Amojüjaasü maʼin tü takuwaʼipakat shiʼipaʼaya

TAKUWAʼIPAPUʼUKA:

Chajachi taya joʼuuin Los Ángeles (California, Estados Unidos). Wainma maʼin kajapünnuu chaʼayaa otta oikaanüsü droga. Taya chi nüchikijeejachikai chi epayaakai naʼakajee na ja’raishiikana tawalayuu.

Tepichiiwaʼaya waya sümaapuʼushii waya tü weikat suluʼu tü iküleesia wanjeelikakat. Jimaʼaitpa taya nnojotsü kachipünaain taaʼin tü aküjünakat sünain. Rimiinkoʼuwai eeʼirajüshi taya suluʼu tü iküleesiakat jee soʼu tü wane kaʼikalüirua oʼunushi taya sünain miʼiraa, sünain akamüjaa droga otta amaʼüjirawaa akuwaʼipa.

Sutuma katkaaralin taya nnojotsü jameein pütchi tamüin. Tatkaapa taapaain kasa eeka eeyaain süpüla naliʼyain na tatkaakana amaa. Nnojotsü anayaain takuwaʼipa sutuma tü tekirajaakalü anain suluʼu tü iküleesiakat. Pasalaweechi chi Señotkai takajee mapuʼusü tanüiki. Wanaa sümaa sülüʼülaain süpüla 18 touyase kamalainsü tamüin tü naaʼinrakat wanee poliitiko kanüliakana Panteras Negras süka nakaalinjain na wayuukana süpüla anain nakuwaʼipa. Namaashii taya waneirua koleejiajiraakana tamaa makana akuwaʼipaya. Nnojotpuʼusü eein clase sutuma waainjapuʼuin protesta.

Nnojotsü neʼe shiain taaʼinrüin tia, sutuma üttüin taaʼin taaʼinrüin wanee kasa mojuleeka maʼin. Jamüshijaʼa taya namaa na taʼaleewainkana oʼunushii waya suluʼumüin cinekat sünain eʼrajaa peliikula nachiki achepchiee antinnakana Áfricajee sümaa müliain naya atumawaa Estados Unidos. Sutuma weʼrajüin süchiki tia kasa mojusü aainjünakat üttaleesia maʼin waaʼin. Atkaajiraashiijeseʼe waya namaa na jimaʼalii wulekana ata eejanaka suluʼu tü cinekat jee mapa wachajaain eere kepiain naya süpüla waʼyaajüin.

Wanaa sümaa tia, na tawalayuukana otta müshia tayakai, achajaanüshii waya natuma na pulusiiakana süka mojulaain maʼin waya. Eeshi wanee mojulaashi maʼin kamaaka chi temüliakai, oʼunushi joo taya namaʼaya. Eetaayai sunoʼutaweein takuwaʼipa.

SUNOUTEʼERÜIN TAKUWAʼIPA TÜ BIBLIAKAT:

Eeshi wanee taʼaleewain, aküjai pütchi nüchiki Jehová chi nüshikai otta tü niikat, neenajaka taya sünain tü outkajawaakat. Wanaa sümaa toʼunuin namaa tayaawata aaʼu naatajatüin maʼin nakuwaʼipa noulia na waneinnua. Kamaʼanashii naya napüshuaʼa Biblia jee aashajeʼetshi naya suluʼujee. Ekirajüshii pütchi na tepichikanaʼaya. Ponusü maʼin taaʼin tatüjaain saaʼu Jehováin nünülia Maleiwa jee müsia nachuntuin shiaʼaya (Salmo 83:18). Mayaainjeʼe wainmain wayuu suluʼujeejanaka mma naatajatü, nnojotsü koʼuin nakuwaʼipa.

Paala nnojoishi taya ekirajaweein sünain tü Bibliakat kamalainpejeʼe tamüin oʼunaa sünain tü outkajawaakat. Soʼu wanee kaʼi wanaa sümaa chajachin taya sünain tü outkajawaakat oʼunushii na taʼaleewainkana sünain wanee miʼiraa, noʼutaka naaʼin wanee jimaʼai süpüla naʼluwajüin tü nuchakeetüse aainjuushikat süka cuero, waneemüin kaʼi süchikijee tia naainjalakat aʼwaajaashii naya saa’u tia. Chapa naya laülaapialuʼu nnojotsü mojuyaain naaʼin saaʼujee tü naaʼinrakat, noʼutku nayakana müinnaʼaya mojuʼitüin suluʼujee tü kaatsetkat. Talatüshi maʼin taya süka nnojoluin eejachin taya namaa soʼu tia, oʼttushi taya mapa sünain ekirajawaa sünain tü Bibliakat süpüla tanouteʼerüin takuwaʼipa.

