Nünaajaale wanee püpüshi

Anuu tü sümakat Vanessa, wanee wayuu chejeʼewat Australia: «Mamaʼajaasai chi tawalakai, kasakataayai tatuma tia. Mayaainjeʼe sülatüin jeʼra kashi süchikijee nünaajaain, ayatsia taya aʼyalajüin nüchiirua. Maaʼatsü sütkünakai taaʼin süka rüi. Eesü jashichire maʼin taya sünainjee amüloulin nia otta müsü tayakai kasirüin tü alatakat nümüin saaʼujee nnojoluin talatirüin kaʼi nümaa».

NÜNAAJAAICHIRE wanee püpüshi, eesüjaʼa mojule maʼin paaʼin nüchiirua, pümüiwaʼain paaʼin otta eesü üttüle paaʼin sünainjee nnojoluin kasakain putuma tü alatakat nümüin. Eesü müle piakai aaʼin kasirüin tü alatakat nümüin, mmoluwaale paaʼin otta eesü pümüle: «¿Aawalaajeetche taaʼin?».

Nnojotsü malaain piʼyalajüle nüchiirua chi püpüshi anaajaakai. Aʼyalajüsü pia nüchiirua süka alin nia püpüla. ¿Aawalaajeetche paaʼin mapeena?

TÜ NAAʼINRAKAT WANEINNUA WAYUU

Mayaainjeʼe nnojoleerüin anamaatüin paaʼin, jalouijeerü pümüin pütchikat tüü:

NNOJOTSÜ MOJUIN PIʼYALAJÜLE

Naatayaa müsü sukuwaʼipa wayuu nünaajaale wanee süpüshi. Eeshii na kakaliakana sünain mojuu aaʼin. Analeetpejeʼe paaʼin piʼyalajüle. Müsü Vanessa, tü wayuu waküjaitpakalü achiki: «Aʼyalajüsü taya waneepia süpüla analüin taaʼin». Anuu tü sümakat Sofía, wanee wayuu mamaʼajaaka awala. Müsü shia: «Aisü maʼin tamüin sotule taaʼin tü alatakat sümüin tü tawalakat. Müsü aka saaʼin kajüle sülioʼu wanee wayuu jee suʼlojunüle süpüla shiiyajünüin. Aishaatasü maʼin tia, eiyajünüinjatpejeʼe shia süpüla süshatüin tü sülioʼukat».

PÜKÜJA SÜCHIKI JAMÜIN PAAʼIN

Sümüiwaʼaweesü wanee wayuu süka mojuin maʼin saaʼin nünaajaale wanee süpüshi. Kapüleepejeʼe maʼin tia, müsü aka saaʼin püpataweere wanee kasa eekai jawatüin maʼin. Iseerü püchiki pümüiwaʼa. Anuu tü nümakat Jared, wanee jimaʼai 17 nuuyase, anaajaashi chi nüshikai. Müshi nia: «Eesüjaʼa nnojorüle pansaain tü tamakat soʼu mojuin maʼin taaʼin, anapejeʼe taaʼin sutuma yootuin taya namaa na waneinnua». Anuu tü sümakat Janice, tü wayuu waküjaitpakalü achiki sünain tü palajatkat pütchi. Aashajaasü shia süchiki tü kasa anasü shiʼrakat sünainjee süküjain jamüin saaʼin. Müsü shia: «Anasü taaʼin sutuma yootuin taya süchiki tü suluʼukat taaʼin. Anasü taaʼin süka nnojoluin tamüiwaʼain taya».

NNOJO PIYOUTUIN SÜCHIKI AKAALINJÜNAA

Anuu sünüiki wanee tottoot: «Sücheküle wanee wayuu süchiki akaalinjünaa natuma na süpüshikana namaa na saʼaleewainyuukana, alateerü shia süchikumüin tü alatakat sümüin». Püküja namüin na paʼaleewainyuukana kasain naaʼinrajatüin süpüla nakaalinjain pia. Eesü namüliajeere paaʼin, shiajaʼa neʼe nnojoluin natüjaain saaʼu kasain naaʼinrajatüin süpüla anain paaʼin (Proverbios 17:17).

