Jesuu (Mateo 6:25, 27). ¿Eesüche süpüla nnojoluin shapaain naaʼin wayuu?
Jamüsaʼa shia. Achuntajachi nia kaaliinwaa nümüin Maleiwa jee niʼitaainjatü naaʼin sünain nikeraajeerüin Maleiwa tü nümakat. Wekirajaajeerü anain jooluʼu tü akaaliinjakat Paul, Janet jee müsia Alona süpüla jimatüinjatüin naaʼin. Aneerü maʼin wamüin wekirajaale sünain tia, jaratka atüjaain saaʼu sülateerüle wamüin tü alatakat namüin naya wayuukana.