«Süʼürülashi taya wayuu»

TAKUWAʼIPAPUʼUKA:

Chajachi taya miyoʼuin Chile suluʼu tü mmakat Santiago. Süʼütpünaa tepia oʼutünüsü saaʼin wayuu waneepia, oikkaanüsü droga otta watta saalii wayuu mojulaasü. Oʼutüna aaʼinchi chi tashikai wanaa sümaa jaʼralin touyase. Mapa kepiajiraaka tü teikat nümaa wanee wayuu mojulaashi maʼin, müliapuʼushii maʼin waya nutuma süka niyaajapuʼuin waya. Mojuyülia taaʼin sutuma tü alatakat tamüin soʼu tia.

Jimaʼaipa taya, wayuu kaashichijaarai maʼin taya, nnojoishi taya jameein atumaa. Aapajaapuʼushi taya wanee muusika heavy metal münüsü, epetpuʼushi taya otta akaijapuʼushi taya. Atkaʼawaishi taya waneepia namaa na oikkaaliikana droga. Wainmatua tajachajuuin natuma. Soʼu wanee kaʼi nawalaajüin wanee wayuu mojulaashi maʼin süpüla nuʼutüinjatüin taaʼin. Nüsonooin taya süka wanee rüi, isapejeʼe taya nuulia. Shiasaʼa mapa süchikijee tia, eetaashii joo waneeinnua oikkaalii droga neʼitaain wanee riwoolü sünain tekii otta naülüinjachia taya.

Soʼu juyaka 1996 müliajaashi taya shiiʼiree wanee jierü, Carolina sünülia. Shiasaʼa soʼu juyaka 1998 kasaatka taya sümaa. Jemeipa chi palajachikai wachon, «¿tayaajeeiche tachon sümaa taʼwayuuse maʼaka naainjapuʼuin taka chi tashiyaashikai?» maa müsü taaʼin taleʼeruʼu. Nnojoishi meein taya maʼaka naaʼin chi tashiyaashikai. Sutumajee tia, oʼunüshi taya eere nakaaliinjünüin na wayuu ooʼulaweekana suulia akaijaa, asawaa otta eekai müin aka taaʼin kaashichijaaralin. Nnojotpejeʼe anouktaain takuwaʼipa sutuma tü tratamiento naapakat tamüin na tottootkana. Ayatüshia neʼe taya kaashichijaaralin. Mepireeichipajaʼa taya. Shiasaʼa süpüla nnojoluinjatüin müliain tatuma taʼwayuuse nümaa tachon, oʼuniraainjachia paala taya taaʼin. Akalajasaʼa nnojoluin taaʼinrüin tia.

Anoujeeshi joo taya nünain Maleiwa, mayaapejeʼe nnojolin jamajachin nia tamüin nümaiwa. Müshijeseʼe toʼunapuʼuin sünain akuttajaa namaa na wanjeelikokana. Suʼunnaa tia, nekirajüin tü taʼwayuusekat na aküjüliikana pütchi nüchiki Jeʼwaa. Taʼleejapuʼuin maʼin naya otta kashüülapuʼusü tanüiki namüin. Nnojoliipejeʼe peʼipaain naya tamaa, anasü neʼe nanüiki tamüin.

Shiasaʼa soʼu wanee kaʼi, «püchajaa suluʼu tü Piwiwüliasekat Salmo 83:​18, aküjünüsü yala Jeʼwaain nünülia Maleiwa», sümaka Carolina tamüin. Nnojotsü tatüjaain aaʼu kasaichin nünülia Maleiwa, mayaapejeʼe tekirajünüin nüchiki suluʼu tü iküleesia toʼunakalü aluʼu. Soʼu juyaka 2000, ekirajaashi taya sünain tü Wiwüliakat namaa na aküjüliikana pütchi nüchiki Jeʼwaa.

