Aijiraainjana waya otta lotuinjatü sukuwaʼipa tü waaʼinrakat saainjünüle kasa mojusü (Apünüinka ekirajaaya sünainjee pienchisü ekirajaaya)

1-3. (1) Saashin Salmo 5:4-6, ¿jamüsü nünüiki Jeʼwaa süchiki tü kasa mojusükat? (2) ¿Jamüsü nnojotka pansaain tü ataüjawaakat tepichi sümaa «tü nüchekakat Cristo»?

NIYOUTASHAATAIN Jeʼwaa tü kasa mojusükat (paashajeʼera Salmo 5:4-6). Müsüjeseʼe alin nümüin nataüjaanüle na tepichikana süka shiain wanee kasa mojuka otta kashüülaka maʼin. Wayakana aʼyataashiikana nümüin Jeʼwaa, wayoutashaatain tia maʼaka niyoutuin shia. Nnojotsü wacheküin saainjünüin tia namüin na tepichi outkajaakana wamaa (Roma 12:9; Heb. 12:15, 16).

² Soto waaʼin, «tü nüchekakat Cristo» sünainpünaasü süpüshuaʼa tü nikirajakalü anain Jesuu otta tü naaʼinrakat. Tü ataüjawaakat tepichi nnojotsü pansaain sümaa tia (Gal. 6:2). ¿Jamüsü nnojotka pansaain shia sümaa? Shia süka alin wayuu nüpüla Maleiwa otta nücheküin lotuin sukuwaʼipa wanee kasa. Sükajee woonooin sümaa «tü nüchekakat Cristo» aishii wapüla na tepichikana otta waaʼinmajüin naya. Mojupejeʼe maʼin tü aaʼinnakat nütaüjaanüle wanee jintüi. Na aaʼinrakana tia, shia neʼe kapülaka naaʼin nakuwaʼipa namüiwaʼa otta nnojotsü jülüjain naaʼin jameerüin naaʼin chi jintüikai.

³ Watta maʼin naalii na tepichi ataüjaanakana sainküin mmakat, jaʼitakajeʼe naʼaka na anoujashiikana alatüirü tia. ¿Jamüsüche makaʼa tia? Shia süka wattain maʼin naalii na wayuu mojulaashiikana, eeshii nekeroteere naʼaka na anoujashiikana noʼutku naya wayuukana (2 Tim. 3:13). Eeshii waneinnua wayuu anoujayaakana, naaʼinrüin tü suchuntaakat naaʼin jee nataüjaain na tepichikana. Wekirajaweerü anain jamüin mojushaataka maʼin tü ataüjawaakat tepichi. Jee süchikijee tia, wekirajaweerü anain kasain naaʼinrajatüin na laülaashiikana nütaüjaale tepichi wanee anoujashi otta kasain naaʼinrajatüin na kachonshiikana süpüla naaʼinmajüin nachonnii.b

MOJUSHAATASÜ MAʼIN ATAÜJAWAA TEPICHI

4, 5. ¿Jamüsü mojushaataka nataüjaanüle na tepichikana?

⁴ Nnojotsü motomaatüin naaʼin na ataüjaanüshiikana tü aaʼinnakat namüin otta wainma kasa mojusü neʼraka sünainjee. Nnojoishii nayain neʼe müliain sutuma tia, müliashii na napüshikana jee na wawalayuukana. Mojukalaka maʼin nataüjaanüle na tepichikana.

⁵ Mojushaatasü tia namüin na ataüjaanüshiikana. Kaainjalashi wanee wayuu naainjale kasa müliaka atuma saaʼin wayuu. Shiaʼaya naaʼinraka tia wanee wayuu ataüjaakai tepichi, mojushaatasü naaʼin na tepichikana nutuma jee nnojotsü motomaatüin naaʼin tia, shieerü wekirajaaka anain tia sünain tü wanee ekirajaayakat. Mmotshii na tepichikana otta nnojotsü anain naaʼin. Makalaka waaʼinmajüinjanain naya suulia sülatüin tia namüin, jama mojushaatain shia. Wamüliajüinjatü naaʼin jee wakaalinjainjana na alatakana amüin tia (1 Tes. 5:14, TNM).

6, 7. (1) ¿Jamüsü mojushaataka namüin na anoujashiikana nütaüjaale tepichi wanee anoujashi? (2) ¿Jamüsü mojushaataka namüin na sülaülashiikana mma nütaüjaale tepichi wanee wayuu?

