Kawalaʼatale wanee wayuu atumawaa

Anuu sünüiki María, wanee wayuu chejeʼewat España. Müsü shia: «Mojushaatasü maʼin taaʼin wanaa sümaa nüküjain tamüin chi taʼwayuusekai nüpütajatüin taya süpüleerua wanee wayuu jintütkat toulia. Nnojotsü anain tü naaʼinrakat tamüin, watta saalii kasa taaʼinraka nüpüleerua süpüla müinjatüin taya nutuma».

Anuu nünüiki Bill, wanee wayuu chejeʼewai España: «Eeʼirataʼala müsü tü taʼwayuusekat toulia. Aishaatasü maʼin tia tamüin. Nnojoluitpa süpüla waaʼinrüin tü waaʼinreekalü amüin, tü ‹meerü watuma› wamakat paala. Eesü kaʼi anaka oʼu taaʼin, shiasaʼa süchikijee tia mojulaʼa müsü taaʼin».

MOJUSÜ maʼin saaʼin wayuu kawalaʼatale shia atumawaa. Eepejeʼe na wayuu anajiraakana nachikuaʼa otta nanoutuin nakuwaʼipa.a Jaʼitaina anajiraain naya nachikuaʼa ayateeria mojuin naaʼin na wayuu eeʼirataanakana oulia. ¿Kasa naaʼinrajatka süpüla nnojoluin yüülain naaʼin?

PÜTCHI SULUʼUJEEJATKA TÜ WIWÜLIAKAT AKAALINJEECHIKA PIA

Mayaainjeʼe mojuin maʼin naaʼin na wayuu kawalaʼatakana atumawaa, eeshii na amülialaakana aaʼin sutuma tü sümakat tü Wiwüliakat. Naashajeʼerapa tü Wiwüliakat natüjaa aaʼu niyaawatüin Maleiwa saaʼu tü alatakat namüin otta niʼrüin naʼyalajüle saalinjee tia (Malaquías 2:13-16).

«Wanaa sümaa wattain maʼin saalin tü kasa shapaakalü atuma taaʼin, anasü taaʼin sutuma pümülialüin taaʼin» (Salmo 94:19).

Anuu nünüiki Bill: «Taashajeʼerapa tia wetsiikulokot, jülüjasü taaʼin nümülialüin taaʼin Jeʼwaa maʼaka naaʼinrüin shia wanee wayuu ayaawatakai saaʼu tü alatakat nümüin wanee nüchon».

«Waneepiale wanee wayuu pümaa, waneepieechi pia nümaʼayaa» (Salmo 18:25).

Anuu tü sümakat Carmen, wanee wayuu kakaliaka kawalaʼatain nutuma suʼwayuuse: «Nüpütüin taya chi taʼwayuusekai, tatüjaapejeʼe saaʼu nnojoleerüin taya nüpütüin Jeʼwaa. Waneepieechi nia tamaa».

«Nnojo jüshapataain aaʼin sooʼopünaa wane kasa. Shia jaaʼinra achuntaa nümüin Maleiwa sooʼopünaa kasa süpüshua. Jüküja nümüin tü shapaakat atüma jaaʼin [...]. Müleka masütaajule jia sünain achuntaa nümüin Maleiwa, aapüneerü wane anaa jümüin nütüma. Isasü wachiki wayaawatüin saaʼu tia anaa naapakat wamüin, saaʼu wayuuin neʼe waya» (Filipos 4:6, 7).

Anuu sünüiki Sasha: «Taashajeʼerawalin tia pütchikat. Tatüjaaka saaʼu naapüin tamüin Maleiwa wanee anaa sutuma toʼuraajüin nümüin».

Na wayuu waküjainnapakana achiki, eesüjaʼa naapüle naaʼin sünain yüülaa. Anapejeʼe naaʼin sutuma naashajeʼerüin tü Wiwüliakat otta sutuma neʼitaain naaʼin nünain Jeʼwaa. Anuu nünüiki Bill süchiki tia: «Nnojotsü yüülain taaʼin mayaainjeʼe mojuin maʼin tü alatakat tamüin. Anasü taaʼin sutuma anain tanoula. Akaisaʼa tamaiwa, müshi waraitakai taaʼin suluʼupünaa wanee wopu kojoka aluʼu piyuushi, eepejeʼe Maleiwa tamaa» (Salmo 23:4).

a Pütüjeere sooʼomüin süchiki tü naaʼinrakat na wayuu anajiraakana nachikuaʼa süchikijee neʼirataanüin oulia, paashajeʼera tü kojuyasükat pütchi «Cuando el cónyuge es infiel». Suluʼusü ¡Eeja Waaʼin! ojuʼitaka aaʼuriiroʼu 22 soʼu 1999, alijunaikiruʼu, süpana 3-5, süpana 5-9 otta süpana 9-12.

Tü naaʼinrakat waneinnua wayuu

Püsakira suluʼu paaʼin süchiki tü sümakat tü Wiwüliakat

Anuu tü nümakat Bill: «Taashajeʼerüin tü karaloʼutakat Job jee süchikijee, taashajeʼerüin Salmos. Tejeettawalin tü pütchi sünainpünaakat takuwaʼipa. Tayaawata aaʼu eein waneinnua wayuu saashajaakana achiki tü Wiwüliakat alatakana amüin tü alatakat tamüin jee shapaakana aaʼin maʼaka taaʼin tayakai».

Jimateerü paaʼin paapajüle muusika

Anuu sünüiki Carmen: «Aapajawaisü taya muusika nnojorüle tatunkeein aaʼin saʼwai. Anasü taaʼin sutuma». Anuu nünüiki Daniel: «Ekirajaashi taya süpüla tatüjain aʼyalajiraa kitaara. Otta jimatüsü taaʼin sutuma tü shiiʼirakat».

Püküja süchiki jamüin paaʼin

Anuu nünüiki Daniel: «Mamalainsat tamüin yootoo süchiki tü alatakat tamüin. Anapejeʼe na taʼaleewainkana, müshijeseʼe tachajaain sukuwaʼipa süpüla kottüin taya namaa. Anasü taaʼin yootule taya namaa otta tashajüle namüin». Anuu sünüiki Sasha: «Anasü maʼin taaʼin sutuma nakaalinjain taya na tapüshikana. Sükaalinjain taya waneepia tü teikat. Jülüjasü saaʼin tü tamakat sümüin. Jee nnojotsü nüpüleeruain taaʼin chi tashikai süpüla anamaatüinjatüin taaʼin».

Puʼuraaja waneepia

Anuu sünüiki Carmen: «Sutuma toʼuraajüin waneepia, müshi yalakai naaʼin Maleiwa sünain aapajaa tanüiki jee sünain akaalinjaa taya. Arütkaasü maʼin taya nünainmüin Maleiwa soʼunnaa tü alatakat tamüin».