Sukutkujaale mma otta süsetüle wüin

Anuu tü nümakat Andrew, wanee wayuu chejeʼewai Sierra Leona: «Mojusü maʼin waaʼin weʼrapa sajaʼttaleein tü kasa eejatkat wamaʼana sutuma süsetüin tü wüinkat jee süsaapünaain sümaa».

Müshi David, wanee wayuu chejeʼewai islas Vírgenes: «Eetaayaai kasain eein wapüla waleʼejapa wepialuʼumüin süchikijee tü wawaikat. Moʼooshii neʼe waya. Süsapainkasü tü tachonkat sünain aʼyalajaa».

¿ALATÜITCHE pümüin tia? Sülatüirüle pümüin tia, piyaawata aaʼulujaʼa tü alatakat namüin na wayuu alatakana süchikumüin tia, maʼaka saaʼin shapaain naaʼin, müin jalapaʼakai naaʼin sutuma, nnojoluin süntapünaain suluʼumüin nekii müin nakuwaʼipa otta moʼooin naya naʼlapüinruʼu. Watta naalii na wayuu maʼlainkana aaʼin sutuma tü kasa alatakat namüin jee yüülasü naaʼin sünainjee.

Sajaʼttaleʼere tü kasa eejatkat pümaʼana sutuma sukutkujaain mma jee süsetüin wüin, eesüjaʼa yüülale paaʼin sünainjee. Eesüjaʼa müin nnojoluitpakai kasain anain apüla pukuwaʼipa. Süküjapejeʼe tü Wiwüliakat eein süpüla anain waaʼin wamaajiraa otta süküjain süchiki aneerüin wakuwaʼipa.

EʼREENA WAYA ANAA SAASHIN TÜ WIWÜLIAKAT

Müsü Eclesiastés 7:8 süchiki tia: «Anaʼleesia wanee kasa kettaapa shia suulialeʼeya suʼttaiwaʼaya». Sajaʼttüirüle tü kasa eejatkat pümaʼana sutuma wawai jee sutuma süsetüin wüin eesüjaʼa yüülale paaʼin sutuma otta eesüjaʼa pümüle: «kasakainjatka joo shia tatuma, amülouipa shia». Nnojo püshapajaain aaʼin, piʼyataa süchiirua, anoutaweerü sukuwaʼipa tü alatakat pümüin.

Saashin tü Wiwüliakat, eejeerü wanee kaʼi «nnojoleetka [oʼu] aapünüin shiiʼira wayuu jee shiiʼira eekai müliain maʼin saaʼin» (Isaías 65:19). Meerü sukuwaʼipa tia paʼaraiisüpa tü Mmakat nutuma Maleiwa (Salmo 37:11, 29). Nnojoleerü wawai, nnojoleerü asetüin wüin. Nnojoleerü sotuin waaʼin tü kasa mojusü alatakat wamüin. Anuu tü nümakat chi Maleiwa pülashikai maʼin: «Nnojoleerü sotuin jaaʼin tü kasa alatüitpakat» (Isaías 65:17).

Jülüja paaʼin tü kasa anasü naaʼinrakat Maleiwa püpüleerua süpüla piʼrüinjatüin anaa otta süpüla jimatüinjatüin paaʼin nuluwataapa Maleiwa saaʼu tü Mmakat (Jeremías 29:11). Aneerü paaʼin sutuma pütüjaain saaʼu tia. Anuu tü sümakat Sally, tü wayuu waküjayütkalü achiki sünain tü palajatkat pütchi: «Jülüjale waaʼin tü kasa anasü eejeetkat Nuluwataapa Maleiwa saaʼu tü Mmakat, shia wanee kasa akaalinjaka waya süpüla nnojoluin mojuin maʼin waaʼin sutuma tü alatakat wamüin. Otta sükaalinjain waya süpüla eejiraain waya sümaa tü alatakat wamüin maaʼulu».

Eesü süpüla paashajeʼerüin sooʼomüin süchiki tia süpüla pütüjaain saaʼu kasain amaa naaʼinreerüin Maleiwa püpüleerua. Wainma pütchi eeka suluʼu tü Wiwüliakat akaalinjeechika pia süpüla piyaawatüin saaʼu eein süpüla talatüin paaʼin maaʼulu mayaainjeʼe sülatüin kasa mojusü pümüin. Paashajeʼera sooʼomüin süchiki tü naaʼinrajatkat Maleiwa.

Pütchi suluʼujeejatka tü Wiwüliakat akaalinjeechika pia

Peemeraa

«Shia anaka neemeraale wanee wayuu suulia niʼyataain maʼin, nnojoleerü kasain niʼrüin sünainjee, meechi nuwataakai aaʼin süchiirua joutai» (Eclesiastés 4:6).

Naashin waneinnua tottoolü, mojusü maʼin naaʼin na wayuu alatakana amüin wanee kasa wattaka atuma naaʼin jee nnojoleerü pansaain tü jülüjakat naaʼin nnojorüle natunküin. Müshiijeseʼe neemeraainjanain.

Püküja süchiki tü alatakat pümüin

«Mojusü maʼin naaʼin wanee wayuu shapaale naaʼin, talateetpejeʼe naaʼin anale pütchi nümüin» (Proverbios 12:25, Dios habla hoy).

Paashajaa nümaa wanee püpüshi jee niale wanee paʼaleewain süchiki tü alatakat pümüin. Naapajeerü pünüiki, natütüleʼereerü paaʼin otta eesü süpüla naküjain pümüin tü anakat süpüla paaʼinrüin.a

Jülüja paaʼin tü kasa anasü eejeetkat mapeena

«Eeinjatü wanee sirumatuʼu jeketü jee müsia wanee mma jeketü waʼatapajaka maʼin saaʼujee tü nümatüjütkalia Maleiwa wamüin. Otta müsia aainjüneerü tü kasa anasükat waneepia» (2 Pedro 3:13, TNM).

a Müleka shapaale maʼin naaʼin wanee wayuu waneepia, shia anaka aluʼu nünaʼrüle nia wanee tottoot.