⁶ Mojushaatasü tia namüin na anoujashiikana. Mojusü maʼin pütchi nachiki na anoujashiikana nutuma wanee anoujashi jee shialee nutuma wanee wayuu outkajaakai wamaa, nütaüjaale wanee jintüi jee shiale wanee jintut (Mat. 5:16; 1 Ped. 2:12). Nnojotpejeʼe anain mojule pütchi nachiki napüshuaʼa na anoujashiikana sutuma naainjala waneeshia neʼe wayuu, waneepiashii nümaa Maleiwa naya wawalayuukana süpüla nnojoluinjatüin sümalajaain nanoula (Jud. 3). Nnojoishi waʼakeein wanee wayuu aainjakai kasa kashüülasü sümaa nnojoluin niyaawajaain suulia jee mojusü pütchi nachiki na anoujashiikana nutuma.

⁷ Mojushaatasü tia namüin na sülaülashiikana mma. Jüüjüüinjana na anoujashiikana namüin «na sülaülashiikana mma» (Roma 13:1). Waaʼinrüin tia wanaa sümaa kojutuin wamüin tü naluwataakalü anain. Eere wanee wayuu outkajaakai wamaa aaʼinrakai wanee kasa mojusü napülajaka na sülaülashiikana mma, kaainjalashi nia noulia, maʼaka saaʼin nütaüjaale wanee jintüi jee shiale wanee jintut (paashajeʼera Aluwataaushikana 25:8). Nnojoishii nayain na laülaashiikana jülüjain aaʼin müleka saainjünüinjatüle tü namakat na sülaülashiikana mma, nnojoliipejeʼe naya asoutuin naaʼu wanee wayuu eekai nütaüjaain tepichi (Roma 13:3, 4). Kachajaalashi chi kaainjalashikai sünainjee tü naaʼinrakat (Gal. 6:7, TNM).

8. ¿Jamüsü nünüiki Jeʼwaa süchiki saainjünüin kasa mojusü nümüin wanee wayuu?

⁸ Shialeekajaʼa nümüin Jeʼwaa, mojushaatasü tia. (Sal. 51:4). Kaainjarale wanee wayuu nümüin wanee, kaainjalashi niaʼaya nümüin Jeʼwaa. Joʼu weʼrai wanee sukuwaʼipa sükajee tü Pütchi aapünakat namüin na israeliitakana. Saashin tia pütchikat, wanee wayuu eekai nuʼluwajüin jee nimeejüin na waneinnua, kaainjalashi nuulia Jeʼwaa (Lev. 6:2-4). Nütaüjaale tepichi wanee anoujashi, kaainjalashi nuulia Jeʼwaa jee mojusü pütchi nüchiki nutuma otta nnojotsü anain naaʼin na tepichikana nutuma. Müsüjeseʼe kashüülain maʼin nümüin Jeʼwaa tü naaʼinrakat chi eekai nütaüjaain wanee jintüi jee shiale wanee jintut, müsia shia wamüin.

9. (1) ¿Kasa tü kakaliaitkat süküjain nupueulose Jeʼwaa? (2) ¿Jamüsü saainjünaka tia?

⁹ Kakaliairü süküjain nupueulose Jeʼwaa sükajee Aapiria Wayuu otta ¡Eeja Waaʼin! tü naaʼinrajatkat na wayuu ataüjaanakana süpüla nnojoluin mojuin maʼin naaʼin, tü naaʼinrajatkat na waneinnua süpüla nakaalinjain naya jee namülialüin naaʼin otta ashajünüsü kasain naaʼinrajatüin na kachonshiikana süpüla naaʼinmajüin nachonnii. Jaʼitakajaʼa na laülaashiikana, aküjünüsü namüin tü naaʼinrajatkat müleka nütaüjaale tepichi wanee anoujashi. Akaʼaya tü nupueulosekat Jeʼwaa sünaʼlawalin tü naaʼinrüinjatkat na laülaashiikana. Aainjünüsü tia süpüla pansaain shia sümaa tü nüchekakat Kürisüto.

TÜ NAAʼINRAJATKAT NA LAÜLAASHIIKANA KAAINJARALE WANEE ANOUJASHI

10-12. (1) ¿Kasa sotoka naaʼin na laülaashiikana kaainjarale wanee anoujashi? (2) ¿Kasa jülüjaka naaʼin na laülaashiikana kaainjarale wanee anoujashi? (3) ¿Kasa naaʼinraka na laülaashiikana saashin Santiago 5:14, 15?