SUNOUKTEʼERÜIN TAKUWAʼIPA TÜ WIWÜLIAKAT:

Tekirajaapa shiʼipaʼaya sünain tü Wiwüliakat, teʼrüin nümüliajülin wayuu Jeʼwaa sümaa motuin naaʼin tü saainjalakat wayuu nümüin. Sütütüleʼerüin maʼin taaʼin tü sümakat Éxodo 34:​6, 7, müsü sünüiki: «Jeʼwaa nia wanee Maleiwa amüliajüi, anashi maʼin, kamaʼashi süpüla jashichijawaa, aipürai maʼin nia otta shiimain maʼin tü nümakat, ayatüsia alin wainma wayuu nüpüla, nülatirüin sooʼopünaa naaʼin tü kasa mojusü aainjünakat, tü eʼraakat wayumüin otta tü kaainjalaakat».

Kapüleepejeʼe maʼin tamüin aaʼinraa tü tekirajaakalü anain suluʼu tü Wiwüliakat. Nnojoluinjatia anouktaain takuwaʼipa taaʼinruʼu. Aashichijaapuʼushi neʼe taya waneepia. Akatsaʼa sütütüleʼerapuʼuin taaʼin Carolina, süküjawalin tamüin kojutüin nümüin Jeʼwaa tü taaʼinrakat süpüla tanoukteʼerüin takuwaʼipa. Sutuma tia, tachajaain maʼin sukuwaʼipa süpüla anainjachin taya noʼuluʼu Jeʼwaa mayaapejeʼe müin mepikai taaʼin.

Soʼu wanee kaʼi nikirajüin taya Alejandro, chi wawala ekirajakai taya sünain tü Wiwüliakat, shiasaʼa nümaka tamüin süpüla taashajeʼerüin Galacia 5:​22, 23. Sünain tia pütchikat, aküjünüsü jaralin tü nukuwaʼipakat wanee wayuu eekai jüüjüüin nümüin chi naaʼinkai Maleiwa. Süchikijee taleejüin tü pütchikat, nüküjüin tamüin Alejandro choʼujaain jüüjüüinjachin taya nümüin chi naaʼinkai Maleiwa süpüla müinjatüin takuwaʼipa maʼaka sümüin tü Wiwüliakat. Tayaawataka saaʼu nnojoluin süpüla tainküin tia tamüiwaʼa.

Süchikijee tia, toʼunaka sünain wanee outkajawaa miyoʼu. Shiasaʼa sutuma teʼrüin paaʼinwain na aküjüliikana pütchi sünain tü naaʼinrakat, wulein maʼin kasa süpüshuaʼa otta aijiraain naya, tatüjaaitpa aaʼu shiain tü iküleesia shiimainsükat tü kaluʼukat naya (Juan 13:​34, 35). Awoutisaajüshi taya soʼu juyaka 2001.

TÜ KASA ANASÜ TEʼRAKAT:

Wayuu kaashichijaarai taya tamaiwa otta süʼürülashi taya wayuu. Tayapejeʼe neʼe kasirüin süpüla süʼürülainjachin taya wayuu. Nia akaaliinjaka taya Jeʼwaa süpüla wayuuinjachin anamia taya. Tamaiwa paala, müshi taya maʼaka naaʼin wanee wayuu eekai kapüin. Aluʼusaʼa maaʼulu, anaichipa taya otta aʼyataashi taya nümüin Jeʼwaa sümaa taʼwayuuse jee na piamashiikana tachonnii.

Ponoshootosü naaʼin na wayuu kasakana tanain otta na wayuu taʼaleewainpuʼukana sutuma neʼrüin suʼwanajaain maʼin takuwaʼipa. Sutumajee tia, eeshii na kamalainkana amüin nünüiki Maleiwa. Nnojoliipejeʼe nayain neʼe tekirajüin namüiwaʼa. Kojuyainna wayuu tekirajaka sünain tü Wiwüliakat. Talatüshi maʼin taya süka sunouktaain nakuwaʼipa sutuma tü nekirajaakat sünain tü Wiwüliakat.