TÜ PAAʼINRAJATKAT SUULIA ÜTTÜIN PAAʼIN
3 | PÜSÜNNEʼERA PIKIIRUʼUJEE TÜ ÜTTAAKALÜ AAʼIN
Tü sümakat tü Bibliakat:
«Juuʼulaa suulia ashataa nakuaippa na manoujainsaliikana. Nnojo jülüjüin jaaʼin maa aka tü jülüjakat naaʼin nayakana. Müleka juuʼulaale suulia, niiʼirateerü jukuaippa Maleiwa. Sünainjee tüü, juunteerü jiyaawatüin saaʼu tü nüchekakat jüpüleerua, je keeʼireejeerü jaaʼin jaaʼinreein tia» (ROMA 12:2).
¿Jamaluʼulu tia?
Kachipünaasü naaʼin Maleiwa tü jülüjakat waaʼin (Jeremías 17:10). Nnojotsü neʼe wayoutajatüin waküjain pütchi mojuluʼut jee waaʼinrüin kasa sutuma üttüin waaʼin sünain wayuu, acheküsia wasünneʼerüinjatüin shia wekiiruʼujee jee suluʼujee waaʼin. ¿Jamüsü waaʼinrajatka tia? Shia süka sukumajaain suluʼu waaʼin tü üttaakalü aaʼin.
Puuʼulaka paaʼinrüin tüü:
Püsakireʼera paaʼin kasain jülüjain paaʼin jee jamüin paaʼin nanainmüin na waneinnua, nialeekajaʼa nümüin chi eekai naatain eʼiruku puulia jee oumain. Püsakireʼera paaʼin sünain tüü: «¿Kojutushiiche naya tamüin? ¿Mojutataapa naya tamüin sutuma tü namakat na waneinnua? ¿Tayache alerajaka naya?». Jalia pünajayaai peliikula jee kasa suluʼupünaa internet süchikimaajatka üttaa aaʼin jee mojulawaa.
Jalouisü wamüin tü Nünüikikat Maleiwa süpüla wasünneʼerüin suluʼujee wekii jee suluʼujee waaʼin tü üttaakalü aaʼin
Nnojotsü mapüleein ayaawataa saaʼu anale jee mojule tü jülüjakat waaʼin süchiki wayuu. Jalouisü wamüin tü Bibliakat süpüla wayaawatüin saaʼu tü jülüjakat waaʼin «müleka analein ooʼulaka nnojorüle anain» (Hebreokana 4:12). Pikirajaa sünain tü Bibliakat süpüla piyaawatüin saaʼu anale tü jülüjakat paaʼin. Püchajaa maʼin sukuwaʼipa süpüla wanaawain tü jülüjakat paaʼin sümaa tü shikirajakalü anain. Sükajee tü Nünüikikat Maleiwa eesü süpüla wasünneʼerüin suluʼujee wekii kasa mojusü maʼaka saaʼin tü üttaakalü aaʼin (2 Corinto 10:4, 5, TNM).