¹⁰ Kaainjarale wanee anoujashi, sotusü naaʼin na laülaashiikana shiain naaʼinrajatüin tü nüchekakat Kürisüto, alinjanain napüla na anoujashiikana otta lotuinjatüin sukuwaʼipa tü kasa naaʼinrakat. Sünainjee tia eesü waneirua kasa jülüjaka naaʼin. Shiapejeʼe jülüjainjatüin naaʼin kojutuinjachin Maleiwa atumawaa (Lev. 22:31, 32; Mat. 6:9, TNM). Otta müshiʼiya naya, kapülasü naaʼin anainjatüin nanoula na anoujashiikana jee nakaalinjainjachin chi wawala aainjünakai amüin kasa mojusü.

¹¹ Wayuule anoujashi chi ataüjaakai tepichi, nachajaainjatü akuwaʼipa na laülaashiikana süpüla nanoutuin nukuwaʼipa nümaa Jeʼwaa (paashajeʼera Santiago 5:14, 15). Nnojotsü anain nunoula chi anoujashi kaainjalakai jee aaʼinrakai tü suchuntaakat naaʼin, müshi aka naaʼin wanee wayuu eekai ayuulin. Amojujaasü nukuwaʼipa nümaa Jeʼwaa.c Na laülaashiikana, nanouteein nukuwaʼipa maʼaka naaʼin wanee tottoot aawaleʼerakai wayuu ayuuisü. Nachiaain nia sükajee tü Wiwüliakat, eekalaka süpüla aleewain nia nümaa Jeʼwaa nüchikuaʼa. Shiimainjatpejeʼe niyaawajaain suulia naainjala (Aluw. 3:19; 2 Cor. 2:5-10).

¹² Nnojotsü ashaitaain tia naaʼinrakat na laülaashiikana. Jülüjashii naaʼin na anoujashii niʼitaakana Jeʼwaa najapuluʼu (1 Ped. 5:1-3, TNM). Shia anashiika namüin anainjatüin naaʼin na wawalayuukana. Müshiijeseʼe nanoutamaatüin sukuwaʼipa wanee kasa kaainjarale wanee anoujashi, maʼaka saaʼin nütaüjaale tepichi. ¿Kasa naaʼinraka na laülaashiikana sülatüle tia? Wasouta shiʼipajee tia sükajee tü asakinnakalü anain suluʼu tü pütchikat 13, 15 otta 17.

13, 14. ¿Naküjainjatche na laülaashiikana sümüin tü pulusiiakat nütaüjaanüle wanee jintüi jee shiale wanee jintut? Püküja jamüin naaʼinrajatka tia.

¹³ ¿Naküjainjatche na laülaashiikana sümüin tü pulusiiakat nütaüjaanüle wanee jintüi jee shiale wanee jintut? Aa, naküjainjatü. Suchuntunüle tia natuma na sülaülashiikana mma, naaʼinrüin shia na laülaashiikana (Roma 13:1). Nnojotsü mojuin nümüin Maleiwa tia nachuntakat na sülaülashiikana mma (Aluw. 5:28, 29). Sutuma tia, naapüle na laülaashiikana süchiki nütaüjaanüin wanee jintüi jee shiale wanee jintut nutuma wanee anoujashi, achuntamaatüshii naya kaalinwaa sümüin Weteet. Müsü shia natuma süpüla natüjaain saaʼu tü naaʼinrajatkat, jama noonooinjanain sümaa tü nachuntakat na sülaülashiikana mma.

¹⁴ Naküjain na laülaashiikana namüin na ataüjaanakana, nümüin nashi, sümüin nei jee namüin waneinnua wayuu atüjaakana saaʼu tü alatakat, eein süpüla naküjain süchiki tia sümüin tü pulusiiakat. ¿Jama niale wanee anoujashi chi achuntunakai saaʼu nütaüjaain tepichi jee nütüjaanüle aaʼu sutuma wayuu? Nüküjale wanee anoujashi sümüin pulusiia süchiki tü alatakat, ¿jülüjainjatche naaʼin mojeerüin pütchi nüchiki Jeʼwaa nutuma? Nnojo. Mojusü pütchi nüchiki Jeʼwaa nutuma chi ataüjaakai tepichi.

