Washata nakuwaʼipa na aapiee nümaʼanajeejanakana Maleiwa

1, 2. (1) ¿Kasa naataka aluʼu wakuwaʼipa noulia na aapiee nümaʼanajeejanakana Maleiwa? (2) ¿Kasa wanaawaka aluʼu wakuwaʼipa namaa na aapiee nümaʼanajeejanakana Maleiwa?

WANAA SÜMAA nürütkeʼerüin pia Jehová nünainmüin nüntirüin pia naʼakamüin na nüpüshi aʼwaajakana nia. Na nüpüshikana Maleiwa aijiraashii naya jee naatawaisü nakuwaʼipa. Eeshii naʼaka wawalayuu kepiaka sainküin mma otta müshiʼiya na aapiee wattakana naalii (Dan. 7:9, 10). Wanaa sümaa waapüin nachiki na aapieekana jülüjasü waaʼin naatain nakuwaʼipa woulia. Jamüshiijaʼa nayakana akumajünatüjülia naya nnojoluiwaʼaya sukumajünüin wayuu (Job 38:4, 7). Pülashii naya woulia, wulesü nakuwaʼipa otta lotusü nakuwaʼipa woulia wayakana wayuukana kaleʼeruʼukana süchiki kaainjalaa (Luc. 9:26).

² Mayaainjeʼe naatain nakuwaʼipa woulia na aapieekana eesiaʼaya tü kasa wanaawakalü aluʼu wakuwaʼipa namaa. Eesü süpüla washatüin nukuwaʼipa Jehová otta waneeküin süka waaʼin wamüiwaʼa tü waaʼinrajatkat maʼaka naaʼin na aapieekana. Kanüliashii waya maʼaka kanüliain nayakana, naatawaisü nakuwaʼipa maʼaka naatawalin wakuwaʼipa otta naatawaisü tü aʼyatawaa waaʼinrakat maʼaka naatawalin tü aʼyatawaa naaʼinrakat. Maʼaka naaʼin nayakana waʼwaajüin chi Kakumalakai waya (1 Ped. 1:12).

3. ¿Kasa wekirajaainjatka anain nachiki na aapieekana?

³ Saaʼujee eein tü kasa wanaawakalü aluʼu wakuwaʼipa namaa na aapieekana wainma tü kasa watüjakat nanainjee süpüla wachecherüin waaʼin. Jamüshiijaʼa nayakana nnojotsü yaletüin naaʼin, aisü wayuu napüla, atüjashii achecheraa naaʼin otta nakaalinjain na anoujashiikana süpüla wulein nakuwaʼipa. Shia wekirajaainjatka anain tia sünain ekirajaayakat tüü.

NNOJOTSÜ YALETÜIN NAAʼIN NA AAPIEEKANA

4. (1) ¿Kasa wayaawataka atuma nnojoluin yaletüin naaʼin na aapieekana? (2) ¿Jamüsü nnojotkaʼa yaletüin naaʼin na aapieekana? (Salmo 89:7).

⁴ Atüjashii maʼin na aapiee nümaʼanajeejanakana Maleiwa, pülashii naya otta kekiishii naya. Mayaainjeʼe müin nakuwaʼipa jüüjüüshii naya sümaa nünüiki Jehová süka nnojoluin yaletüin naaʼin (Sal. 103:20). Wanaa sümaa naaʼinrüin tü nuluwataakalü anain naya Jehová, nnojoishii aʼwaataain suluʼu nakuwaʼipa. Nnojotsü naaʼinrüin wanee kasa pülasü shiiʼiree naʼwaajünüin. Mayaainjeʼe nnojoluin shiʼraajünüin nanülia, talatüshii naya sünain aaʼinraa tü nüchekakat Maleiwa (Gén. 32:24, 29; 2 Rey. 19:35).a Nayouta achikit naʼwaajünüin süka natüjaain saaʼu niainjachin Jehová aʼwaajünüin nümüiwaʼa. ¿Jamüsü nnojotkaʼa yaletüin naaʼin na aapieekana? Shia süka alin Jehová napüla otta kojutuin nia namüin (paashajeʼera Salmo 89:7).

