PÜTCHI SÜNAINKA SÜTA TÜ REWIISÜTAKAT | ¿JAMÜSÜ SÜNÜIKI TÜ WIWÜLIAKAT NACHIKI NA AAPIEEKANA?
¿Kasa naaʼinraka na aapieekana wapüleerua?
Jülüjasü wayuu naaʼin na aapiee anamiakana otta aʼyataashii maʼin naya sünain aaʼinraa tü keeʼireekat naaʼin Jeʼwaa. Nukumajaiwaʼaya Maleiwa tü Mmakat, «talatüshii maʼin otta aʼwaatüshii sümaa naʼwatüin najapü napüshuaʼa na nüchonniikana» (Job 38:4, 7, TNM). Natüjawee aaʼu na aapieekana tü nümakat Maleiwa süchiki tü alatajatkat mapeena yaa Mmapaʼa (1 Pedro 1:11, 12).
Saashin tü Wiwüliakat, eeshii naaʼinmajünüle na aʼyataakana nümüin Maleiwa natuma na aapieekana, naaʼinrüin tia süpüla shikeraajüin tü keeʼireekat naaʼin Maleiwa (Salmo 34:7). Anuu süpüshi tü naaʼinrakat na aapieekana:
Najaʼlajeʼerüinjatpa Maleiwa tü pueulokot Sodoma otta Gomorra, ojuʼitinnüshi Lot chejee sümaa nüpüshi natuma wanee aapieeirua (Génesis 19:1, 15-26).
Soʼu nojutunüin saʼaka siki na apünüinshiikana jimaʼalii hebreo chaa Babilonia, nüjütüin Maleiwa wane aapiee süpüla nükaaliinjain naya (Daniel 3:19-28).
Ojutunüshi Daniel suluʼu wanee ishi saʼaka wasashi otta nnojoishi jamajüin nia sutuma süka nüjütüin Maleiwa wanee aapiee süpüla nüsürülüin saanükü tü wasashikalüirua (Daniel 6:16, 22).
Akaaliinjünüshii natuma na aapieekana na wayuu jüüjüükana nümüin Maleiwa.
AKAALIINJÜNÜSHII NA NIKIRAJÜINKANA JESUU NATUMA NA AAPIEEKANA
Süpüla shikeraajüin tü keeʼireekat naaʼin Jeʼwaa, kojuyatua nakaaliinjünüin na nikirajüinkana Jesuu natuma na aapieekana. Anuu süpüshi tü naaʼinrakat:
Eeshi wanee aapiee ojutatkai tü kaatsetkat napüleerua na aluwataaushiikana otta nüküjain namüin ayatüinjanain naküjain pütchi suluʼu tü aʼwaajüleekat Maleiwa (Aluwataaushikana 5:17-21).
Aluwataanüshi Felipe nutuma wanee aapiee suluʼu süpüna Jerusalén chawatkat sünainmüin tü pueulokot Gaza süpüla nüküjain Nünüiki Maleiwa nümüin wanee wayuu chejeʼewai Etiopía (Aluwataaushikana 8:26-33).
Eeʼiyataashi wanee aapiee nümüin Cornelio, wanee sülaüla surulaat romaano süpüla nüsaajirüin chi aluwataaushikai Pedro süka anashiin nümüin Maleiwa nanoujainjanain na wayuu nnojoliikana judíoin (Aluwataaushikana 10:3-5).
Wanaa sümaa nüpüreesajinnüin Pedro, eeʼiyataashi wanee aapiee nümüin otta niyuʼluin nia suluʼujee tü kaatsetkat (Aluwataaushikana 12:1-11).
