¿Kasa shikirajaka tü Wiwüliakat?
¿Kasa wayuu tü Nuluwataayakat Maleiwa?
NAASHIN WANEEINNUA WAYUU, tü Nuluwataayakat Maleiwa shia wanee kasa suluʼukat waaʼin; eetaashii na anoujakana sünain shiain tü naaʼinrakat na wayuukana süpüla eeinjatüin jimataa aaʼin otta tü aleewaakat sainküin mmakat. ¿Jamajaʼa saaʼin pümüin tia?
TÜ SÜMAKAT TÜ WIWÜLIAKAT
«Niʼitaajeerü chi Maleiwa sirumatuʼujeʼewaikai wanee aluwataaya matüjüinka ajaʼttaa. [...] Sajaʼttireerü süpüshuaʼa tü aluwataayakalüirua otta shiainjatü eeka waneepia» (Daniel 2:44, TNM). Shiimainshaata eein tü Nuluwataayakat Maleiwa.
¿KASA MAA SÜKÜJAKA TÜ WIWÜLIAKAT?
Aluwataasü Nuluwataaya Maleiwa chaa sirumatuʼujee (Mateo 10:7; Lucas 10:9, TNM).
Niʼitaain Maleiwa tü Nuluwataayakat süpüla saainjünüin tü keeʼireekat naaʼin chaa iipünaa jee yaa Mmapaʼa (Mateo 6:10, TNM).
¿Joujeerü süntaka Nuluwataaya Maleiwa?
EESHII EEKAI NAMÜIN:
«Nnojotsü jaralüin atüjaain saaʼu tia»
«Alüʼütsü süpüla süntüin»
«Nnojoleerü antüin»
¿Jamajaʼa saaʼin pümüin?
TÜ SÜMAKAT TÜ WIWÜLIAKAT
«Aküjüneerü sümüin wayuu tü pütchi anasükat, tü süchikikat nukuaippa Maleiwa sünain aluwatawaa. Aküjüneerü sainküin mmakat süpüshua [...]. Je kettaapa shia, anteerü sükalia sajaʼlajaainjatkat oʼu tü kasakat süpüshua» (Mateo 24:14). Kettaapa süküjünüin tü pütchi anasükat, anteerü Nuluwataaya Maleiwa jee sajaʼttireerü süpüshuaʼa kasa mojusü.
¿KASA MAA SÜKÜJAKA TÜ WIWÜLIAKAT?
Nnojotsü jaralüin atüjaain saaʼu joujeerüin süntüin Nuluwataaya Maleiwa (Mateo 24:36).
Alüʼütsü süpüla süntüin Nuluwataaya Maleiwa süka shikeraajüin tü sümakat tü Wiwüliakat (Mateo 24:3, 7, 12).