Ekirajeena waya sünain tü Wiwüliakat wouyantüle wachikuaʼa
1. ¿Jamüsü choʼujaaka maʼin wouyantüin eemüin na waküjakana amüin pütchi?
1 Nnojoishii nuluwataain neʼe Jesuu na nikirajüinkana sünain aküjaa pütchi, ‹ekirajüinjana wayuu› (Mat. 28:19, 20). Wanee aküjüi pütchi eʼikajüshi pütchi nüchiki Maleiwa, akaajasaʼa wanee ekirajüi wainma kasa naainjaka: eʼiküshi, nüküjüin jamaluʼuluin wanee kasa otta niiʼiyatüin jamüin shiimainka shia. Wanee sukuwaʼipa süpüla wekirajüin wayuu shia wouyantüle eemüin na aapajakana wanüiki süpüla wekirajüin naya.
2. ¿Jaralii wouyantüinjanaka anainmüin?
2 ¿Jaralii wouyantüinjanaka anainmüin? Nnojo motuin paaʼin ouyantaa eemüin na achekakana tü karaloukta weitajakat otta na anamaa makana amüin tü pütchi waküjakat. Püküjüle pütchi nümüin wanee wayuu kaayeruʼu otta naapajüle pünüiki, püchunta sunuumerose nipia otta nüteleeponose süpüla ayatüin paashajaain nümaa. Jülüja paaʼin püinkeerüin puʼttüin sünain ekirajaa. Ayatüle püchajaain na ekirajaweekana, eeshii pünteenale nanain (Mat. 10:11, NM).
3, 4. ¿Kasa waaʼinrajatka süpüla anain wekirajia wouyantapa?
3 Pükaaliinjeein na wayuukana. Yapeena waya süpüla anain wekirajia wouyantapa anale wekirajia soʼu tü palajatkat wakua. Na atüjakana ekirajaa jülüjüsü naaʼin tü shapaakat atuma naaʼin na wayuukana süpüla naashajaain süchiki nouyantapa. Eeshii na anakana amüin nasakirüin naya süpüla ayatüin naashajaweein namaa nouyantapa. Süka wakaaliinjeein na wayuukana jülüjüshii naya waaʼin woʼunapa otta ouyantamaatüshii waya. Eere süpüla puuyantüin jülüjaiwaʼaya naaʼin na wayuukana tü paashajaakat achiki, paainja shia soʼu wanee jee piama kaʼi.
4 Puuyantapa, paashajaa süchiki tü püküjakat soʼu palajatka pukua. Püntawaipa, püküja wanee pütchi suluʼuka tü Wiwüliakat anaka maʼin namüin na wayuukana, paapaja nanüiki otta piʼraaja maʼin naya. Püntawaipa, paashajaa namaa süchiki tü shiimain suluʼukat tü Wiwüliakat sünainpünaaka tü shapaakat atuma naaʼin.
5. ¿Kasa eeka süpüla paainjüin süpüla puʼttüin sünain ekirajaa wayuu sünain tü Wiwüliakat?
5 Eeja paaʼin süpüla ekirajaa sünain tü Wiwüliakat. Puuyanta püchikuaʼa süpüla puʼttüin sünain ekirajaa wayuu. ¿Jamüsü süpüla püinküin tia? Püma namüin püküjeein wanee pütchi anasü maʼin otta paashajeʼera wanee pütchi jülüjeetka naaʼin saaʼin pümüin suluʼujee karalouktaka Kasa shikirajaka. Paashajeʼera tü pütchikat, tü asakiraakat otta paashajeʼera wanee jee piamasü pütchi suluʼujee tü Wiwüliakat. Eesü süpüla paainjüin tia soʼu jaʼrai jee poloo minuuto soʼuluʼu tü piichikat. Paashajeʼera tü wanee asakiraakat süpüla ekirajawaa sünain puuyantapa.
6. ¿Kasa weeʼiyataka aka wayaawatüin choʼujaain wouyantüin wachikuaʼa?
6 Wanee kasa sünainpünaaka maʼin waʼyataain nümüin Maleiwa shia wouyantüle eemüin na aapajakana wanüiki. Sutuma tia, pükatala kaʼi sünainjee tü paainjakat semaanawai süpüla puuyantüin püchikuaʼa. Aneerü maʼin piʼyataain nümüin Maleiwa otta talateerü maʼin paaʼin.