Ekirajawaa palajana: choʼujaasü süpüla aleʼejaa sünain ekirajaa
1. ¿Jamüinjatü sukuwaʼipa tü aküjaakat pütchi naashin Jesús?
1 Yapajüshii nutuma Jesús na nikirajüinkana süpüla ‹aküjaa pütchi anasü süchi nukuaippa Maleiwa sünain aluwatawaa› (Mat. 4:23; 9:35). Mayaapejee nüküjüin neʼe pütchi Palestina, müshi Jesús namüin na nikirajüinkana süpülapünaa nuʼunuin sirumatuʼumüin, süküjünajatüin pütchi wattapünaa ‹süpüla sünoujain wayuu nünain› (Mat. 28:19, 20).
2. ¿kasa waaʼinrüinjatka süpüla woonooin sümüin tü nümakat Jesús sünain ekirajaa wayuu?
2 Süpüla shikeraajüin tü aluwataanakat anain naya, aleʼejüinjana eemüin na wayuu ekirajaweekana sünain tü pütchi anasükat süchiki Nuluwataaya Maleiwa süpüla akaaliinjaa naya sünain aaʼinraa süpüshuaʼa tü nuluwataakat anain Cristo. Süpüla anainjatüin nekirajia na wayuukana watuma waleʼejapa, yapainjana waya.
3. Wanaa sümaa waküjüin pütchi, ¿kasa waaʼinrüinjatka süpüla waleʼejüin sünain ekirajaa?
3 Tü paainjüinjatkat. Wanaa sümaa naküjüin pütchi na wawalayuukana eeshii eeka nasakirüin na wayuukana sünain wanee kasa süpüla nasouktüin shia naleʼejapa. Nouyantapa asouktüshii süka tü pütchi suluʼukat tü karalouktakat kasa shikirajaka maʼin, mayaa oʼttushii sünain nekirajüin na wayuukana sünain tü Wiwüliakat.
4. ¿Jamüsü nnojoluinjatka waʼatapajüin süntüin tü rewiisütakalüirua süpüla waleʼejüin sünain ekirajaa?
4 Akatsaʼa, nnojoishii waya aleʼejüinjanain soʼu wanee kashi sünain ekirajaa süka sujuʼitüin tü rewiisütakalüirua kashiwai. Tü waaʼinrajatkat shia ayatüin wekirajüin naya süka tü rewiisüta namaʼanakat süpüla nekirajaweein maʼin sünain tü Wiwüliakat.
5. ¿Kasa jülüjüinjatka waaʼin süpülapünaa waleʼejüin sünain ekirajaa?
5 Piyaawata tü keeʼireekat paaʼin. Süpülapünaa püleʼejüin sünain ekirajaa, pünaʼla tü karaloukta nanüliamaajatkat na wayuu püküjakana amüin pütchi otta piyaawata tü keeʼireekat paaʼin; eesü süpüla pikirajaain sünain wanee pütchi suluʼuka tü karaloukta püpütakat namüin jee paapajatüle wanee karaloukta sümaajatka wanee pütchi paashajaakalinka namaa. Püsakirüle na wayuukana sünain wanee kasa, anasü püsouktüle shia namüin püleʼejapa. Paashajeʼera wanee pütchi suluʼujee tü Wiwüliakat süpüla piiʼiyatüin shiimain tü pümakat.
6. ¿Kasa keeʼireeka waaʼin waleʼejapa sünain ekirajaa wayuu süchikijee waküjüin pütchi?
6 Tü keeʼireekat waaʼin. Tü keeʼireekat waaʼin shia woʼttuin sünain ekirajaa na wayuukana sünain tü Wiwüliakat. Eeshi wanee wayuu ayouktüshi ekirajawaa sünain tü Wiwüliakat nümaa wanee wawala aleʼejakai süchikijee nüküjüin pütchi nümüin. Mapa nüleʼejaka chi wawalakai sümaa tü rewiisüta jekennuukat otta nümaka nümüin: «Yaapünaashii waya sünain asouktaa namüin na wayuukana wanee asakiraa suluʼujeejatü tü Wiwüliakat». Naapajaka chi wawalakai nünüiki chi wayuukai, süchikijee naashajeʼeraka nümüin wanee pütchi suluʼujee tü Wiwüliakat otta wanee suluʼujee tü karaloukta wekirajakat aka wayuu sünain tü Wiwüliakat. Nuʼttaka chi wawalakai sünain nikirajüin chi wayuukai.
7. ¿Jamüshii sükaaliinjaka waya tü ekirajawaakat palajana süpüla woʼttuin sünain ekirajaa wayuu?
7 Anasü maʼin akatalaa kaʼi süpüla wekirajaain sünain tü wanüikinjatkat waleʼejapa süpüla wekirajüin na wayuu waküjakana amüin pütchi: Talateena maʼin waya sünain aküjaa pütchi otta eesü süpüla wakaaliinjüin na wayuu «eekai süpülajanatüjüliʼinya eeʼiranajawaa aaʼin nütüma chi Maleiwakai süpüla eeinjanain naya nümaa waneepia» (Aluw. 13:48).