5. ¿Kasa wayaawataka akajee nnojoluin yaletüin naaʼin wanee aapiee wanaa sümaa nüchiaain chi aluwataaushikai Juan? (Piirakaa sümüin tü ayaakuaakat).

⁵ Wekirajaa süchiki wanee kasa ashajünaka suluʼu tü Bibliakat wayaawataka akajee nnojoluin yaletüin naaʼin na aapieekana. Soʼutpünaa juyakat 96 niiʼiyatüin wanee aapiee wanee kasa pülasü nümüin chi aluwataaushikai Juan. Nnojotsü watüjaain saaʼu kasaichin nünülia chia aapieekai (Apoc. 1:1). Niʼrapa Juan tü niiʼiyatakat chi aapieekai nümüin nüsapainkashi nümülatuʼu sümaa nuʼwaajüin nia. Nüchiaakalaka nia chi aapieekai sümaa nümüin nümüin: «¡Jalian! Nnojo müin pia. Achepchieʼeraa neʼe taya wanaa pümaa maʼaka naaʼin na puwalayuukana [...]. Anashi niale puʼwaajüin Maleiwa» (Apoc. 19:10). Anashaatasü maʼin nünüiki chia aapieekai nümüin Juan, niyouta achiki nuʼwaajünüin. Nüküjamaatüin nümüin Juan niainjachin nuʼwaajüin Jehová. Mayaainjeʼe kakaliaichin niʼyataain nümüin Jehová otta pülashin nia, kojutushi Juan nümüin. «Achepchieʼeraa neʼe taya wanaa pümaa», müshi nia sümaa nnojoluin yaletüin naaʼin. Nnojotsü airuʼuluin nünüiki chia aapieekai wanaa sümaa nüchiaain Juan, kamaneeshi nia nümüin. Laülaaichi Juan wanaa sümaa tia. Eesüjaʼa niyaawatüle saaʼu chi aapieekai nüsapainkain Juan nümülatuʼu süka ponuin maʼin naaʼin tü kasa niʼrakat.

6. ¿Kasa waaʼinrajatka süpüla nnojoluin yaletüin waaʼin maʼaka nnojoluin yaletüin naaʼin na aapieekana?

⁶ ¿Kasa waaʼinrajatka süpüla nnojoluin yaletüin waaʼin maʼaka nnojoluin yaletüin naaʼin na aapieekana? Aʼyataweeshii waya nümüin Jehová süka süpüshuaʼa waaʼin maʼaka naaʼinrüin shia na aapieekana. Nnojoliinjana aʼwaataain waya suluʼu wakuwaʼipa saaʼujee tü kasa waaʼinrakat otta saaʼujee watüjain maʼin (1 Cor. 4:7). Nnojoluinjatü jülüjain waaʼin anaʼleein wakuwaʼipa noulia na waneinnua saaʼujee kakaliainnain waʼyataain nümüin Jehová otta saaʼujee saapünüin wamüin waneirua aʼyatawaa. Tü aʼyatawaa aapünakat wamüin suluʼu tü outkajaaleekat süpülajatü waʼyataain napüleerua na wawalayuukana (Luc. 9:48). Süka washateein nakuwaʼipa na aapieekana eejüinjatü waaʼin suulia waaʼinrüin wanee kasa jülüjeetka atuma naaʼin na waneinnua alanaʼaleein waya noulia.

7. ¿Kasa ayaawatüneetka akajee nnojoluin yaletüin waaʼin wachiaapa na waneinnua?

⁷ Wachiaainjachire wanee wawala jee nayale na wachonniikana, anasü waaʼinrüle tia sümaa nnojoluin yaletüin waaʼin. Eesüjaʼa choʼujaʼawaire lotuin wanüiki wachiaapa wanee wawala, washateein nukuwaʼipa chi aapiee achiaakai Juan, naaʼinrüin tia sümaa kamaneein nia. Eesü süpüla lotuin wanüiki nümüin wanee wawala sümaa nnojoluin airuʼuluin wanüiki nümüin. Nnojorüle jülüjain waaʼin anaʼleein wakuwaʼipa noulia na waneinnua, wachiajaajeena naya wanaapünaa sümaa tü sümakat tü Bibliakat. Kamaneeinjana waya waaʼinrapa tia süpüla nayaawatüin saaʼu kojutuin naya wamüin (Col. 4:6).

