3 Süpüla eejiraain pia sümaa tü alatakat pümüin
Wainma kasa mojusü alatalaʼa maka sümüin wayuu otta eesü tü nnojoleetkalü anoutaain. Jamüshijaʼa outuichire wanee püpüshi jee pünainre wanee ayuulii ekaa mepin, püchajaweerü tü analeetkalü atuma paaʼin. ¿Eeshiiche süpüla sükaaliinjain waya tü Nünüikikat Maleiwa sülatüle tia wamüin?
AYUULII EEKA MEPIN
Anuu sünüiki Rosa: «Tanainsü wanee ayuulii nanainjeejatka na tapüshikana otta aiwaisü shia tamüin waneepia, isaitpa tachiki aaʼinraa wainma kasa». Wanee kasa shapaaka atuma saaʼin Rosa shia sutuma kapüleein maʼin sümüin ekirajawaa sünain tü Wiwüliakat. Isasü süchiki jülüjainjatüin saaʼin otta süsakireʼerüin saaʼin sünain tü shikirajaakalü anain. Sütütüleʼerapajaʼa saaʼin Rosa tü nümakat Jesuu suluʼu Mateo 19:26: «Tü kasa isakat süchiki wayuu, nnojotsü kapüleein nümüin Maleiwa». Shiyaawata aaʼu Rosa wainmain sukuwaʼipa tü ekirajawaakat. Süka isapuʼuin süchiki shikirajaain sünain tü Wiwüliakat jee tü karaloʼutairua ayuʼluushikat sünainjee, saapajüin shia.a Saashin Rosa, amalajaasüje sunoula nnojorüle saapajüin tü pütchi suluʼujeejatkat tü Wiwüliakat.
Mojuwaisü maʼin saaʼin Rosa sutuma isain süchiki aaʼinraa tü saaʼinrapuʼukat süpülapünaa ayuulin shia, amülialaapejeʼe saaʼin sutuma tü sümakat 2 Corinto 8:12: «Müleka keeʼireere jaaʼin jüsülajeein, talateechi chi Maleiwakai jümaa, nümaa eekai washirüin müleka naapüle kojuya, je nümaa eekai müliain jaʼitashi aapüin palit». Sutuma pütchikat tüü, shiyaawata aaʼu Rosa talatüin naaʼin Maleiwa sümaa tü saaʼinrakat mayaapejeʼe wainmain kasa isaka süchiki.
TÜ MOJUUKALÜ AAʼIN
Anuu sünüiki Diana tü wayuu waküjayütpakalü achiki suluʼu tü palajatkat ekirajaaya: «Wanaa sümaa outuin tü tachonkat, 18 suuyase. Sutuma mojushaatain taaʼin süchiirua, müsü isainjatiaakai tachiki tü takuwaʼipakat, müsü outeekai neʼe taaʼin». Sütütüleʼerüin saaʼin Diana tü sümakat Salmo 94:19 eere nümüin chi salmistakai nümüin Maleiwa: «Wanaa sümaa shapaain maʼin taaʼin, pümülialüin taya». Anuu sünüiki Diana: «Tachuntuin nümüin Jeʼwaa nükaaliinjaiwa taya süpüla taaʼinrajatüin wanee kasa analeetka atuma taaʼin».
Akaaliinjatsü wayuu Diana mapa, anasü maʼin saaʼin sutuma saaʼinrüin tia. Saashin Diana, müsü shia maʼaka saaʼin tü crayola nepintajakalü aka na tepichikana, jaʼitairü yülüin wanee crayola, ayatüsü anain süpüla epintajaa. Mayaapejeʼe müin shia maʼaka saaʼin tü crayola yütsükat saashin, eesü süpüla sükaaliinjain na waneinnua. «Mapa, tayaawata aaʼu tayain neʼe nütütüleʼerüin aaʼin Jeʼwaa süka tü Wiwüliakat wanaa sümaa tatütüleʼerüin naaʼin na wayuu tekirajakana», müsü Diana. Süshajüin sünain wanee karaloʼuta nanülia waneinnua wayuu shapaakana maʼin aaʼin saashin tü Wiwüliakat. ¿Kasa sütüjaka nanainjee? Anuu sünüiki: «Oʼuraajawaishii naya waneepia nümüin Jeʼwaa [...]. Choʼujaasü paashajeʼerüin tü Wiwüliakat süpüla pütüjaain saaʼu jamüin nünüiki Maleiwa süchiki tü alatakat pümüin».
Shikirajüin shia tü Wiwüliakat sünain jülüjainjatüin saaʼin tü kasa anasü saʼatapajakat suulia tü alatakat sümüin. Atütülaasü maʼin saaʼin sutuma tü sümakat Aluwataaushikana 24:15: «Maʼaka kaʼatapalain naya sünain susoʼiraajeerüin aaʼin tü ouktüsükalüirua; türa eekai saainjüin paala tü anasükat maʼaka türa eekai saainjüin paala tü mojusükat». ¿Sunoujainche Diana nüsoʼireʼerüinjatüin Jeʼwaa saaʼin tü süchonkat? Anuu sünüiki: «Tatüjaa aaʼulu sünain teʼreerüin süchikuaʼa tü tachonkat. Kettaaitpa sükalia tia nutuma chi Tashi chakai iipünaa, nüshajüin sünain nükaraloʼutse tü kaʼi tantiraainjatkalü oʼu sümaa tachon. Jülüjasü taaʼin sünain warai wamüin suluʼu tü wapaatiasekat sünain teʼrajaain maʼin shia maʼaka saaʼin soʼu tü kaʼi jemeikalü oʼu shia».
a Wainma pütchi eeka süpüla saapajünüin suluʼu jw.org.
Sümülialüin waaʼin tü Wiwüliakat suʼunnaa tü kasa mojusü alatakat wamüin