TÜ PAAʼINRAJATKAT SUULIA ÜTTÜIN PAAʼIN

4 | PUCHUNTA KAALINWAA NÜMÜIN MALEIWA

Tü sümakat tü Bibliakat:

«Sutuma tü nüpülainkat Maleiwa eesü aijirawaa, talataa aaʼin, jimataa aaʼin, atüjaa aʼatapajaa, aaʼinraa kasa anasü, kamanewaa, anoujaa, anamiaa, achecheraa aaʼin» (GALACIA 5:22, 23, TNM).

¿Jamaluʼulu tia?

Eesü süpüla wasünneʼerüin suluʼujee waaʼin tü üttaakalü aaʼin nükaalinjale waya Maleiwa. Nükaalinjeena waya sükajee tü nüpülainkat süpüla eeinjatüin wanain tü akuwaʼipaairua anainjatkalü atuma wakuwaʼipa. Nükaalinjainjeseʼe waya Maleiwa süpüla wasünneʼerüin suluʼujee waaʼin tü üttaakalü aaʼin, tü isakat wachiki wasünneʼerüin wamüiwaʼa. Waaʼinrüle tia, meerü wanüiki maʼaka naaʼin chi aluwataaushikai Pablo sünain maa: «Süka katsüin taaʼin nutuma chi akatsüinrakai taaʼin» (Filipos 4:13, TNM). «Nükaalinjeechi taya Jehová», meena waya (Salmo 121:2).

Puuʼulaka paaʼinrüin tüü:

«Mojulaapuʼushi taya paala [...]. Eekajasaʼa maaʼulu, anamiaichipa taya nutuma Jehová» (WALDO).

Puchunta maʼin nümüin Jehová naapaiwa pümüin tü nüpülainkat süpüla anainjatüin pukuwaʼipa (Lucas 11:13, TNM). Paaʼinrüle tia, aipüraleechi pia, jimateerü paaʼin, atüjeechi pia aʼatapajaa otta atüjeechi pia achecheraa aaʼin. Choʼujaasü müinjatüin pukuwaʼipa süpüla püsünneʼerüinjatüin suluʼujee paaʼin tü üttaakalü aaʼin. Pikirajaa sünain tü sümakat tü Bibliakat süchiki tia akuwaʼipaairua jee paaʼinra shia. Paʼaleewajaale namaa na wayuu makana akuwaʼipa, natütüleʼereerü paaʼin süpüla aipüralinjachin pia jee süpüla paaʼinrüin kasa anasü napüleerua na waneinnua (Hebreokana 10:24).

Tü nukuwaʼipapuʼukat: WALDO

Ooʼulaashi nia suulia üttüin naaʼin jee mojulaain

Eʼrüshi maʼin müliaa Waldo jintüliiwaʼaya nia. Suluʼujee tia üttüsü naaʼin sünain wayuu. Müshi nia: «Atkaapuʼushi taya namaa na oikaaliikana yüi. Soʼu wanee kaʼi, awalaajünüshi wanee wayuu süpüla nuʼutuin taaʼin. Nusotüin taya uwatua, isajapejeʼe taya nuulia».

Niyoutuin Waldo süpüleerua nuʼwayuuse shikirajaain sünain tü Bibliakat namaa na aküjaliikana pütchi nüchiki Jehová. «Nnojoipuʼushii teʼreein naya, awooroloopuʼushi taya sümaa yarüttüin tanüiki namüin. Ponopejeʼe taaʼin süka nnojoluin nasoutuin teʼipajee», müshi nia.

Mapa, ekirajaashi nia sünain tü Bibliakat. Anuu nünüiki: «Kapüleesü tamüin taaʼinrüin tü tekirajaakalü anain. Isapuʼusü tachiki tachecherüin taaʼin suulia jashiee». Nikirajaaka suluʼujee tü Bibliakat wanee kasa aʼwanajeʼeraka nukuwaʼipa.

Anuu sooʼomüin nünüiki: «‹Paashajeʼera tamüin Galacia 5:22, 23›, müshi tamüin Alejandro, chi ekirajakai taya sünain tü Bibliakat [...]. Süpüla eeinjatüin tanain tia akuwaʼipaakalüirua, tachuntajatü shia nümüin Maleiwa naashin Alejandro süka nnojoluin süpüla tountuin shia tamüiwaʼa. Tayaawatakalaka saaʼu tü taaʼinrajatkat».

Nüsünneʼerüin Waldo suluʼujee naaʼin tü üttaakalü aaʼin süka nuuʼulaain nükaalinjain nia Maleiwa. Anuu nünüiki: «Ponusü maʼin naaʼin na tapüshikana otta na taʼaleewajaapuʼukana amaa süka neʼrüin teeʼiratüin takuwaʼipa. Mojulaapuʼushi taya paala [...]. Eekajasaʼa maaʼulu, anamiaichipa taya nutuma Jehová».