TÜ PAAʼINRAJATKAT SUULIA ÜTTÜIN PAAʼIN
2 | Nnojo Keeʼireein Paaʼin Pasalawaa
Tü sümakat tü Bibliakat:
«Müleka mojulaale wane wayuu jümüin, anakaja müleka jiirakaale nüka. Nnojo mojulaain jia niʼipajee, shia jaaʼinra tü anasükat suʼupala wayuu süpüshua [...], nnojo keeʼireein jaaʼin pasalawaa [...]. Anuu tü nümakat chi Maleiwakai sooʼopünaa tia, ashajünüsü paala sümaiwa sünain müin mayaa: “Süsalainjatü wayuu tatüma tayakai süka tayain pasalaainjachin atüma wayuu”» (ROMA 12:17-19).
¿Jamaluʼulu tia?
Jashichishii waya saainjünüle kasa mojusü wamüin, nnojotpejeʼe keeʼireein naaʼin Maleiwa pasalaainjanain waya. Nütütüleʼerüin waaʼin süpüla wapütüin najapuluʼu süsalainjatüin saainjala wayuu nutuma otta nüküjain wamüin najaʼttirüinjatüin tü mojulawaakat (Salmo 37:7, 10).
Puuʼulaka paaʼinrüin tüü:
Sutuma tü pasalawaakat, akooʼomüinraasü tü üttaakalü aaʼin. Airuʼurule sünüiki wayuu pümüin jee saainjünüle kasa mojusü pümüin, nnojo mojulaain pia shiʼipajee. Püchecheraa paaʼin suulia paaʼinrüin kasa mojusü sutuma jashiee. Eesü waneirua kasa eeka süpüla pülatirüin sooʼopünaa paaʼin (Proverbios 19:11). Eepejeʼe waneirua kasa nnojotka anain yüütüle pia suulia. Jamüshijaʼa puʼluwajünüle, eesü süpüla püküjain shia sümüin pulusiia jee pukumajüle sukuwaʼipa laülaapialuʼu.
Nnojotsü kasain weʼrüin pasalaale waya
¿Jama kapüleere pümüin punoutuin süka anakalü akuwaʼipa tü alatakat? ¿Jama püchajaaitpale maʼin sukuwaʼipa süpüla punouteʼerüin tü alatakat sümaa ayatataain shia? ¿Kaseerü paaʼinraka? Anashi nnojoire pasalaweein pia suulia mojuleein maʼin tü alatakat. Püsünneʼera suluʼujee paaʼin tü üttaakalü aaʼin. Piʼitaa najapuluʼu Jehová, nieechi anouteʼeraka shia. Anuu sünüiki Salmo 37:3-5: «Piʼitaa paaʼin nünain süpüla nükaalinjain pia».