15, 16. (1) Sünainjee tü sümakat 1 Timoteo 5:19, ¿jamüshii choʼujaaka piamashiinjanain na wayuu aküjakana süchiki kaainjalain wanee anoujashi? (2) ¿Kasa naaʼinraka na laülaashiikana müleka süküjünüle achiki nütaüjaain tepichi wanee anoujashi?

¹⁵ Süpüla noutkajaain apünüinshii laülaashii nümaa chi kaainjalashikai, ¿jamüsü choʼujaaka piamashiinjanain na wayuu atüjaakana saaʼu kaainjalain nia? Shia sukuwaʼipainjatka tia saashin tü Wiwüliakat. Tia shia süpüshi tü kasa lotuinjatkalü akuwaʼipa naashin Jeʼwaa. Nnojorüle nüküjain wanee anoujashi süchiki tü naainjalakat, choʼujaashii piamashiinjanain na wayuu aküjakana süchiki tia süpüla noutkajaain apünüinshii laülaashii nümaa (Deut. 19:15; Mat. 18:16; paashajeʼera 1 Timoteo 5:19). Süpüla süküjünüin sümüin pulusiia nüchiki wanee anoujashi ataüjaakai tepichi, ¿choʼujaashiiche piamashiinjanain na wayuu atüjaakana saaʼu tia? Nnojo, nnojotsü choʼujaain tia müleka nayainjanale aküjain na laülaashiikana jee niale wane wayuu nüchiki chi ataüjaashikai.

¹⁶ Eesü piamasü kasa naainjaka na laülaashiikana müleka süküjünüle nüchiki wanee anoujashi ataüjaakai tepichi. Tü palajatkat shia nachajaain sukuwaʼipa süpüla süküjünüin tia sümüin tü pulusiiakat. Otta süchikijee asakitshii naya süchiki jamakuwaʼipalin tia alatakat, naaʼinrüin tia wanaapünaa sümaa tü sümakat tü Wiwüliakat, suluʼujee tia nayaawata aaʼu choʼujaale noutkajaain apünüinshii laülaashii nümaa chi kaainjalashikai. Naattajaale chi kaainjalashikai süchiki tü achuntunakalü anain nia, naya asakinnaka na wayuu atüjaakana saaʼu tü naainjalakat. Outkajaashii apünüinshii laülaashii nümaa chi kaainjalashikai müleka eere piamashii wayuu aküjakana nüchiki, eeinjachi chi aküjakai nüchiki palajana otta chi apansaajakai müleka shiimainre tia otta kojuyashiire na tepichi makana nutuma.d Nnojotsü joo maluʼuluin alawaain neʼe tü nüküjakat wanee wayuu nüchiki chi ataüjaashikai müleka nnojoire wane apansaajakai tia. Jaʼitashi waneeshin neʼe chi aküjakai süchiki nütaüjaain tepichi wanee anoujashi, nayaawatüinjatü aaʼu na laülaashiikana müleka kaainjarale chi aküjünakai achiki otta mojushaatain naaʼin na waneinnua nutuma. Müshiijeseʼe nakaalinjain na laülaashiikana na müliakana atumawaa otta eejüsü naaʼin süpüla naaʼinmajüin na anoujashiikana suulia jamajüin naya nutuma chi aliʼrajünakai sünain nütaüjaain tepichi (Aluw. 20:28).

17, 18. ¿Kasapülajatü noutkajaaka apünüinshii laülaashii nümaa chi kaainjalashikai?

¹⁷ ¿Kasapülajatü noutkajaaka apünüinshii laülaashii nümaa chi kaainjalashikai? Süpülajatü natüjaain saaʼu müleka eere süpüla ayatüin naʼakain na anoujashiikana chi kaainjalashikai. Nnojoishii nayain aküjain süsalainjachin nia naainjala natuma na sülaülashiikana mma. Nnojoishii asoutuin na laülaashiikana naaʼu chi kaainjalashikai, nooʼulaain tia najapuluʼu na sülaülashiikana mma (Roma 13:2-4; Tito 3:1).