AISÜ WAYUU NAPÜLA NA AAPIEEKANA

8. (1) Saashin Lucas 15:10, ¿kasa naaʼinraka na aapieekana süka alin napüla na wayuukana? (2) ¿Kasa naaʼinraka na aapieekana süpüla nakaalinjain waya waküjapa pütchi? (Piirakaa sümüin tü ayaakuaa sünainkat süta tü rewiisütakat).

⁸ Kachipünaasü naaʼin na aapieekana tü alatakat namüin na wayuukana, aishii naya napüla. Talatüshii naya neʼrapa niyaawajaain wanee wawala suulia naainjala jee anajiraain nia nüchikuaʼa nümaa Jehová. Talatüshiʼiya naya neʼrapa nikirajaain wanee wayuu sünain tü Bibliakat sümaa nunouteʼerüin nukuwaʼipa süpüla niʼyataainjachin nümüin Jehová (paashajeʼera Lucas 15:10). Nakaalinjain waya na aapieekana sünain aküjaa pütchi (Apoc. 14:6). Mayaainjeʼe nnojoluin nayain aashajaain namaa na wayuukana nüchiki Jehová noʼunirüin wakuwaʼipa nanainmüin na wayuu ekirajaweekana nüchiki Jehová. Nnojotpejeʼe watüjaain saaʼu joujain nakaalinjain waya na aapieekana, jama wainmain sukuwaʼipa nükaalinjaka akajee waya Jehová. Eeshiijaʼa nükaalinjale Jehová na wayuu ekirajaweekana nüchiki sükajee tü nüpülainkat jee shiale nuʼunirüin wakuwaʼipa nanainmüin (Aluw. 16:6, 7). Watüjaa aaʼulu wainmatuain nükaalinjain waya Jehová nakajee na aapieekana waküjapa pütchi, eemaateena naya sünain akaalinjaa waya (paashajeʼera tü pütchikat «Asoutamaatüshi Maleiwa namüin»).b

9. ¿Kasa waaʼinrajatka süpüla alin wapüla na wayuukana maʼaka naaʼin na aapieekana?

⁹ ¿Kasa waaʼinrajatka süpüla alin wapüla na wayuukana maʼaka naaʼin na aapieekana? Talatüshii waya namaa na aapieekana süküjünapa suluʼu tü Piichi Outkajaaleekat Nüküjalitchipain pütchi nüchikuaʼa wanee wawala, kamaneeshii waya nümüin otta jaʼyasü waaʼu alin nia wapüla (Luc. 15:4-7; 2 Cor. 2:6-8). Wane kasa waaʼinrajatka süpüla alin wapüla na wayuukana maʼaka naaʼinrüin shia na aapieekana shia waaʼinmaale tü aküjaakat pütchi (Ecl. 11:6). Wakaalinja na wawalayuukana sünain aküjaa pütchi maʼaka nakaalinjain waya na aapieekana. Anashii wojuʼitüle nümaa wanee wawala jekechikai sünain aküjaa pütchi, nümaa wanee wawala laülaa jee niale wanee eekai ayuulin.

10. ¿Kasa watüjaka sünainjee sukuwaʼipa Sara?

