PÜTCHI SÜNAINKA SÜTA TÜ REWIISÜTAKAT | ¿KASA ANASÜ WEʼREETKA WOʼURAAJAWAIRE?
¿Jamüsü nuchuntaka wamüin Maleiwa woʼuraajüin nümüin?
Aleeweeshi Maleiwa wamaa.
Maʼaka kojutüjiraale piamashii wayuu, aleeweena maʼin naya. Keeʼireesü naaʼin Maleiwa waashajaainjanain nümaa süpüla naʼaleewainjanain waya. Anuu nünüiki Maleiwa wamüin: «Shiimainshaana juʼuraajeenain tamüin, tasoukteechikalaka jiʼipajee» (Jeremías 29:12, TNM). Waashajaale waneepia nümaa Maleiwa, arütkaajeena waya nünainmüin (Santiago 4:8). «Pejeshi Jeʼwaa nünain chi wayuu [...] aʼwaajakai nia», müsü tü Wiwüliakat (Salmo 145:18, TNM). Naʼaleewainjeena maʼin waya Jeʼwaa woʼuraajüle nümüin weinshi.
«Pejeshi Jeʼwaa nünain chi wayuu [...] aʼwaajakai nia» (Salmo 145:18, TNM).
Nükaaliinjeein waya Maleiwa.
Müshinka Jesuu: «Maa aka nüchuntüle pümüin wane pan chi püchonkai, ¿paapeerü wane ipa nümüin? Nnojo taa. Jama müleka nüchuntüle wane jime, ¿paapeerü wane wüi nümüin? Nnojo taa. Eerejeʼe neʼe wayuuin kaainjaraliin jia, atüjashii jia aapaa kasa anasü namüin na jüchooinkana. Nialeeka chi Jüshikai Maleiwa chakai iipünaa, alanaʼaleeshia maʼi sünain anamiain jümüin. Naapeerü kasa anasü jümüin müleka jüchuntüle nümüin» (Mateo 7:9-11). Oʼuraajüinjana waya nümüin Maleiwa süka keeʼireein naaʼin naaʼinmajüin waya jee nükaaliinjeein waya (1 Pedro 5:7). Anasü nümüin Maleiwa woʼuraajüle nümüin wanaa sümaa sülatüin kasa mojusü wamüin. Müsü tü Wiwüliakat: «Nnojo jüshapataain aaʼin sooʼopünaa wane kasa. Shia jaaʼinra achuntaa nümüin Maleiwa sooʼopünaa kasa süpüshua. Jüküja nümüin tü shapaakat atüma jaaʼin. Otta nnojo motüin jaaʼin aapaa analuʼut nümüin saaʼu tü anasü naaʼinrakat jümüin» (Filipos 4:6).
Choʼujaashi wamüin chi Maleiwakai.
Naashin na ekirajaaliikana sünain sukuwaʼipa wayuu, nayaawatüin saaʼu wainmain na choʼujaakana amüin noʼuraajüinjanain. Akaʼaya na ateo münakana jee na agnóstico münakana, oʼuraajüshii nayayaʼasaʼa.a Choʼujaashii woʼuraajüinjanain nümüin chi Kakumalakai waya süpüla warütkaain nünainmüin. Anuu nünüiki Jesuu: «Anataʼaleeshiijaʼa maʼi jia eʼrakana sünain cheʼojaain chi Maleiwakai jümüin» (Mateo 5:3). Woʼuraajüle weinshi nümüin chi Maleiwakai, weeʼiyatüin sünain choʼujaain nia wamüin.
¿Kasa weʼreetka woʼuraajüle nümüin Maleiwa?
a Saashin Centro de Investigación Pew soʼu tü juyakat 2012, aashajaasü nachiki na ateokana otta na agnóstico chejeʼewaliikana Estados Unidos sünain noʼuraajüin noʼutku uatua süpüla kashika.