TÜ NAAʼINRAKAT NA AAPIEEKANA WAPÜLEERUA
Nnojotsü atüjaanüin aaʼu nükaaliinjale wayuu Maleiwa nakajee na aapieekana maaʼutpünaa maʼaka naaʼinrüin shia sümaiwa. Müshi Jesuu süchiki tü alatajatkat maaʼulu: «Aküjüneerü sümüin wayuu tü pütchi anasükat, tü süchikikat nukuaippa Maleiwa sünain aluwatawaa. Aküjüneerü sainküin mmakat süpüshua süpüla saapünüinjatüin sütüma wayuu süpüshua. Je kettaapa shia, anteerü sükalia sajaʼlajaainjatkat oʼu tü kasakat süpüshua» (Mateo 24:14). ¿Pütüja aaʼu nayain na aapieekana jülüjain aaʼin tia aʼyatawaakat?
Akaaliinjashii na aapieekana süpüla süküjünüin tü pütchi anasükat sainküin Mmakat süpüshuaʼa.
Saashin karaloʼutaka Alateetkat Mapeena, naya aʼyataakana maʼin na aapieekana sünain akaaliinjaa wayuu sainküin Mmakat süpüshuaʼa süpüla natüjain tü shiimainkat nüchiki Jeʼwaa jee süchiki tü naaʼinrajatkat süpüleerua wayuu. Müshi chi aluwataaushikai Juan: «Teʼrakalaka wane aapiee waawatüin iipünaa sirumatuʼupünaa. Eʼitaaushi nia süpüla aküjaa sümüin wayuu nünüiki chi Maleiwakai, tü pütchi shiimüinkat süpüla kaʼikat süpüshua. Nüküjainjatü shia sümüin eʼirukuukat süpüshua sainküin mmakat süpüshua. Nümakalaka sünain emetuluin maʼi nünüiki: ‹Anakaja kojutule jütüma chi Maleiwakai sümaa juʼwaajüin nia, süka sülüʼülüin nükalia sünain süsalainjatüin saainjala wayuu nütüma. Anakaja müleka jüsapainyoʼukale jia nümülatuʼu sünain jiiʼiyatüin nümüin nujut, süka niain kakumalain kasakat süpüshua chaʼaya iipünaa, je süka niain kakumalain tü mmakat je tü palaakat ooʼulaka tü suʼwüirakalüirua wüin›» (Alateetkat Mapeena 14:6, 7). Watüjaa aaʼu nakaaliinjain na aapieekana süpüla süküjünüin Nünüiki Maleiwa sümüin wayuu. Akaʼaya naya, talatüshii müleka eere wanee wayuu kaainjarai eekai nuuʼulaain suulia naainjala sümaa niʼyataain nümüin Jeʼwaa nüchikuaʼa (Lucas 15:10).
¿Kaseerü alataka kettaapa tü aküjaakat Nünüiki Maleiwa sümüin wayuu? Na aapieekana otta müshia Jesuu, anteena süpüla tü atkawaa kanüliakat Armagedón, soʼu tü kasalajaneetkalü oʼu saainjala wayuu nutuma Maleiwa (Alateetkat Mapeena 16:14-16; 19:14-16). Süsaleerü wayuu nutuma Maleiwa nakajee na aapiee pülashiikana maʼin «soʼu tü kaʼi niiʼiyataainjachikat oʼu chi Wasenyotsekai Jesucristo [...] saaʼu nnojoliin kapülain naaʼin nüchiki chi Oʼtteʼerüikai chi Wasenyotsekai Jesucristo» (2 Tesalónica 1:7, 8).
Shiimain jülüjain pia naaʼin na aapieekana otta neʼreein anain nakuwaʼipa na aʼyataweekana nümüin Maleiwa. Wekirajaaitpa anain kojuyatuain nuluwataain Jeʼwaa na aapieekana süpüla nütütüleʼerüin naaʼin na aʼyataakana nümüin otta süpüla naaʼinmajüin naya (Hebreokana 1:14).
Waya atüjaaka saaʼu kacheʼeinjanale waya sümüin tü pütchi anasü aküjünakat sainküin Mmakat süpüshuaʼa. Nekirajeein pia na aküjaliikana pütchi nüchiki Jeʼwaa sünain tü Wiwüliakat süpüla anainjatüin pukuwaʼipa saaʼu nakaaliinjain waya na aapieekana.