Wainmairü kasa alataka tamüin sünainjee mütsiiain tata. Ponopejeʼe maʼin taaʼin nakuwaʼipa na aküjaliikana pütchi nüchiki Jehová. Jamüshijaʼa wanee aküjai pütchi nüchiki Jehová wulekai ata wanaa sümaa nuʼunajachin suluʼumüin wanee mma wattaka, napütüin na nüchonniikana süpüla naaʼinmajünüin natuma na wawalayuu mütsiiakana ata. Eetaashi wanee jimaʼai mütsiiakai ata sutuma nnojoluin jalainjachin kepiain nia, namaashi wanee wawalayuu wulekana ata. Tayaawata saaʼu noonooin na Aküjaliikana Pütchi sümaa tü nümakat Jesucristo suluʼu Juan 13:35 tü makat: «Aijiraale jia waneʼewai jukua, shiyaawateerü aaʼu wayuu tekirajanain jia».

Tayaawataka saaʼu tantüin nanain na anoujashii shiimainshiikana, tanouteʼerüinjeseʼe takuwaʼipa pansaa sümaa tü tekirajakalü suluʼujee tü Bibliakat. Tachajaain maʼin sukuwaʼipa süpüla anamiainjachin taya, süka kapüleein shia tamüin (Roma 12:2). Anoutaasü takuwaʼipa shiʼipaʼaya, woutiisaka taya eneeroʼu soʼu 1974, taküjaikalaka joo pütchi nüchiki Jehová.

Süchikijee woutiisain taya ayatüsia choʼujaain tamüin tachecherüinjachin taaʼin. Jamüsüjaʼa soʼu wanee kaʼi wanaa sümaa waküjain pütchi, eeshi wanee kaʼruwarai aʼluwajakai suraawiase tü teʼejenakat. Teipiraka nia, shiasaʼa wanaa sümaa pejeshaanain taya nünain nojutaka tü raawiakat, taküjaka namüin na wawalayuukana tü alatakat wanaa sümaa suʼluwajünüin suraawiase teʼejena, nümaka tamüin wanee wawala laülaakai aaʼin sünain anoujaa: «¿Kasajeʼe paaʼinraka pütaʼülüle nia?». Tayaawataka saaʼu sünainjee tü nüsakirakalü anain chi wawalakai eeyülüinya kasa tanouteʼerajatka sünain takuwaʼipa.

Oʼutuupüroʼu soʼu 1974 pürekutsootshi taya, 100 oora talatiraka sünain ekirajaa wayuu süpüla kashikat. Mapa tounejaanaka süpüla taʼyataain suluʼu tü Weteet chakat Brooklyn (Nueva York). Soʼu 1978 aleʼejüshi taya Los Ángeles süpüla taaʼinmajüin tü teikat süka ayuulin shia. Piama juya süchikijee kasaatshi taya sümaa Aarhonda. Sükaalinjain maʼin taya sünain aaʼinmajaa tü teikat sünainmüinreʼeya sünaajaain. Mapa wounejaanaka sünain tü ekirajaaleekat Galaad sutuma Watchtower, kettaapa tü ekirajawaakat ajütünüshii waya Panamámüin süpüla misioneeroin waya, eere aniiyülinya waya maaʼulu yaa.

Soʼujeʼereʼeya woutiisain taya, eesü kaʼi kapüleeka oʼu tamüin tachecherüinjachin taaʼin suulia jashiee. Tü taaʼinrakat suulia taʼülüjiraain oʼunushi taya wattaluʼumüin jee shiale tachajaain sukuwaʼipa shiimalaain tü kasa alatakat. Wainma wayuu jee müsia tü taʼwayuusekat epelisitaajaka taya saaʼu tü taaʼinrakat, ponusü maʼin taaʼin tia, nnojotsü tountuin süka taaʼin tamüiwaʼa suʼwanajaain takuwaʼipa, shia süka tekirajaain sünain tü Bibliakat, süka shiain aʼwanajaain atuma sukuwaʼipa wayuu (Hebreokana 4:12).

TÜ KASA ANASÜ TEʼRAKAT:

Tayaawata aaʼu sünainjee tü Bibliakat eein süpüla talatüin taaʼin jee shikirajüin taya süpüla anamiainjachin taya. Nnojoluichipa taya aʼyaajüin wayuu, takaalinjain naya süpüla neʼraajüin Maleiwa. Tekirajüin jooluʼu sünain tü Bibliakat wanee wayuu tatkaapuʼukai amaa koleejiaiwaʼaya taya. Süchikijee woutiisain nia, kepiapuʼushi nia wamaa. Ayatayüiya taya aleewain maʼin nümaa. Alatüshii suulia 80 wayuu wakaalinjakana süpüla naküjaliinjanain pütchi nüchiki Jehová.

Talatüshi maʼin taya süka anain takuwaʼipa nutuma Jehová otta aleewain taya namaa wawalayuu kamaneekana maʼin.