Wanee asülajuushi kojutüsü

AAPÜNÜSÜ NÜMÜIN Jordan wanee sakapunta müsü aka saaʼin wanee anuachon, müsü mojutkai saaʼin. Aipejeʼe maʼin shia nüpüla süka nüsülajalain shia Russell nümüin jintüliiwaʼaya nia. Chia makai anülia aleewapuʼushi nia nümaa chi nutuushikai, nümaa chi nüshikai maʼayaka tü niikat. Ouktapa Rusell, niyaawata aaʼu Jordan aipuʼuin maʼin napüla na nüpüshikana chia wayuukai süka nükaaliinjüin naya wanaa sümaa sülatüin namüin kasa mojusü. Müsü nünüiki Jordan: «Süka taapüitpain süchiki tü kasa naainjakat kojutüleeitpa tamüin tü nüsülajakat tamüin».

Sünainjee tia nüküjakat wamüin Jordan, wayaawata aaʼu eein süpüla mojutüyaain namüin na wayuukana wanee kasa asülajünakat nümüin wanee wayuu, kojutüpejeʼe maʼin shia nümüin chi asülajünakai amüin shia. Aashajaana achikirü suluʼu tü Wiwüliakat wanee kasa nüsülajaka wamüin Maleiwa anaka maʼin. Shia tü münakat achiki mayaa: «Süka alin maʼin nüpüla Maleiwa na wayuukana, naapüin chi waneeshikai Nüchon süpüla nnojoliinjanain ouktüin na eʼitaakana naaʼin nünain otta süpüla katüinjatüin noʼu waneepia» (Juan 3:16, TNM).

Anakatche maʼin tia nüsülajakat Maleiwa, katüinjatka soʼu wayuu waneepia sutuma. Nnojorüleejaʼa eein wanee asülajuushi eekai müin aka saaʼin tia. Jaʼitairü mojutüin shia sümüin wayuu, kojutüshaatasü wamüin wayakana anoujashiikana (Salmo 49:8; 1 Pedro 1:18, 19). ¿Jamüshiche naapaka Maleiwa nikii chi Nüchonkai saaʼu wayuu süpüshuaʼa?

Müshi chi aluwataaushikai Pablo süchiki tia: «Tasoʼiree aaʼinchii jia sünain anain maʼi tü naapakat wamüin Cristo, je sünain mojuin maʼi tü naapakat wamüin Adán. Kaainjalashi Adán nuulia Maleiwa sükajee niyouktajaain sümaa nünüiki nümüin. Ouktakalaka nia saaliijee. Je sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktakalaka naya saaliijee» (Roma 5:12). Kaainjalashi Adán nuulia Maleiwa sümaa niʼrülin wayumüin nümüin, müshijeseʼe ouktüin nia mapa saaliijee tia. Nia kasitka Adán süpüla müinjatüin ouktüin wayuu süpüshuaʼa.

«Walaasü tü waainjalakat ouktapa waya. Aluʼusaʼa nünainjee chi Wasenyotsekai Jesuu naapüin Maleiwa wamüin kataa oʼuu» (Roma 6:23, TNM). Süpüla niyuʼlüinjatüin Maleiwa wayuu süpüshuaʼa suulia süchepchiaa kaainjalaa jee ouktaa, nuluwataain chi Nüchonkai yaa Mmapaʼamüin süpüla naapajiraain nikii saaʼu wayuu süpüshuaʼa. Naakajirüin waya Maleiwa sükajee tia, niasaʼa chi eʼitaakai naaʼin sünain naapajiraain nikii Jesuu, kateerü noʼu süpüla kaʼikat süpüshuaʼa (Roma 3:24).

Soʼu naashajaain Pablo süchiki tü kasa anasü naapakat Maleiwa namüin na aʼyataashiikana nümüin nükajee Jesukürisüto, müshi nia: «Eesü wayuu eekai saapüin kasa anasü. Otta Maleiwakai, alanaʼaleesia maʼi tü naapakat wamüin suulia kasakat süpüshua» (2 Corinto 9:15). Anashaatasü maʼin tü nüsülajakat Maleiwa wamüin, nnojotsü eein wanee kasa eekai müin aka saaʼin. Sünainjee süpüshuaʼa tü kasa nüsülajakat Maleiwa wamüin, ¿jamüsü shiaka anaʼleein maʼin naapüin chi Nüchonkai waaʼu?a ¿Kasa waaʼinrajatka sutuma naapüin Maleiwa chi Nüchonkai waaʼu? Aküjüneerü tia sünain tü piamasükat ekirajaaya süchikijeekat tüü.