PÜRÜTKAA NÜNAINMÜIN MALEIWA

Anuu tü sümakat Tina: «Mamaʼajaasai chi taʼwayuusekai sutuma cáncer. Nnojolitchipa chi taküjapuʼukai amüin tü alatakat tamüin. Niaichipa Maleiwa taküjaka amüin tü suluʼukat taaʼin. Achuntawaisü taya wattaʼa maalü nümüin Maleiwa süpüla nükatsüinrüin taaʼin, süka kapüleein maʼin tamüin eejiraain taya sümaa tü alatakat tamüin. Nükaalinjain maʼin taya Maleiwa». 22 suuyase Tarsha soʼu sünaajaain tü shiikat, müsü shia: «Nnojotsü mojuin maʼin taaʼin sutuma taashajeʼerüin weinshi tü Wiwüliakat. Anasü tü jülüjakat taaʼin sutuma tü sümakat».

SOTO PAAʼIN SUSOʼIRAAJEERÜIN NAAʼIN NA OUTUSHIIKANA

Anuu sooʼomüin sünüiki Tina: «Nnojotpuʼusü analüin taaʼin sutuma tatüjaain saaʼu süsoʼiraainjatüin naaʼin na outushiikana. Choʼujaashi tamüin chi taʼwayuusekai jee choʼujaashi nia namüin na nüchooinkana. Alatüirü pienchi juya süchikijee nünaajaain chi taʼwayuusekai. Shiapejeʼe achecherüin taaʼin tatüjaain saaʼu süsoʼiraajeerüin naaʼin na outushiikana. Anasü taaʼin otta talatüsü taya sutuma jülüjain taaʼin teʼreechin nia nüchikuaʼa».

Eesü nnojoleerüle anamaatüin paaʼin, amülialaajeetpejeʼe paaʼin sutuma tü sümakat Vanessa. Müsü shia: «Eesü iseerüle püchiki saaʼin pümüin, eepejeʼe kaʼi anakalü oʼu paaʼin».

Mayaainjeʼe nnojoluin anamaateerüin paaʼin, shia anaka aluʼu nnojorüle yüülain paaʼin. Nükaalinjeerü pia Maleiwa süpüla anain paaʼin namaa paʼaleewainyuu otta aneerü pukuwaʼipa mapeena. Soʼu palit kaʼi, nüsoʼireʼereena aaʼin Maleiwa na outushiikana. Nücheküin Maleiwa piʼrüinjanain nachikuaʼa na püpüshi anaajaakana otta nnojorüleeinjatüin mojuin paaʼin.

Pütchi suluʼujeejatka tü Wiwüliakat akaalinjeechika pia

Nütüjaa aaʼu Maleiwa piʼyalajüle otta mojule paaʼin

Anuu nünüiki wanee wayuu nümüin Maleiwa: «Piʼitaa taʼwüira suluʼu tü paaʼata akumajuushikat süpüla wiino. Ashajuushisü tia suluʼu pükaraloʼutse» (Salmo 56:8).

Püküja tü suluʼukat paaʼin nümüin Maleiwa

«Taküjain nümüin [Maleiwa] süchiki tü kasa shapaakalü atuma taaʼin [...]. Achuntushi taya kaalinwaa pümüin Jeʼwaa»a (Salmo 142:2, 5).

Eʼreechi pia anaa

«[Asoʼiraajeerü] saaʼin tü wayuu ouktüsükalüirua» (Aluwataaushikana 24:15).

Naashin Maleiwa, watteena naalii na wayuu asoʼiraainjanakana aaʼin nutuma, naaʼinreein maʼin tiab (Job 14:14, 15).

a Jeʼwaa nünülia Maleiwa saashin tü Wiwüliakat.

b Pütüjeerü sooʼomüin süchiki süsoʼiraainjatüin naaʼin na outushiikana, paashajeʼera tü karaloʼutakat Anainjatka atuma pukuwaʼipa waneepia, ekirajaaya 30. Nakumajala na aküjaliikana pütchi nüchiki Jeʼwaa. Eesü shiaʼaya suluʼu www.jw.org.