¹⁸ Outkajaashii apünüinshii laülaashii nümaa chi kaainjalashikai süpüla sunoutaain nukuwaʼipa nümaa Maleiwa jee namaa na nuwalayuukana. Nayaawata aaʼu sükajee tü Wiwüliakat müleka niyaawajaale suulia naainjala. Nnojoire niyaawajaain suulia, ojuʼitinnüshi nia naʼakajee na anoujashiikana jee aküjünüsü sünain tü outkajawaakat nnojolitchipain nia aküjalin pütchi nüchiki Jeʼwaa (1 Cor. 5:11-13). Shiimainrejeʼe niyaawajaain suulia naainjala, ayateechi nia naʼaka na anoujashiikana. Naküjapejeʼe na laülaashiikana nümüin eejeerüin tü kasa nnojotkat süpüla naaʼinrüin otta nnojoluin süpüla laülaashin nia jee niʼyataain neʼipajee. Otta shiiʼiree aneein na tepichikana, eeinjatü tü kasa naaʼinrakat na laülaashiikana süpüla naaʼinmajüin naya. Wanee kasa naaʼinraka shia naküjain namüin na kachonshiikana naaʼinmajüinjanain nachonnii nuulia chi kaainjalashikai. Naaʼinrapa tia, nnojotsü choʼujaain naküjain nanülia na eʼnnakana amüin nutuma.

NAAʼINRAJATKA NA KACHONSHIIKANA SÜPÜLA NAAʼINMAJÜIN NACHONNII

19-22. ¿Kasa naaʼinrajatka na kachonshiikana süpüla naaʼinmajüin nachonnii? (Piirakaa sümüin tü ayaakuaa sünainkat süta tü rewiisütakat).

¹⁹ Jia kachonshiikana, jia aaʼinmajüinjanaka jüchonnii suulia sülatüin kasa mojusü namüin.e Nüsülajala Jeʼwaa jümüin na jüchonniikana, nüpaala naya jümüin (Sal. 127:3). Müshiijeseʼe jaaʼinmajüinjanain naya. ¿Kasa jaaʼinrajatka süpüla jaaʼinmajüin naya noulia na kamaʼüraliikana?

²⁰ Jikirajaa palajana sünain tü jaaʼinrajatkat süpüla jaaʼinmajüin jüchonnii noulia na kamaʼüraliikana. Jütüjaa saaʼu jamüin nakuwaʼipa na wayuu ataüjaaliikana tepichi otta kasain naainjain süpüla nemeejüin naya. Eeja jaaʼin sünain tü kasa naaʼinrakat (Prov. 22:3; 24:3). Soto jaaʼin nataüjaanüin na tepichikana sutuma wayuu eekai neʼraajüin otta wayuu anaka amaa naaʼin.

²¹ Yooto jia namaa jüchonnii (Deut. 6:6, 7). Jülüja jaaʼin tü namakat jümüin (Sant. 1:19). Soto jaaʼin kapüleʼewalin namüin na tepichikana naküjain süchiki tü alatakat namüin. Eesü nnojoleerüle sunoujünüin nanüiki naaʼinruʼu. Otta eeshii neimmolojunüle natuma na ataüjaakana naya. Jüliʼratüle saaʼu eein wanee kasa alataka nümüin jüchon, jüsakira nia sümaa kamaneein jia nümüin otta nnojo jaashichijaain nusoutapa jümüin.

²² Jikiraja jüchonnii. Jüküja namüin kasain sünainpünaain aainjirawaa akuwaʼipaa, jüküjainjatü tia keraapa nouyase süpüla natüjaain saaʼu. Jikiraja naya sünain tü nanüikinjatkalü otta kasain naaʼinrajatüin müleka eere wanee wayuu amülejeeka nakorolo. Pikiraja naya sükajee tü video otta karaloʼutairua eekat sutuma nupueulose Jeʼwaa sünainpünaaka aaʼinmajaa na tepichikana (paashajeʼera tü pütchikat «Nikirajüinjatka aka nüchonnii wanee wayuu»).

23. (1) ¿Mojusüche wamüin nataüjaanüle na tepichikana? (2) ¿Kasa wekirajaainjatka anain sünain tü wanee ekirajaayakat?

²³ Wayakana aküjaliikana pütchi nüchiki Jeʼwaa, mojushaatasü wamüin nataüjaanüin na tepichikana otta wayoutashaatain shia. Shia naaʼinraka na anoujashiikana tü nüchekakat Kürisüto, müshijeseʼe nnojolin nusoutunüin aaʼu wanee wayuu eekai nütaüjaain wanee jintüi, süsalainjachi nia naainjala saalinjee tia. ¿Kasa waaʼinrajatka süpüla wakaalinjain na ataüjaanakana? Shieerü wekirajaaka anain tia sünain tü wanee ekirajaayakat.