¿Kasa shikirajaka tü Wiwüliakat?
¿Shiʼinaajalache wayuu sukuwaʼipa tü anoujaakat?
NAASHIN WANEEINNUA WAYUU, shiʼinaajala wayuu sukuwaʼipa tü anoujaakat. Eetaashii joo na anoujakana sünain niain keʼinaajalain Maleiwa sukuwaʼipa tü anoujaakat süpüla sürütkaainjatüin wayuu nünainmüin. ¿Jamajaʼa saaʼin pümüin tia?
TÜ SÜMAKAT TÜ WIWÜLIAKAT
Eesü wanee «sukuwaʼipa aʼwaajaa [anoujaa] wulesükat otta nnojotka yarüttüin noʼuluʼu chi Washikai Maleiwa» (Santiago 1:27, TNM). Sutuma tia, watüjaa aaʼu niain keʼinaajalain Maleiwa tü anoujaa shiimainsükat maʼin.
¿KASA MAA SÜKÜJAKA TÜ WIWÜLIAKAT?
Tü anoujaakat, pansaainjatü sümaa tü sümakat tü Wiwüliakat süpüla anainjatüin shia noʼuluʼu Maleiwa (Juan 4:23, 24).
Nnojoleena eʼrüin kasa anasü na eekai nanoujain sünain tü süleʼeruʼujeejatkat neʼe wayuu (Marcos 7:7, 8).
¿Choʼujaasüche namaain pia na anoujashiikana?
EESHII EEKAI NAMÜIN:
«Aa»
«Nnojo»
«Jamüin paajüin»
¿Jamajaʼa saaʼin pümüin?
TÜ SÜMAKAT TÜ WIWÜLIAKAT
«Anakaja müleka wakaaliijiraale wapüshua sünain kamaneejiraain je sünain waaʼinrüin tü anasükat. Je anakaja müleka nnojoliire müin aka waya naaʼin na wayuu akulajaakana aaʼin sünain jutkatirawaa» (Hebreokana 10:24, 25). Keeʼireesü naaʼin Maleiwa noutkajaʼawaliinjanain na anoujakana nünain.
¿KASA MAA SÜKÜJAKA TÜ WIWÜLIAKAT?
Na aʼwaajakana Maleiwa, paaʼinwainjana sünain anoujaa (1 Corinto 1:10, 11).
Na anoujashii anakana noʼuluʼu Maleiwa, eeshii naya sainküin mmakat süpüshuaʼa otta paaʼinwajiraashii naya (1 Pedro 2:17, TNM).