¹⁰ ¿Jama isale wachiki waküjain maʼin pütchi mayaainjeʼe waaʼinreein maʼin shia? Eesü süpüla wachajaain sukuwaʼipa süpüla waʼyanaajiraain namaa na aapieekana sünain aküjaa pütchi. Jülüjataa waaʼin sukuwaʼipa wanee wawala, Sara sünülia,c chejeʼewat India. Pürekutsootsü shia soʼu 20 juya. Ayuuijaaka shia otta juletüsü waneepia saaʼu cama, mojusü maʼin saaʼin sutuma müin sukuwaʼipa. Akatsüinraapejeʼe saaʼin sutuma nakaalinjain shia na wawalayuukana otta sutuma shikirajaain waneepia sünain tü Bibliakat. Suuʼulakaka waneirua sukuwaʼipa süküjia pütchi. Nnojotsü aküjain pütchi shia süka carta süka isain süchiki joyotuin shia, aküjasü shia pütchi suluʼupünaa teleepono. Shiyamaajaka joo na wayuu shikirajapuʼukana. Naya wayuukana naküjawalin sümüin eein waneinnua wayuu ekirajaweekana sünain tü Bibliakat. Maʼaka jeʼra kashi süchikijee tia eeshii 70 wayuu shikirajaka Sara sünain tü Bibliakat. Süka wattain naalii na wayuu shikirajakana, suchuntuin namüin waneinnua wawalayuu süpüla nekirajüin noʼutku. Wainma na outkajaakana naʼakajee na shikirajakana. Talatakajasaʼa naaʼin na aapieekana süka naʼyataajiraain namaa na wawalayuu aʼyataakana süka süpüshuaʼa naaʼin sünain aküjaa pütchi maʼaka saaʼinrüin Sara.

NACHECHERÜIN NAAʼIN NA AAPIEEKANA

11. ¿Jamüsü anakaʼa nakuwaʼipa na aapieekana wapüleerua?

¹¹ Anasü nakuwaʼipa wapüleerua na aapiee nümaʼanajeejanakana Maleiwa süka nachecherüin naaʼin. Kakaliairü neʼrüin tü kasa mojusü aainjünakat sümüin wayuu otta müsia tü mojulawaakat. Neʼrüin wanaa sümaa niʼrüijaain wayumüin Satanás nümüin Jehová namaʼaleeya watta naalii aapiee aʼyataapuʼukana nümüin Maleiwa (Gén. 3:1; 6:1, 2; Jud. 6). Ashajünüsü suluʼu tü Bibliakat nüchiki wanee aapiee eejiraakai nümaa wanee yolujaa pülashi (Dan. 10:13). Soʼujee nükalia Adán sünainmüinreʼeya wakalioʼu neʼrüin na aapieekana palitchoin na wayuu aneekakana naʼyataain nümüin Jehová. Mayaainjeʼe neʼrüin süpüshuaʼa tia ayatüshii waneepiain naya nümaa Jehová otta aʼyataashii naya nümüin sümaa talatüin naaʼin. Nnojotsü shapaain naaʼin süka natüjaain saaʼu sülüʼülüin tü kaʼi najaʼttirüinjatkalü oʼu Maleiwa tü kasa mojusü aainjünakat yaa mmapaʼa.

12. ¿Kasa wachechereetka akajee waaʼin?

¹² ¿Kasa waaʼinrajatka süpüla wachecherüin waaʼin maʼaka naaʼin na aapieekana? Eesüjaʼa weʼrüle saainjünüin kasa mojusü jee müliale waya atumawaa. Watüjaapejeʼe saaʼu maʼaka natüjaain saaʼu na aapieekana sülüʼülüin tü kaʼi najaʼttirüinjatkalü oʼu Maleiwa tü mojulawaakat. «Shiakalaka anain aluʼu ayatüleʼeya waaʼinrüin kasa anasü» maʼaka naaʼinrüin shia na aapieekana (Gal. 6:9). Nüküjain Jehová wamüin nükaalinjeenain waya süpüla wachecherüin waaʼin (1 Cor. 10:13). Wachunta nümüin Jehová naapaiwa wamüin tü nüpülainkat süpüla wachecherüin waaʼin otta süpüla talatüin waaʼin (Gal. 5:22; Col. 1:11). ¿Kasa paaʼinrajatka müliale pia atumawaa? Piʼitaa paaʼin nünain Jehová otta nnojo mmoluin paaʼin saaʼu tü aainjüneetkat pümüin. Eejeechi Jehová waneepia pümaa otta nükatchinreerü paaʼin (Heb. 13:6).

NAKAALINJAIN WAYA SÜPÜLA WULEIN WAKUWAʼIPA

13. ¿Kasa aʼyatawaa naaʼinraka na aapieekana sümaʼainruʼu sülüʼülüin sükalia süpüla sajaʼttüinjatüin kasa mojusü? (Mateo 13:47-49).

