¿Kasa paaʼinrajatka sutuma tü naapakat Maleiwa pümüin?

SÜSÜLAJÜNÜLE wamüin wanee kasa anashaataka maʼin, suchuntaain waaʼin waapüin tü analuʼutkat saaʼu, ¿aashimüin? Niiʼiyatüin Jesuu choʼujaain maʼin waapüinjatüin tü analuʼutkat waneepia. Jamüshijaʼa nia, niiyajüin polooshii wayuu kanainkana wanee ayuulii mepisat. Naʼakajee na polooshiikana wayuu, waneeshia neʼe chi aleʼejakai nünainmüin Jesuu sümaa «nuʼwaajüin chi Maleiwakai sünain emetuluin nünüiki». Nümaka Jesuu: «Mataashii polooshiikai naya sünain neiyajünüin. ¿Jalasü tü mekietsatsükalüirua nüpüshi?» (Lucas 17:12-17). ¿Kasa watüjaka sünainjee tia? Eesü süpüla motomaatüin waaʼin tü kasa anasü saaʼinrakat wayuu wapüleerua.

Nnojotsü eein wanee kasa antapünaaka sünain tü naapakat wamüin Maleiwa, naapüin chi Nüchonkai waaʼu. Shia wanee asülajuushi alanaʼaleeka sünain anain maʼin. ¿Kasaka paaʼinrüinjatüin süpüla paapüin analuʼut nümüin Maleiwa saaʼu tü naapakat pümüin?

• Piʼraaja chi asülajakai shia pümüin. Nnojotsü katüinjatüin soʼu wayuu uatuwoʼushi sutuma naapajiraain nikii Jesuu. Anuu nünüiki Jesuu sünain oʼuraajaa: «Kateerü noʼu waneepia chi wayuu ekirajaakai waneepia püchiki piakai chi Maleiwa shiimainshikai otta nüchiki Jesukürisüto, chi püjünalakai» (Juan 17:3, TNM). Süküjünüle pümüin nükaaliinjain pia wanee wayuu suulia ouktaa jintüliiwaʼaya paaʼin, ¿aashin keeʼireejeerüin paaʼin piʼraajüin nia otta pütüjaweein saaʼu jamüin nükaaliinjaka pia? Nia aakajitka waya Jeʼwaa, chi Maleiwakai süpüla katüinjatüin woʼu waneepia. Jee keeʼireesü naaʼin weʼraajüinjachin nia otta aleewain waya nümaa. Müsüjeseʼe sümüin tü Wiwüliakat: «Jürütkaale nünainmüin Maleiwa, arütkaajeechi nia jünainmüin» (Santiago 4:8).

• 

  Piʼitaa paaʼin sünain naapajiraain nikii Jesuu. «Chi eekai niʼitaain naaʼin nünain chi Nüchonkai Maleiwa, kateerü noʼu waneepia» (Juan 3:36, TNM). ¿Kasa sünainpünaaka piʼitaain paaʼin sünain naapajiraain nikii Jesuu? Sünainpünaasü tü kasa paaʼinrakat (Santiago 2:17). Jamüsüjaʼa süsülajünüle pümüin wanee kasa, piyurulüin pütüna süpüla paapaain shia. Akaʼaya neʼe paapaainjatüle tü nüsülajakat Maleiwa pümüin, eesü tü paaʼinrajatkat. Pikirajaainjatü anain tü keeʼireekat naaʼin Maleiwa püpüleerua otta paaʼinrüinjatü shia.a Puʼuraajaa nümüin Maleiwa, puchunta nümüin motoiwa naaʼin paainjala otta wulein paaʼin nuʼupala. Pürütkaa nünainmüin otta piʼitaa paaʼin sünain jimateerüin paaʼin, nnojoleechin pia mmoluin otta aneerüin pukuwaʼipa soʼu palit kaʼi saaʼu naapajiraain nikii Jesuu (Hebreokana 11:1).

• 

  Puʼuna sünain Tü Outkajawaakat eere Sotuin Waaʼin Ouktüin Jesuu. Süpüla sotuinjatüin waaʼin waneepia naapajiraain nikii Jesuu waaʼu, nüikkaleʼerüin sukuwaʼipa wanee outkajawaa waainjaka juyawai. Anuu nünüiki Jesuu: «Tü waaʼinrakat jooluʼu, süpülajatü jaaʼinrüin waneepia süpüla sotüinjachin jaaʼin taya» (Lucas 22:19). Wayakana aküjüliikana pütchi nüchiki Jeʼwaa, waainjeerü outkajawaakat tia Aaʼuriiroʼu 11 soʼu 2017, süchikijee nikerotüin chi Kaʼikai. Sünain tia outkajawaakat, aküjüneerü kasapülajachin ouktaka Jesuu otta jamüin aneetka wakuwaʼipa maaʼulu jee watta kaʼi sutuma ouktüin nia. Eesü maʼaka wanee oora sümaʼa tia outkajawaakat. Juyakat tiainka, outkajaashii wamaa maʼaka 20 miyoone wayuu sainküin mmakat süpüshuaʼa. Wounejaain pia sünain tia outkajawaakat süpüla paapüin analuʼut nümüin Maleiwa saaʼu tü kasa anashaatasü maʼin naapakat wamüin.