PÜTCHI SÜNAINKA SÜTA TÜ REWIISÜTAKAT | ¿JARALII NA AKÜJÜLIIKANA PÜTCHI NÜCHIKI JEʼWAA?
¿Kasa nanoujaka anain na aküjüliikana pütchi nüchiki Jeʼwaa?
Wanouja anainrü nüshajiralain Maleiwa tü Wiwüliakat nükajee chi naaʼinkai (2 Timoteo 3:16). Wekirajaa anainrü tü Wiwüliakat süpüla weʼraajüinjachin chi Kakumalakai waya otta wooʼulaain shiain oʼunirüin wakuwaʼipa süpüla talatüin waaʼin.
Saashin tü Wiwüliakat, nia neʼe Jeʼwaa «chi Miyoʼushikai saaʼu tü mmakat süpüshuaʼa» (Salmo 83:18, TNM). Nia neʼe Jeʼwaa waʼwaajüinjachika nümüiwaʼa. Wachajaainjeseʼe sukuwaʼipa süpüla weʼraajirüinjatüin wayuu tü nünüliakat (Isaías 43:10-12).
Wanouja anainrü niain Jesuu «chi nüchoinkai Maleiwa»a, yaajachi nia yaa mmapaʼa jee ouktüshi waaʼu (Juan 1:34, 41; 4:25, 26). Wanouja anainrü nüsoʼiraain aaʼin otta nuʼunüin chaa iipünaamüin (1 Corinto 15:3, 4). Mapa, niʼitaain nia Maleiwa süpüla aluwatawaa (Alateetkat Mapeena 11:15, TNM). Paʼaraiiseerü tü Mmakat nuluwataapa saaʼu (Daniel 2:44). «Na anamiakana namüinjeerü tü mmakat otta shiimain talateenain naya süka jimateerüin naaʼin», müsü tü Wiwüliakat (Salmo 37:11, 29, TNM).
«Wanaa sümaa naashajeʼerüin tü Wiwüliakat, müshi naashajaakai Maleiwa namaa. Neʼrüle müliaa, nachajaamaatüin suluʼu tü Wiwüliakat tü kasa akaaliinjeenakana naya süpüla eejiraain sümaa tia. Kojutüsü namüin tü Nünüikikat Maleiwa.» (Sacerdote católico Benjamin Cherayath, en el periódico Münsterländische Volkszeitung, Alemania)
Wayaawata aaʼu aneerüin wayuu sutuma tü sümakat Wiwüliakat (Isaías 48:17, 18). Oonooshiijeseʼe waya sümaa sünüiki. Süchiaain waya tü Wiwüliakat suulia waainjain kasa yarütteetka atuma waaʼin maʼaka saaʼin tü akamüjaakat yüi jee sikariia (2 Corinto 7:1). Wayoukta amaalü tü amaʼüjirawaakalü akuwaʼipaa, epeʼruwaa otta aʼluwajaa (1 Corinto 6:9-11).