¹³ Sümaʼainruʼu sülüʼülüin sükalia süpüla sajaʼttinnajatüin kasa mojusü, nuluwataain Jehová na aapieekana sünain aaʼinraa wanee aʼyatawaa (paashajeʼera Mateo 13:47-49). Sükajee waküjain pütchi watta naalii na wayuu ekirajaakana wamaa. Naʼakajee nayakana eeshii na aneekakana naʼyataain nümüin Jehová. Na aapieekana nakatalüin na wayuu lotokana akuwaʼipa noulia na mojulaashiikana. Sükajee tü naaʼinrakat naaʼinmajüin na anoujashiikana süpüla wulein nakuwaʼipa. Nnojotsü maluʼuluin tia müichia maleʼejüin nüchikuaʼa wanee wawala nuuʼulaale suulia anoujaa otta nnojoleenain mojujiraain na wawalayuukana. Watüjaapejeʼe saaʼu naʼyataain maʼin na aapieekana süpüla wuleinjatüin nakuwaʼipa na anoujashiikana.

14, 15. ¿Kasa waaʼinrajatka süpüla wakaalinjain na wawalayuukana süpüla wulein nakuwaʼipa maʼaka naaʼinrüin shia na aapieekana? (Piirakaa sümüin tü ayaakuaakat).

¹⁴ ¿Kasa waaʼinrajatka süpüla wakaalinjain na wawalayuukana süpüla wulein nakuwaʼipa maʼaka naaʼinrüin shia na aapieekana? Keisalainjana waya sümüin wakuwaʼipa otta anainjatü wanoula. Wachajaainjatü sukuwaʼipa süpüla aleewain maʼin waya nümaa Jehová. Waaʼinrüin tia wanaa sümaa waʼaleewajaain namaa na wayuu aikana apüla Jehová otta wayoutule waaʼinrüin tü kasa amojujeʼereetkat wakuwaʼipa nümaa. Waaʼinrüle tia wakaalinjeena na wawalayuukana süpüla wulein nakuwaʼipa (Sal. 101:3). Eeshii süpüla wakaalinjain na wawalayuukana süpüla waneepiain naya nümaa Jehová. ¿Kasa waaʼinrajatka watüjaale saaʼu kaainjalain wanee wawala? Saaʼujee alin nia wapüla wemeejeerü naaʼin süpüla nüküjain süchiki tia namüin na laülaashiikana. Nnojorüle naaʼinrüin shia, wayainjana aküjaka süchiki tia namüin na laülaashiikana. Waaʼinrüin tia süpüla nakaalinjain chi wawala nnojoikai anain anoula (Sant. 5:14, 15).

¹⁵ Eeshii anoujashii ojuʼitinnakana naʼakajee na wawalayuukana saaʼujee nnojoluin nayaawajaain suulia naainjala. Ooʼulaashii waya suulia aashajawaa namaa na makana akuwaʼipa (1 Cor. 5:9-13).d Aainjünüsü tia süpüla wuleinjatüin nakuwaʼipa na wawalayuukana. Otta wane kasa anasü eeka sünainjee tia shia eein süpüla niyaawajaain suulia naainjala chi kaainjalashikai. Müle nukuwaʼipa, talateena waya wanaa nümaa Jehová otta na aapieekana (Luc. 15:7).

16. ¿Kasa paaʼinrajatka süpüla püshatüin nakuwaʼipa na aapieekana?

¹⁶ Anataʼaleesüjaʼa wakuwaʼipa nutuma Jehová süka eein süpüla watüjaain saaʼu tü naaʼinrakat na aapieekana otta süka eein süpüla waʼyataajiraain namaa. Wachajaa maʼin sukuwaʼipa süpüla washatüin nakuwaʼipa na aapieekana, ai wapüla na wayuukana, wachechera waaʼin, wakaalinja na wawalayuukana süpüla wulein nakuwaʼipa otta süpüla anain nanoula. Washatüle nakuwaʼipa na aapiee nümaʼanajeejanakana Maleiwa naʼakeena waya waneepia na wayuu aʼwaajakana nia.